ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເມືອງແກ່ນທ້າວ ແຂວງໄຊຍະບູລີ ໄດ້ຈັດພິທີເປີດຂະບວນການສັກຢາກັນພະຍາດແຫ່ງຊາດ (ວສຊ) ໜາກແດງໃຫຍ່, ໝາກແດງນ້ອຍ ຂຶ້ນໃນວັນທີ 20 ພຶດສະພານີ້ ທີ່ໂຮງຮຽນນະພັດສອນ ໂດຍການເປັນກຽດເຂົ້າຮ່ວມຂອງທ່ານ ຄໍາປຸ່ນ ນວນສະບັບ ຮອງເຈົ້າເມືອງໆແກ່ນທ້າວ ຜູ້ຊີ້ນໍາວຽກງານວັດທະນະທໍາ-ສັງຄົມ, ທ່ານ ບຸນຍັງ ພັນທະວົງ ຫົວໜ້າຫ້ອງການສາທາລະນະສຸກເມືອງ, ທ່ານ ນາວອນ ສອນສຸພາບ ຮອງຫົວໜ້າຫ້ອງການສຶກສາທິການ ແລະ ກິລາເມືອງ, ມີພະນັກງານແພດໝໍ, ຄູ-ນັກຮຽນເຂົ້າຮ່ວມ.
ທ່ານ ຄໍາປຸ່ນ ນວນສະບັບ ກ່າວວ່າ: ການເປີດຂະບວນການຄັ້ງນີ້ ເພື່ອສ້າງພູມຄຸ້ມກັນໃຫ້ເດັກນ້ອຍກຸ່ມເປົ້າໝາຍອາຍຸ ລະຫວ່າງ 9-59 ເດືອນ ກວມ 95% ຂອງເດັກນ້ອຍເປົ້າໝາຍໃນທົ່ວເມືອງ ແລະ ກວມເອົາ 100% ຂອງກຸ່ມເປົ້າໝາຍຕົວຈິງຕາມບັນຊີລາຍຊື່ ເພື່ອຮັກສາສະພາບການຕັດຕ່ອງໂສ້ການຕິດຕໍ່, ຕັດວົງຈອນການຕິດຕໍ່ຂອງພະຍາດ, ສະກັດກັ້ນການແຜ່ລາມຂອງພະຍາດໝາກແດງ ຊຶ່ງສາມາດປ້ອງກັນດ້ວຍວັກຊິນ ເພື່ອໃຫ້ເດັກນ້ອຍພາຍໃນເມືອງໄດ້ຮັບການປົກປ້ອງໃຫ້ໄດ້ 95% ຂຶ້ນໄປ.
ເມືອງແກ່ນທ້າວ ມີເດັກກຸ່ມເປົ້າໝາຍທັງໝົດ 2.100 ກວ່າຄົນ, ຍິງ 1.000 ກວ່າຄົນ. ໃນນີ້, ເດັກ 9 – ລຸ່ມ 1 ປີມີ 119 ຄົນ ແລະ ເດັກ 1 ປີ-ລຸ່ມ 5 ປີມີ 2.000 ກວ່າຄົນ. ຮຽກຮ້ອງໃຫ້ຜູ້ປົກຄອງ, ຄູ, ພະນັກງານແພດໝໍ, ນັກຮຽນຈົ່ງໃຫ້ການຮ່ວມມື ແລະ ເຂົ້າຮ່ວມຂະບວນການດັ່ງກ່າວ. ພ້ອມກັນນໍາເອົາລູກຫຼານໄປຮັບການສັກຢາກັນພະຍາດໃຫ້ບັນລຸຕາມຄາດໝາຍທີ່ວາງໄວ້, ຂະບວນການສັກຢາຄັ້ງນີ້ຈະດໍາເນີນໄປຈົນຮອດ ວັນທີ 31 ພຶດສະພານີ້.
ຂ່າວ: ແກ່ນທ້າວ