ວັນທີ 26 ມິຖຸນານີ້, ທີ່ນະຄອນຮາຕິ່ງ ແຂວງຮາຕິ່ງ ສສ ຫວຽດນາມ, ໄດ້ດໍາເນີນກອງປະຊຸມພົບປະ ລະຫວ່າງ ຄະນະຜູ້ແທນຂັ້ນສູງ ແຂວງຄໍາມ່ວນ ສປປ ລາວ ແລະ ຄະນະຜູ້ແທນຂັ້ນສູງ ແຂວງຮາຕິ່ງ, ສສ ຫວຽດນາມ ເພື່ອທົບທວນສະພາບການຮ່ວມມືຕາມເນື້ອໃນບົດບັນທຶກໃນຜ່ານມາ. ຄະນະຜູ້ແທນຂັ້ນສູງຝ່າຍ ແຂວງຄໍາມ່ວນ ນໍາໂດຍ ສະຫາຍ ວັນໄຊພອງສະຫວັນ ກຳມະການສູນກາງພັກ, ເລຂາພັກແຂວງ, ເຈົ້າແຂວງຄໍາມ່ວນ, ຝ່າຍແຂວງຮາຕິ່ງ ນໍາໂດຍ ສະຫາຍ ຮ່ວາງຈຸງຢຸ້ງ ກຳມະການສູນກາງພັກ, ເລຂາພັກແຂວງ, ປະທານສະພາປະຊາຊົນແຂວງ, ມີບັນດາສະຫາຍການນໍາຂັ້ນສູງ, ພ້ອມດ້ວຍຕາງໜ້າພະແນກການ, ຂະແໜງການທີ່ກ່ຽວຂ້ອງທັງສອງແຂວງ ແລະ ຜູ້ປະກອບການທຸລະກິດເຂົ້າຮ່ວມ.
ໃນກອງປະຊຸມຫົວໜ້າຄະນະຜູ້ແທນທັງສອງຝ່າຍ ຕ່າງກໍໄດ້ລາຍງານໃຫ້ກັນຊາບກ່ຽວກັບ ການພັດທະນາເສດຖະກິດ-ສັງຄົມຂອງແຕ່ລະແຂວງ, ພ້ອມທັງຕີລາຄາຜົນສໍາເລັດໃນການຈັດຕັ້ງປະຕິບັດ ເນື້ອໃນບົດບັນທຶກກອງປະຊຸມຂັ້ນສູງ ທີ່ລົງນາມຮ່ວມກັນໃນວັນທີ 27 ມີນາ 2023 ທີ່ເທສະບານເມືອງທ່າແຂກ, ແຂວງຄໍາມ່ວນ, ບົນຈິດໃຈສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດຖະບານລາວ-ຫວຽດນາມ ແລະສອງແຂວງຄໍາມ່ວນ-ຮາຕິ່ງ ໄດ້ຢ່າງມີປະສິດທິຜົນແລະໄດ້ຮັບຜົນສໍາເລັດ. ພ້ອມນີ້ບັນດາສະຫາຍຜູ້ແທນຂັ້ນສູງ ຂອງສອງແຂວງຍັງໄດ້ແລກປ່ຽນບົດຮຽນການເຊິ່ງກັນ ແລະ ກັນ ເປັນຕົ້ນແມ່ນບັນຫາໃນດ້ານຂົງເຂດເສດຖະກິດນໍາເຂົ້າ-ສົ່ງອອກສິນຄ້າຜ່ານແດນ, ການພັດທະນາພື້ນຖານໂຄງລ່າງດ້ານເສັ້ນທາງຄົມມະນາຄົມຂົນສົ່ງຂອງດ່ານສາກົນ, ດ້ານວຽກງານກະສິກຳ ແລະ ຂົງເຂດວັດທະນະທໍາຈໍານວນໜຶ່ງ ໂດຍທັງສອງຝ່າຍມີຄວາມເປັນເອກະພາບກັນ ຈະສືບຕໍ່ການຮ່ວມມືໃນຕໍ່ໜ້າຄື: ຮ່ວມມືພັດທະນາກ່ຽວກັບວຽກງານກໍ່ສ້າງພັກ ແລະ ອົງການປົກຄອງໃຫ້ມີຄວາມເຂັ້ມແຂງ, ຮ່ວມມືຊ່ວຍເຫຼືອທາງດ້ານວຽກງານປ້ອງກັນຊາດ, ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, ພ້ອມທັງຮ່ວມມືເຂົ້າໃນການພັດທະນາທາງດ້ານຂົງເຂດເສດຖະກິດ ແລະ ວັດທະນະທໍາ-ສັງຄົມອີກຈໍານວນໜຶ່ງ. ໃນນາມປະທານຮ່ວມກອງປະຊຸມຂັ້ນສູງ ລະຫວ່າງ ແຂວງຄໍາມ່ວນ ແລະ ແຂວງຮາຕິ່ງ; ໃຫ້ກຽດລົງນາມເຊັນບົດບັນທຶກໃນຄັ້ງນີ້ ຝ່າຍແຂວງຄໍາມ່ວນເຊັນໂດຍ ສະຫາຍ ວັນໄຊ ພອງສະຫວັນ, ຝ່າຍແຂວງຮາຕິ່ງ ເຊັນໂດຍ ສະຫາຍ ຮ່ວາງຈຸງຢຸ້ງ ໂດຍການເປັນສັກຂີພະຍານຂອງຄະນະຜູ້ແທນທັງສອງຝ່າຍທີ່ເຂົ້າຮ່ວມ.
ຂ່າວ: ມະນີວັນ
