ແຂວງຈຳປາສັກຈັດພິທີມອບ – ຮັບ ແລະຈັດສົ່ງອັດຖີທະຫານອາສາສະໝັກ ແລະ ຊ່ຽວຊານຫວຽດນາມຢ່າງສົມກຽດ ໃນຕອນເຊົ້າວັນທີ 2 ມິຖຸນາ 2022 ທີ່ກອງບັນຊາການທະຫານແຂວງຈຳປາສັກ,ໃຫ້ກຽດກ່າວ ແລະ ເຊັນມອບອັດຖິໂດຍ ທ່ານ ໂສມ ບຸດຕະກຸນ ຮອງເຈົ້າແຂວງໆຈຳປາສັກ,ຮັບໂດຍທ່ານ ນາງ ອີ່ ງັອກ ຫົວໜ້າຄະນະປະຕິບັດງານພິເສດແຂວງກອນຕູມ ສສ ຫວຽດນາມ.ໂດຍຊ່ອງໜ້າບັນດາທ່ານຄະນະພັກ,ອົງການປົກຄອງແຂວງ,ຄະນະພັກ – ຄະນະບັນຊາ,ນາຍ ແລະ ພົນທະຫານ,ນາຍ ແລະ ພົນຕຳຫຼວດ,ກອງກຽດຕິຍົດ ແລະ ພະແນກການອ້ອມຂ້າງແຂວງ ຕາງໜ້າອົງການຈັດ ແລະ ປະຊາຊົນ ນຳນວນຫຼວງຫຼາຍ.
ໃນພິທີຄະນະພັກ – ອົງການປົກຄອງແຂວງ ຈຳປາສັກ,ເຊກອງ,ອັດຕະປື,ຂົງເຂດການເມືອງ,ຂົງເຂດປ້ອງກັນຊາດ – ປ້ອງກັນຄວາມສະຫງົບ,ຂົງເຂດວັດທະນະທຳ – ສັງຄົມ,ສະມາຄົມຫວຽດນາມ ແລະ ອົງການຈັດຕັ້ງຕ່າງໆ ໄດ້ເຂົ້າວາງພວງມາລາ ສະແດງຄວາມໄວ້ອາໄລ ແລະລະນຶກເຖິງຜົນງານການເສຍສະຫຼະຊີວິດຂອງທະຫານອາສາສະໝັກ ແລະ ຊ່ຽວຊານຫວຽດນາມທີ່ມີຕໍ່ການຕໍ່ສູ້ ປົດປ່ອຍຊາດຢູ່ 3 ແຂວງພາກໃຕ້ຂອງລາວ ຈາກນີ້ ນີ້ ທ່ານ ໂສມ ບຸດຕະກຸນ ຮອງເຈົ້າແຂວງໆຈຳປາສັກ ໄດ້ກ່າວ ແລະ ເຊັນ ມອບອັດຖິ ໂດຍກ່າວວ່າ: ອັດຖີທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ລາວທີ່ສາມາດຂຸດຄົ້ນໄດ້ ໃນສົກປີ 2021 -2022 ມີທັງໝົດ 7 ອັດຖິ ໃນນັ້ນ ຂຸດຄົ້ນໄດ້ຢູ່ແຂວງຈຳປາສັກມີ 4 ອັດຖິ,ອັດຕະປື 2 ອັດຖິ ແລະ ແຂວງເຊກອງ 1 ອັດຖິ.
ໃນໂອກາດທີ່ມີຄວາມໝາຍນີ້ ທ່ານ ໂສມ ບຸດຕະກຸນ ຮອງເຈົ້າແຂວງຈຳປາສັກໄດ້ສະແດງຄວາມຂອບອົກ ຂອບໃຈມາຍັງການນຳພັກ-ລັດ ພໍ່ແມ່ ປະຊາຊົນຫວຽດນາມ ອ້າຍນ້ອງ ພິເສດແມ່ນຄອບຄົວຂອງທະຫານອາສາສະໝັກ ແລະ ຊ່ຽວຊານ ຫວຽດນາມ ທີ່ຍອມເສຍສະຫຼະຊີວິດ ເລືອດເນື້ອເພື່ອພາລະກິດຕໍ່ສູ້ກູ້ຊາດ ຕ້ານປະຕິການ ແລະ ສັດຕູ ຕ່າງດ້າວ ຍອມສະຫຼະ ທຸກສິ່ງຢ່າງເພື່ອປົດປ່ອຍຊາດລາວ ກໍ່ຄື 3 ແຂວງພາກໃຕ້ລາວ ຊຶ່ງປະຕິບັດ ໜ້າທີ່ຕາມຄຳສອນຂອງປະທານ ໂຮ ຈີ ມິນ ຜູ້ນຳທີ່ຍິ່ງໃຫຍ່ ແລະ ເຄົາລົບຮັກ ເຊີ່ງໄດ້ເວົ້າວ່າ ຊ່ວຍ ເພື່ອນ ກໍ່ເໝືອນຊ່ວຍຕົວເອງ.
ເພື່ອເປັນການສືບທອດຄວາມສາມັກຄີພິເສດ ແລະ ການຮ່ວມມືຮອບດ້ານຂອງສອງຊາດເຮົາ ໃຫ້ໝັ້ນຄົງທະນົງແກ່ນ ແລະ ຈະເລີນງອກງາມຂື້ນໄປເລື້ອຍໆ ຂ້າພະເຈົ້າຕ່າງໜ້າໃຫ້ຄະນະປະຕິບັດງານ ພິເສດ 3 ແຂວງ ກໍ່ຄືປະຊາຊົນ 3 ແຂວງພາກໃຕ້ລາວ ພ້ອມແລ້ວຈະເຮັດທຸກສິງຢ່າງຈົນສຸດຄວາມ ສາມາດໃນການຊອກຫາ ຂຸດຫາອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ຢູ່ 3 ແຂວງ ພາກໃຕ້ ໃຫ້ບັນລຸໄດ້ຕາມແຜນການເປົ້າໝາຍ ແລະ ມອບ-ສົ່ງກັບຄືນປະເທດ ບ້ານເກີດເມືອງນອນໃນຕໍ່ໆໄປ
ເກດສະໜາ ແກ້ວສຸວັນນະແສງ.
