ເເຂວງອຸດົມໄຊ ມີຄວາມພ້ອມຮ້ອຍສ່ວນຮ້ອຍເເລ້ວ ໃນການຈັດງານສະເຫລີມສະຫລອງວັນສ້າງຕັ້ງເເຂວງອຸດົມໄຊຄົບຮອບ60ປີ ເຊີ່ງຈະຈັດຂື້ນຢ່າງເປັນທາງໃນຕອນເຊົ້າວັນທີ15ກໍລະກົດນີ້ຢູ່ສະໂມສອນໃຫຍ່ຂອງເເຂວງ.
ທ່ານບຸນຄົງ ຫລ້າຈຽມພອນ ເຈົ້າເເຂວງໆອຸດົມໄຊ ໃຫ້ຮູ້ວ່າ:ປັດຈຸບັນ ການກະກຽມຈັດງານສະເຫລີມສະຫລອງວັນສ້າງຕັ້ງເເຂວງອຸດົມໄຊຄົບຮອບ60ປີ ຂອງຄະນະກໍາມະການ,ອະນຸກໍາມະການຈັດງານ ໄດ້ສໍາເລັດວຽກງານດ້ານຕ່າງໆຮ້ອຍສ່ວນຮ້ອຍເເລ້ວ ເປັນຕົ້ນ: ດ້ານເນື້ອໃນ,ວຽກງານພິທີການ, ວຽກງານປ້ອງກັນຊາດປ້ອງກັນຄວາມສະຫງົບ, ວຽກງານຂະບວນການ, ລວມເຖີງວຽກງານສໍາຄັນປີ່ນອ້ອມອື່ນໆ ນອກຈາກນີ້ ຍັງຊີ້ນໍາໃຫ້ພາກສ່ວນກ່ຽວຂ້ອງ ເອົາໃຈໃສ່ປະດັບປະດາ ຢູ່ພາຍໃນເທດສະບານເເຂວງ ໂດຍສະເພາະການເຮັດອະນາໄມຕາມຖະຫນົນຫົນທາງ,ຕິດທຸງຊາດ, ທຸງພັກ, ທຸງທີວ ຢູ່ຕາມເສັ້ນທາງສາຍຕ່າງໆໃຫ້ມີຄວາມສວຍງາມ, ພ້ອມທັງຈັດການເເຂ່ງຂັນກິລາ, ສິນລະວັນນະຄະດີ, ຈັດງານວາງສະເເດງຮູບພາບ, ວາງສະເເດງສີນຄ້າທີ່ເປັນເອກະລັກຂອງທ້ອງຖີ່ນ ເເລະສີນຄ້າປະເພດເຄື່ອງນຸ່ງຫົ່ມຂອງຊາວຄ້າຂາຍຈາກພາຍໃນເເລະຕ່າງປະເທດ ເພື່ອປະກອບສ່ວນເຮັດການການຈັດງານສະເຫລີມສະຫລອງວັນສ້າງຕັ້ງເເຂວງອຸດົມຄົບຮອບ60ປີຄັ້ງນີ້ມີບັນຍາກາດຟົດຟື້ນມ່ວນຊື່ນ.
ທ່ານບຸນຄົງ ຫລ້າຈຽມພອນ ໃຫ້ຮູ້ຕື່ມວ່າ: ສໍາລັບເເຂວງອຸດົມໄຊ ໄດ້ຮັບການສ້າງຕັ້ງຂື້ນໃນວັນທີ 15 ກໍລະກົດ ປີ1962 ໄດ້ກາຍເປັນຂີດຫມາຍປະຫວັດສາດທີ່ສໍາຄັນ ເເຫ່ງການເຕີບໃຫຍ່ຂະຫຍາຍຕົວຂອງເເຂວງ ຜ່ານເຫດການສໍາຄັນອັນລະອິດລະອ້ຽວຫລາຍເຫດການ ເຊີ່ງນັບເເຕ່ມື້ໄດ້ຮັບການສ້າງຕັ້ງຂື້ນມາຮອດປັດຈຸບັນ ຂະບວນການປົກປັກຮັກສາ ເເລະສ້າງສາພັດທະນາເເຂວງ ໄດ້ກ້າວຂື້ນສູ່ຄຸນນະພາບໃຫມ່ ເເລະ ສາມາດຍາດໄດ້ຜົນສໍາເລັດໃນຫລາຍດ້ານ ເຮັດໃຫ້ເເຂວງມີສະຖຽນລະພາບທາງດ້ານການເມືອງທີ່ຫນັກແຫນ້ນ ,ສັງຄົມມີຄວາມສະຫງົບສີວີໄລ ເເລະ ຍຸຕິທໍາ ພື້ນຖານໂຄງລ່າງ ຂອງເເຂວງນັບມື້ໄດ້ ຮັບການພັດທະນາ ປະຊາຊົນສ່ວນໃຫຍ່ໄດ້ນໍາໃຊ້ໄຟຟ້າ, ນໍ້າສະອາດ,ເຂົ້າເຖິງຕາຫນ່າງການສືກສາ,ສາທາລະນະສຸກ, ການຄ້າ-ການລົງທືນ ນັບມື້ເພີ່ມສູງຂື້ນ ເຮັດໃຫ້ເສດຖະກິດຂອງເເຂວງ ຂະຫຍາຍຕົວຢ່າງຕໍ່ເນື່ອງ ເເລະ ອື່ນໆ ໂດຍພາຍໃຕ້ການຊີ້ນໍາໆພາອັນປີຊາສາມາດ ເເລະສະຫລາດສ່ອງໃສຂອງພັກ -ລັດ, ຄະນະບໍລິຫານງານເເຂວງໃນເເຕ່ລະສະໄຫມກໍ່ຄືພາກສ່ວນຕ່າງໆ ຄຽງຄູ່ກັນນີ້ ທ່ານຍັງຮຽກຮ້ອງມາຍັງປະຊາຊົນຊາວເເຂວງອຸດົມໄຊທຸກຄົນຈົ່ງຕັ້ງຫນ້າສະເຫລີມສະຫລອງວັນສໍາຄັນນີ້ເປັນມີບັນຍາກາດມ່ວນຊື່ນ ພ້ອມທັງປະກອບສ່ວນເຂົ້າຮ່ວມຢ່າງຕັ້ງຫນ້າໃນການປົກປັກຮັກສາ ເເລະສ້າງສາພັດທະນາເເຂວງອຸດົມໄຊໃຫ້ຈະເລີນກ້າວຫນ້າ ເພື່ອປັບປຸງຊີວິການເປັນຢູ່,ເເກ້ໄຂຄວາມທຸກຍາກໃຫ້ນັບມື້ຫລຸດລົງ.
ຂ່າວ: ເດດອາລຸນ
ພາບ.: ຄໍາກອງ
