ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ແຂວງຈຳປາສັກ ຈັດພິທີສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ, ວັນເດັກນ້ອຍສາກົນ, ວັນສິ່ງແວດລ້ອມໂລກ ແລະວັນສິ່ງແວດລ້ອມແຫ່ງຊາດ
ໃນຕອນເຊົ້າ ວັນທີ 01 ມິຖຸນາ 2024 ແຂວງຈໍາປາສັກ ໄດ້ຈັດງານສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ, ວັນເດັກນ້ອຍສາກົນ (ທີ 1 ມິຖຸນາ ), ວັນສິ່ງແວດລ້ອມໂລກ ແລະວັນສິ່ງແວດລ້ອມແຫ່ງຊາດ ທີ (5 ມິຖຸນາ ) ໂດຍເປັນກຽດເຂົ້າຮ່ວມຂອງ ທ່ານ ກິແກ້ວ ໄຂຄໍາພິທູນ, ຮອງນາຍົກ ລັດຖະມົນຕີ ແຫ່ງ ສປປ ລາວ, ທ່ານ ອາລຸນໄຊ ສູນນະລາດ, ເຈົ້າແຂວງໆ ຈຳປາສັກ; ພ້ອມດ້ວຍບັນດາ ທ່ານການນໍາຈາກສູນກາງ, ການນໍາຂັ້ນແຂວງ, ພະແນກການ-ອົງການຈັດຕັ້ງມະຫາຊົນ, ການນໍາບັນດາເມືອງ- ນະຄອນ,ຫົວໜ່ວຍທຸລະກິດ,ພະນັກງານພະແນກການ,ກົມກອງອ້ອມຂ້າງແຂວງ, ຊາວໜຸ່ມ, ເຍົາວະຊົນ, ອະນຸຊົນເຂົ້າຮ່ວມຢ່າງຫຼວງຫຼາຍ.
ການຈັດງານຄັ້ງນີ້ ມີ 4 ກິດຈະກໍາ ຄື: ຍ່າງເພື່ອສຸຂະພາບ, ປ່ອຍປາ, ປູກຕົ້ນໄມ້ ແລະ ແຂ່ງຂັນກິລາກະຕໍ້, ສໍາລັບການຍ່າງເພື່ອສຸຂະພາບໄດ້ເລີ່ມຕົ້ນອອກຈາກ ສໍານັກງານຫ້ອງວ່າການແຂວງ ໄປຍັງຫໍຫຼັກເມືອງປາກເຊ ໄລຍະທາງ 800 ແມັດ, ຈາກນັ້ນ ທຳພິທີສັກກາລະບູຊາ ຫໍຫຼັກເມືອງ ແລະ ປ່ອຍປາລົງໃສ່ວັງສະຫງວນປາກນໍ້າເຊໂດນ ທີ່ທ່າວັດຫຼວງປາກເຊ (ວັງສະຫງວນຂອງແຂວງ), ແລ້ວສືບຕໍ່ຢ່າງເພື່ອສຸຂະພາບ ຈາກວັດຫຼວງປາກເຊ ມາຍັງສວນສາທາລະນະແຄມຂອງ ຊຶ່ງມີໄລະທາງ 1700 ແມັດ, ລວມ 2.500 ແມັດ, ເພື່ອຮ່ວມປູກຕົ້ນໄມ້ ລະຫວ່າງການນໍາສູນກາງ, ການນໍາຂອງແຂວງ, ພະແນກການ-ກົມກອງອ້ອມຂ້າງແຂວງ, ບັນດາເມືອງ, ນະຄອນປາກເຊ ແລະ ບັນທຸລະກິດຕ່າງໆ ຮ່ວມກັນ.
ທ່ານ ກິແກ້ວ ໄຂຄໍາພິທູນ, ຮອງນາຍົກ ລັດຖະມົນຕີ, ທ່ານ ອາລຸນໄຊ ສູນນະລາດ, ເຈົ້າແຂວງໆ ຈຳປາສັກ; ທ່ານ ນາງ ອາລີ ວົງໜໍ່ບຸນທໍາ, ປະທານ ສູນກາງສະຫະພັນແມ່ຍິງລາວ,ທ່ານ ດຣ ເພຍ ເຣເບລໂລ ບຣິດໂຕ, ຜູ້ຕາງໜ້າ ອົງການ ຢູນີເຊບ ປະຈຳ ສປປ ລາວ;ບັນດາແຂກທີ່ເຂົ້າຮ່ວມ ແລະ ຫຼານນ້ອຍເຍົາວະຊົນ ອະນຸຊົນ ກໍ່ໄດ້ຍ່າງເພື່ອສຸຂະພາບ,ຂາບໄຫວ້ຫໍຫຼັກເມືອງ,ປ່ອຍປາລົງວັງສະຫງວນທີ່ທ່າວັດຫຼວງປາກເຊ ແລະ ປູກຕົ້ນໄມ້ທີ່ສວນສາທາລະນະຢ່າງເປັນຂະບວນຟົດຟື້ນ. ເພື່ອປູກຈິດສຳນຶກ ແລະ ປຸກລະດົມທົ່ວສັງຄົມໃຫ້ຄວາມສຳຄັນ ແລະ ຮ່ວມກັນປູກ ແລະ ປົກປັກຮັກສາຕົ້ນໄມ້,ປ່າໄມ້ ແລະ ຮັກສາສະພາບແວດລ້ອມໃຫ້ເປັນຂະບວນຢ່າງກ້ວາງຂວາງ,ສືບຕໍ່ສ້າງທຸກເງື່ອນໄຂໃຫ້ແຂວງຈຳປາສັກໃຫ້ມີສະພາບແວດລ້ອມທີ່ດີ,ສີຂຽວ ແລະ ຍືນຍົງ,ມີຄວາມສະອາດ,ສວຍງາມ,ໜ້າຢູ່ ອາໄສ ແລະ ໜ້າທ່ຽວຊົມ ໄປຄຽງຄູ່ກັບການພັດທະນາຢ່າງຮອບດ້ານ.
ເກດສະໜາ ແກ້ວສຸວັນນະແສງ