ເມືອງແກ່ນທ້າວ ແຂວງໄຊຍະບູລີ ໄດ້ຈັດພິທີເປີດປີທ່ອງທ່ຽວລາວ ຕິດພັນກັບງານບຸນນະມັດສະການ ພຣະທາດທ້າວແກ່ນ-ພຣະທາດນາງແພງສີ ປະເພນີບຸນເດືອນເຈັດ (ບຸນພຣະເຫວດ) ປະຈໍາປີ 2024 ຂຶ້ນໃນວັນທີ 19 ມິຖຸນານີ້ ທີ່ເດີ່ນກິລາເມືອງ ໂດຍການເປັນກຽດເຂົ້າຮ່ວມຂອງທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ມີທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ພາຍຫຼັງຂະບວນແຫ່ກ້ອນກໍາລັງຕ່າງໆ, ທ່ານ ປະເສີດ ອິນວົງຄໍາ ປະທານແນວລາວສ້າງຊາດເມືອງ ຮອງປະທານຄະນະຮັບຜິດຊອບເປີດປີທ່ອງທ່ຽວລາວ ໄດ້ລາຍງານໃຫ້ຮູ້ວ່າ: ເມືອງແກ່ນທ້າວ ໄດ້ກຳນົດເອົາການເປີດປີທ່ອງທ່ຽວລາວ ຕິດພັນກັບງານບຸນນະມັດສະການ ພຣະທາດທ້າວແກ່ນ-ພຣະທາດນາງແພງສີ ປະເພນີບຸນເດືອນເຈັດ ຊຶ່ງເປັນປາງບຸນໃຫຍ່ຂອງຊາວເມືອງແກ່ນທ້າວ ໂດຍສະເພາະແມ່ນປະຊາຊົນພາຍໃນບ້ານເທດສະບານເມືອງ ໃນທຸກໆປີເມື່ອຮອດມື້ຂຶ້ນ 13 ຄໍ່າເດືອນ 7 ເພັງແມ່ນໄດ້ຫ້າງຫາກະກຽມ ແລະ ຕັ້ງບຸນປະເພນີເດືອນເຈັດ ( ບຸນພຣະເຫວດ) ຂຶ້ນ ແລະ ງານບຸນດັ່ງກ່າວໄດ້ກໍານົດເຂົ້າໃນໂຄງການດໍາເນີນງານຂອງຄະນະບໍລິຫານງານພັກເມືອງ ທີ່ເຄີຍປະຕິບັດກັນມາເປັນເວລາດົນນານຫຼາຍຮຸ່ນຄົນ ແລະ ເປັນບຸນປະເພນີທີ່ມີຊື່ສຽງໂດ່ງດັ່ງ ຊຶ່ງເປັນທີ່ຮັບຮູ້ຂອງມວນຊົນທົ່ວໄປທັງພາຍໃນ ແລະ ຕ່າງປະເທດ. ສະນັ້ນ, ນັບແຕ່ໃນຕົ້ນເດືອນພຶດສະພາ 2024 ພາຍຫຼັງທີ່ເຈົ້າເມືອງແກ່ນທ້າວ ໄດ້ອອກຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບກະກຽມການຈັດງານດັ່ງກ່າວ ຊຶ່ງປະກອບມີ 11 ອະນຸກໍາມະການໄດ້ສ້າງແຜນເຄື່ອນໄຫວເປັນແຕ່ລະໄລຍະ, ໄດ້ຄົ້ນຄວ້າປຶກສາຫາລືຮ່ວມກັບ ອົງການປົກຄອງແຕ່ລະຂັ້ນພາຍໃນເມືອງ ໃນການຫ້າງຫາກະກຽມຄວາມພ້ອມ ແນໃສ່ເຮັດໃຫ້ການຈັດງານດັ່ງກ່າວມີເນື້ອໃນເລິກເຊິ່ງ, ມີຄວາມສະຫງົບປອດໄພ ສ້າງໄດ້ຂະບວນການເບີກບານມ່ວນຊື່ນເປັນຂະບວນຟົດຟື້ນ. ງານດັ່ງກ່າວໄດ້ຈັດຂຶ້ນໃນລະຫວ່າງວັນທີ 19-21 ມິຖຸນາ 2024 ກົງກັບມື້ຂຶ້ນ 13-15 ຄໍ່າເດືອນ 7 ພ.ສ 2567. ຈາກນັ້ນ, ທ່ານ ອໍາຄາ ລັດສະໝີ ໄດ້ໃຫ້ກຽດກ່າວເປີດງານ, ໂອກາດນີ້, ທ່ານ ເພັດພິໄຊ ສູນວິໄລ ໄດ້ໃຫ້ກຽດລັ່ນຄ້ອງ 9 ບາດ, ຕັດແຖບຜ້າ ເພື່ອເປັນສັນຍາລັກການເປີດງານຢ່າງເປັນທາງການ.
ຂ່າວ: ແກ່ນທ້າວ, ພາບ: ຄໍາຜາຍ ສຸລິຍະວົງ
