ໃນຕອນເຊົ້າຂອງວັນທີ 12 ກໍລະກົດ 2022ນີ້ ຢູ່ທີ່ທ່າວັດບ້ານຄັນແຍງ ເມືອງໂພນທອງ ,ພະແນກກະສິກຳ ແລະ ປ່າໄມ້ແຂວງ ຮ່ວມກັບ ອົງການປົກຄອງເມືອງໂພນທອງ ແຂວງຈຳປາສັກ ໄດ້ຈັດພິທີປ່ອຍປາເນື່ອງໃນໂອກາດວັນອະນຸລັກສັດນ້ຳ ແລະ ສັດປ່າແຫ່ງຊາດ 13 ກໍລະກົດ ໂດຍໃຫ້ກຽດເຂົ້າຮ່ວມຂອງທ່ານ ວິໄລວົງ ບຸດດາຄຳ ເຈົ້າແຂວງໆຈຳປາສັກ, ທ່ານ ສຸພາບ ທຳມະຮັກສາ ເຈົ້າເມືອງໆໂພນທອງ, ທ່ານ ສົມລິດ ວິລະວົງ ຫົວໜ້າພະແນກກະສິກຳ ແລະ ປ່າໄມ້ແຂວງ, ມີພະເຖລະນຸເຖລະ, ມີພະແນກການກົມກອງອ້ອມແຂວງ, ເມືອງ, ບັນດາຫົວໜ່ວຍທຸລະກິດ, ອຳນາດການປົກຄອງບ້ານພ້ອມດ້ວຍປະຊາຊົນບ້ານຄັນແຍງເຂົ້າຮ່ວມ.
ໃນພິທີ ພາຍຫຼັງທີ່ ທ່ານ ສຸພາບ ທຳມະຮັກສາ ເຈົ້າເມືອງໆໂພນທອງໄດ້ລາຍ ງານກ່ຽວກັບການກະກຽມໃນການຈັດພິທີປ່ອຍປາໃນຄັ້ງນີ້ແລ້ວ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ກໍ່ໄດ້ມີຄຳເຫັນເຊິ່ງທ່ານໄດ້ກ່າວເຖິງຄວາມໝາຍຄວາມສຳຄັນຂອງວັນອະນຸລັກສັດນ້ຳ ແລະ ສັດປ່າແຫ່ງຊາດ 13 ກໍລະກົດ ທີ່ ຕ້ອງໄດ້ປະຕິບັດກັນໃນການປົກປັກຮັກສາ ແລະ ພັດທະນາສັດນ້ຳ – ສັດປ່າ ສະນັ້ນ; ການປ່ອຍປາໃນຄັ້ງນີ້ແມ່ນເພື່ອປ່ອຍກັບຄືນສູ່ທຳມະຊາດເປັນການທົດແທນປາທີ່ຖືກທຳລາຍໃນໄລຍະທີ່ຜ່ານມາເພື່ອບໍ່ໃຫ້ດັບສູນໄປ ທັງເປັນການປູກຈິດສຳນຶກໃຫ້ແກ່ທຸກພາກສ່ວນໃນສັງຄົມຮູ້ເຖິງຄຸນປະໂຫຍດ, ຄວາມສຳຄັນຂອງສັດນ້ຳ – ສັດປ່າ ຕໍ່ການດຳລົງຊີວິດຂອງປະຊາຊົນບັນດາເຜົ່າ, ການທ່ອງທ່ຽວ, ການສຶກສາຄົ້ນຄ້ວາທາງດ້ານວິທະຍາສາດກໍ່ຄືການພັດທະນາເສດຖະກິດ – ສັງຄົມແຫ່ງຊາດ. ແນໃສ່ໃຫ້ທຸກຄົນເປັນເຈົ້າການຮ່ວມກັນອະນຸລັກປົກປັກຮັກສາສັດນ້ຳ ແລະ ສັດປ່າໃຫ້ຍືນຍົງຕະຫຼອດໄປ.
ສຳລັບປາທີ່ນຳມາປ່ອຍໃນຄັ້ງນີ້ ມີຈຳນວນ 2ແສນ2ໝື່ນໂຕ ໃນນັ້ນມີປະເພດປາປາກ ແລະ ປາເຜາະ ໃນພິທີໄດ້ມີພິທີກຳທາງສາສະໜານຳພາໂດຍພະສົງ ຈາກນີ້ຜູ້ເຂົ້າຮ່ວມນັບແຕ່ການນຳແຂວງ, ພະແນກກະສິກຳ -ປ່າໄມ້ແຂວງ, ເມືອງໂພນທອງ ພາກສ່ວນຕ່າງໆ ໄດ້ຮ່ວມກັນປ່ອຍປາລົງສູ່ນ້ຳຂອງທີ່ທ່າວັດບ້ານຄັນແຍງ.
ຂຽນຂ່າວ:ປະພິດ
