ກອງປະຊຸມປຶກສາຫາລືລະຫວ່າງ ຂະແໜງການພາກລັດ ແລະ ພາກທຸລະກິດ ເພື່ອແກ້ໄຂປະກົດການຫຍໍ້ທໍ້ໃນວຽກງານທ່ອງທ່ຽວ ຈັດຂຶ້ນທີ່ ພະແນກຖະແຫຼງຂ່າວ,ວັດທະນະທຳແລະທ່ອງທ່ຽວແຂວງຈຳປາສັກ ໃນວັນທີ 23 ມິຖຸນາ 2023 ໂດຍເປັນປະທານຂອງ ທ່ານ ນາງ ແສງສຸວັນ ຊຸຍພະສິດ ກຳມະການພັກແຂວງ ຫົວໜ້າພະແນກຖະແຫຼງຂ່າວ,ວັດທະນະທຳ ແລະທ່ອງທ່ຽວແຂວງຈຳປາສັກ. ມີພະແນກການກົມກອງ ອົງການຈັດຕັ້ງອ້ອມຂ້າງແຂວງ,ຄະນະສະພາການຄ້າ ແລະ ອຸດສາຫະກຳ, ຄະນະສາມະຄົມໂຮງແຮມ ແລະ ຮ້ານອາຫານ, ຄະນະສະມາຄົມທຸລະກິດທ່ອງທ່ຽວ,ປະທານສາມະຄົມຫັດຖະກຳ,ປະທານກຸ່ມພະນັກງານຳທ່ອງທ່ຽວ,ຜູ້ປະກອບການທຸລະກິດທ່ອງທ່ຽວ,ຕຳຫຼວດທ່ອງທ່ຽວ,ຫົວໜ່ວຍທຸລະກິດທ່ອງທ່ຽວ ແລະ ພະນັກງານກ່ຽວຂ້ອງເຂົ້າຮ່ວມ.
ໃນພິທີ ທ່ານ ນາງ ແສງສຸວັນ ຊຸຍພະສິດ ຫົວໜ້າພະແນກຖະແຫຼງຂ່າວ,ວັດທະນະທຳແລະທ່ອງທ່ຽວແຂວງຈຳປາສັກໄດ້ກ່າວວ່າ: ໃນໄລຍະ 6 ເດືອນຕົນປີຜ່ານມາພະແນກ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແຂວງຈຳປາສັກ ໄດ້ສຸມໃສ່ ການຟື້ນຟູວຽກງານທ່ອງທ່ຽວເປັນຕົ້ນແມ່ນ ປັບປຸງບັນດາພື້ນຖານໂຄງລ່າງທີ່ຮັບໃຊ້ແກ່ການທ່ອງທ່ຽວ ແລະ ໂຄສະນາແຫຼ່ງທ່ອງທ່ຽວໃຫ້ມີຄວາມໜ້າສົນໃຈ ແລະ ໜ້າທ່ຽວຊົມ; ລົງເຄື່ອນໄຫວຊູກຍູ້ ປັບປຸງແຫຼ່ງທ່ອງທ່ຽວທີ່ເປັນທ່າແຮງສຳຄັນຂອງແຂວງ. ໄດ້ສຶບຕໍ່ຊຸກຍຸ້ການລົງທືນສ້າງສີ່ງຮອງຮັບດ້ານທີ່ພັກ, ດ້ານການສະຫນອງອາຫານ,ເຄື່ອງທີ່ລະນຶກ, ການທ່ອງທ່ຽວກະສິກຳ ແລະ ນຳໃຊ້ລົດໄຟຟ້າໃນເຂດດອນເດດ-ດອນຄອນ, ຊຸກຍູ້ຫົວໜ່ວຍທຸລະກິດໄດ້ດຳເນີນບໍລິການຫັນໄປສູ່ຄຸນນະພາບສາກົນຕາມ 7 ມາດຕະຖານອາຊຽນ, ໄດ້ລົງປະເມີນຄືນມາດຕະຖານໂຮງແຮມຂຽວອາຊຽນທີ່ໄດ້ຮັບລາງວັນຜ່ານມາຈຳນວນ 11 ຫົວໜ່ວຍ, ໃນຕົ້ນປີນີ້ແຂວງຈຳປາສັກ ໄດ້ຮັບລາງວັນມາດຕະຖານການທ່ອງທ່ຽວ 6 ລາງວັນ, ມີມາດຕະຖານເຮືອນພັກແຮມປະຊາຊົນອາຊຽນ 2 ລາງວັນ ບ້ານດອນແດງ ແລະ ບ້ານດອນໂຄ , ມາດຕະຖານການທ່ອງທ່ຽວແບບປະຊາຊົນມີສ່ວນຮ່ວມ 2 ລາງວັນ ມີແຫຼ່ງທ່ອງທ່ຽວຕາດເຍືອງ ແລະ ບ້ານໜອງຫຼວງ , ມາດຕະຖານຫ້ອງນ້ຳສາທາລະນະອາຊຽນ 2 ລາງວັນ ຢູ່ແຫຼ່ງທ່ອງທ່ຽວມໍລະດົກໂລກວັດພູຈຳປາສັກ ແລະ ແຫຼ່ງທ່ອງທ່ຽວນ້ຳຕົກຕາດຟານ , ຄຸ້ມຄອງຫົວໜ່ວຍທຸລະກິດນຳທ່ຽວ,ພະນັກງານນຳທ່ຽວ ແລະ ໄດ້ສຳເລັດການຝຶກອົບຮົມພະນັກງານນຳທ່ຽວລະດັບແຂວງ 1 ຄັ້ງ, ປະສານສົມທົມກັບຂະແໜງການກ່ຽວຂ້ອງໃນການລົງຕິດຕາມປະກົດການຫຍໍ່ທໍ້ໃນສະຖານທີ່ຮ້ານກິນດື່ມ-ບັນເທີງຢ່າງເປັນປົກກະຕິ ,ສ້າງທ່າແຮງດຶງດູດດ້ານການຕະຫຼາດ,ການຈັດກິດຈະກຳເພື່ອສົ່ງເສີມວັດທະນະທຳ ແລະ ບຸນປະເພນີຕ່າງໆໃຫ້ເປັນຂະບວນການຂອງສັງຄົມຢ່າງກວ້າງຂວາງ,ຊຸກຍູ້ການໂຄສະນາ,ປະຊາສຳພັນຈຸດເດັ່ນຂອງແຂວງໃຫ້ເປັນຈຸດໝາຍປາຍທາງການທ່ອງທ່ຽວຜ່ານສື່ສັງຄົມອອນລາຍໃຫ້ມີຫລາຍຮູບແບບເພື່ອດຶດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວແຂວງຈຳປາສັກໃຫ້ຫຼາຍກວ່າເກົ່າ.
ໄລຍະ 6 ເດືອນຕົ້ນປີຜ່ານມາ ແຂວງຈຳປາສັກ ມີນັກທ່ອງທ່ຽວເຂົ້າມາທ່ອງທ່ຽວທັງໝົດ: 143,689 ຄົນ ພາຍໃນ 11.455 ຄົນ, ນັກທ່ອງທ່ຽວຕາມຊາຍແດນ 28.566 ຄົນ, ນັກທ່ອງທ່ຽວສາກົນ 103.668,ຄົນ ສາມາດສ້າງລາຍຮັບໄດ້ 28.717.040 $. ທຽບໃສ່ແຜນປະຕິບັດໄດ້ 63%.
ທ່ານ ຫົວໜ້າພະແນກຖະແຫຼງຂ່າວ,ວັດທະນະທຳແລະທ່ອງທ່ຽວແຂວງຈຳປາສັກ ຍັງໄດ້ກ່າວດ້ວຍຄວາມເຊື່ອໝັ້ນວ່າ ກອງປະຊຸມປຶກສາຫາລືລະຫວ່າງ ຂະແໜງການພາກລັດ ແລະ ພາກທຸລະກິດ ເພື່ອແກ້ໄຂປະກົດການຫຍໍ້ທໍ້ໃນວຽກງານທ່ອງທ່ຽວ ແລະ ວິທີການໃນການດຶງດູດນັກທ່ອງທ່ຽວ ຄັ້ງນີ້ ຈະເປັນການປະກອບສ່ວນສໍາຄັນເຂົ້າໃນການຈັດຕັ້ງປະຕິບັດແຜນພັດທະນາການທ່ອງທ່ຽວໃຫ້ສາມາດດືງດູດນັກທ່ອງທ່ຽວນັບມື້ນັບຫຼາຍຂື້ນ.
ພ້ອມກັນນີ້ ຍັງໄດ້ພ້ອມກັນ ປະກອບຄໍາເຫັນໂດຍຫຍໍ້ໍໍ ໃນການ ແກ້ໄຂບັນຫາປະກົດການຫຍໍ້ທໍ້ ໃນຂົງເຂດທ່ອງທ່ຽວ ແລະ ວິທີການໃນການດຶງດູດນັກທ່ອງທ່ຽວ ເຂົ້າມາທ່ຽວແຂວງຈຳປາສັກໃຫ້ຫຼາຍຂຶ້ນກວ່າເກົ່າ.
ເກດສະໜາ ແກ້ວສຸວັນນະແສງ
