ໃນຕອນເຊົ້າວັນທີ 22 ກໍລະກົດ 2022 ນີ້ທີ່ແຄມຂອງຈຸດບ້ານໂພນກຸງ ນະຄອນປາກເຊ ໄດ້ຈັດໃຫ້ມີການຝຶກຊ້ອມຂັບເຮື່ອ ເພື່ອກູ້ໄພ ພິບັດທາງນໍ້າ ໂດຍການເຂົ້າຮ່ວມຂອງທ່ານ ອຸດົມສັກ ດີວິໄຊ ກຳມະການພັກແຂວງ ຫົວໜ້າພະແນກແຮງງານແລະ ສະຫວັດດີການ -ສັງຄົມແຂວງ ພ້ອມດ້ວຍຄະນະ,ມີຄະນະພະ ແນກການ,ກົມກອງອ້ອມຂ້າງແຂວງ ທີ່ນອນໃນຄະນະກຳມະການຄຸ້ມຄອງໄພພິບັດແຂວງ,ມີພະນັກງານ ຄູຝຶກກູ້ໄພ,ແລະນັກກູ້ໄພທີ່ມາຈາກ ກອງບັນ ຊາການທະຫານແຂວງ,ປກສ ແຂວງ, ພະ ແນກ ຮສສ ແຂວງ ແລະ ຫ້ອງການ ຮສສ ເມືອງ ເຂົ້າຮ່ວມ.
ທ່ານ ຍົກດາ ໄຊຍະຈັກ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງໄດ້ກ່າວວ່າ: ປະຈຸບັນ ບັນ ຫາໄພພິບັດ ແລະ ການປ່ຽນແປງຂອງດິນຟ້າອາກາດ ເປັນຕົ້ນ: ໄພນໍ້າຖ້ວມ ໄດ້ກາຍ ເປັນສິ່ງ ທ້າທາຍຢ່າງໃຫຍ່ຫຼວງ ແລະ ເພີ່ມຄວາມຮຸນແຮງຂຶ້ນເລື້ອຍໆ, ສ້າງຜົນກະທົບ ແລະ ສ້າງຄວາມເສຍຫາຍຢ່າງ ຫຼວງຫຼາຍ ຕໍ່ຊີວິດ ແລະ ຊັບສິນຂອງປະຊາຊົນ ທັງໃນໄລຍະສັ້ນ ແລະ ໄລຍະຍາວ ເຊິ່ງໃນປະຈຸບັນ ຄະນະກຳມະການ ຄຸ້ມຄອງໄພພິບັດຂັ້ນແຂວງ ໄດ້ຮັບການຊ່ວຍເຫຼືອດ້ານອຸປະກອນຮັບໃຊ້ກອບກູ້ໄພພິບັດນໍ້າຖ້ວມ ໂດຍສະເພາະແມ່ນເຮືອກູ້ ໄພ ທີ່ທາງສູນກາງມອບໃຫ້ ເຊິ່ງສາ ມາດບັນຈຸຈຳນວນພົນໄດ້ 15-25 ຄົນ ຈຳນວນ 05 ລຳ, ໃນປະຈຸບັນເຮືອຍັງຢູ່ ນຳຈະແນກ ຮສສ ແຂວງ ຈຳນວນ 03 ລຳ, ເນື່ອງຈາກຈຳນວນ 02 ລຳ ແມ່ນມອບໃຫ້ເມືອງຄຸ້ມຄອງຄື: ເມືອງ ສຸຂຸ ມາ 01 ລຳ ແລະ ເມືອງ ໂຂງ 01 ລຳ ນອກຈາກນີ້ກໍ່ຍັງມີເຮືອຂະໜາດກາງ ສາມາດບັນຈຸໄດ້ 8 – 12 ຄົນ ທັງໝົດມີ 08 ລຳ ແລະ ເຮືອ ສູບລົມ ຈຳນວນ 10 ລຳ.
ຕໍ່ກັບເຫດການໄພພິບັດນໍ້າຖ້ວມປີ 2019 ຜ່ານມານັ້ນ ແຂວງ ຈຳປາສັກ ໄດ້ຮັບບົດຮຽນຫຼາຍຢ່າງຕໍ່ບັນການຊ່ວຍ ເຫຼືອ ສຸກເສີນທາງນໍ້າ ໂດຍສະເພາະແມ່ນຜູ້ຮັບຜິດຊອບຂັບເຮືອໃນເວລາສຸກເສີນແມ່ນບໍ່ມີ, ມີແຕ່ພະແນກ ຮສສ ແຂວງ ເທົ່ານັ້ນທີ່ສາມາດຂັບເຮືອດັ່ງກ່າວໄດ້ ເຮັດໃຫ້ການຊ່ວຍເຫຼືອສຸກເສີນມີຄວາມຫຍຸ້ງຍາກ ແລະ ຊັກຊ້າ; ສະນັ້ນທາງ ພະແນກ ແຮງງານ ແລະ ສະຫວັດດີການສັງຄົມ ແຂວງ ຈຳປາສັກ ໃນນາມກອງເລຂາຄະນະກໍາມະການຄຸ້ມຄອງ ໄພພິບັດຂັ້ນແຂວງ ຈິ່ງຈັດພິທີການຝຶກຊ້ອມຂັບເຮືອກູ້ໄພທາງນຳ້ໃຫ້ກັບພາກສ່ວນທີ່ກ່ຽວຂ້ອງໃຫ້ມີຄວາມ ເຂັ້ມແຂງ ສາມາດຕອບໂຕ້ ແລະ ຮັບມືກັບໄຟພົບັດທີ່ອາດຈະເກີດຂຶ້ນໃນຕໍ່ໜ້າ. ໂດຍສະເພາະພາກສ່ວນ ຂະແໜງການອ້ອມຂ້າງແຂວງ ແລະ ບັນດາເມືອງທີ່ມີຄວາມສ່ຽງ ໃຫ້ສາມາດຮັບມືກັບເຫດການສຸກເສີນໄດ້.
ຫລັງຈາກເປີດພິທີແລ້ວ ທາງຄູຝຶກໄດ້ຖ່າຍທອດບົດຮຽນໃຫ້ແກ່ນັກກູ້ໄພທາງນ້ຳ,ໂດຍສະເພາະຂັ້ນຕອນການຂັບເຮືອ,ການປົກປັກຮັກສາ ແລະນຳໃຊ້ເຮືອ,ການເຂົ້າຊ່ວຍເຫຼືອຜູ້ປະສົບໄພນໍ້າຖ້ວມ, ນໍ້າຊຸ,ການກູ້ຊີບຊ່ວຍເຫຼືອຄົນຕົກນໍ້າ ແລະເຕັກນິກວິທີການສຳຄັນໃນການຊ່ວຍເຫຼືອອື່ນໆອີກ.
ເກດສະໜາ ແກ້ວສຸວັນນະແສງ
