ແຂວງຈຳປາສັກ ເຂັ້ມງວດຄຸ້ມຄອງທຸລະກິດຮ້ານອາຫານ ແລະ ຮ້ານບັນເທີງ

ພະແນກຖະແຫລ່ງຂ່າວ, ວັດ ທະນະທຳ ແລະ ທ່ອງທ່ຽວ ແຂວງຈຳປາສັກ (ຖວທ) ໄດ້ອອກແຈ້ງການ ໃຫ້ເຂັ້ມງວດໃນການ ຄຸ້ມຄອງການເຄື່ອນໄຫວ ຂອງຫົວໜ່ວຍທຸລະກິດຮ້ານອາຫານ ຂອງບຸກຄົນ,ນິຕິບຸກຄົນ ທັງພາຍໃນ ແລະ ຕ່າງປະເທດ ພາຍໃນແຂວງຈຳປາສັກ ທີ່ຂໍໃບອະນຸຍາດເຄື່ອນໄຫວດຳເນີນທຸລະກິດເປັນຮ້ານອາຫານ ແຕ່ລະເມີດ ເປີດເປັນຮ້ານກິນດື່ມບັນເທີງ ພ້ອມທັງບໍລິການກາຍໂມງເວລາທີ່ທາງການກຳນົດ ແລະ ສົ່ງສຽງເນືອງນັນເກີນລະບຽບການກຳນົດໄວ້ ຊຶ່ງເປັນປະກົດການຫຍໍ້ທໍ້ເກີດຂຶ້ນໃນສັງຄົມ.

ຕໍ່ເຫດຜົນດັ່ງກ່າວ, ໃນວັນທີ 23 ສິງຫາ 2024, ພະແນກ ຖວທ ແຂວງຈຳປາສັກ ຮ່ວມກັບເຈົ້າໜ້າທີ່ປກສ, ອາກອນ, ການຄ້າ ແລະ ຂະແໜງການກ່ຽວຂ້ອງ ຈາກນະຄອນ ແລະ ເມືອງ ປຶກສາຫາລື ເພື່ອແກ້ໄຂບັນຫາດັ່ງກ່າວຢ່າງຮີບດ່ວນ ພ້ອມທັງເຜີຍແຜ່ໃບແຈ້ງການ ກຽມລົງກວດກາ ພ້ອມທັງເຮັດບົດບັນທຶກກັບຮ້ານອາຫານທີ່ລະເມີດ ພ້ອມທັງແນະນຳ ໃຫ້ເປີດຖືກຕ້ອງຕາມການອະນຸຍາດຂອງແຂວງ ໂດຍການເປັນປະທານຂອງທ່ານ ວັນນະໄຊ ຊາດຕະກຸນ ຫົວໜ້າພະແນກ ຖວທ ແຂວງຈຳປາສັກ.

ສຳລັບເນື້ອໃນແຈ້ງການ ໄດ້ເນັ້ນໜັກ ແລະ ລະບຸຊັດເຈນວ່າ: ມອບໃຫ້ຫົວໜ້າຫ້ອງການ ຖວທ 1 ນະຄອນ ແລະ 9 ຕົວເມືອງ ສົມທົບການຂະແໜງການທີ່ກ່ຽວຂ້ອງ ລົງສ້າງບົດບັນທຶກຮ່ວມກັບເຈົ້າຂອງທຸລະກິດຮ້ານອາຫານທີ່ຕົນອອກໃບອະນຸຍາດເຄື່ອນໄຫວເຮັດບໍລິການຮ້ານອາຫານ-ເຄື່ອງດຶ່ມ ແລະ ເພີ່ມການບໍລິການ ໃຫ້ແຂກຮ້ອງເພງ-ລຳ (ຄາຣາໂອເກະ) ແລະ ບໍລິການຮ້ອງເພງ-ລຳ ແກ່ແຂກ (ໂຟກຊອງ) ເພື່ອໃຫ້ຢຸດເຊົາການບໍລິການໃນຮູບແບບດັ່ງກ່າວ, ແຕ່ຖ້າເຈົ້າຂອງທຸລະກິດຢາກສືບຕໍ່ດຳເນີນທຸລະກິດເພີ່ມ ໃນຮູບແບບບັນເທີງ ໃຫ້ແນະນຳເຈົ້າຂອງທຸລະກິດ ເຂົ້າມາຍື່ນຄຳຮ້ອງຂໍອະນຸຍາດການດຳເນີນທຸລະກິດບັນເທີງດ້ວຍຕົນເອງ ຢູ່ຫ້ອງການບໍລິ ການລົງທຶນປະຕູດຽວຂັ້ນແຂວງ ໂດຍກຳນົດສົ່ງບົດລາຍ ແລະ ບົດບັນທຶກຮ່ວມກັບເຈົ້າຂອງທຸລະກິດ ແກ່ພະແນກ ຖວທ ແຂວງໂດຍໄວ ໂດຍສະເພາະ ນະຄອນປາກເຊ, ຊຶ່ງເປັນນະຄອນທ່ອງທ່ຽວ ບໍ່ໃຫ້ເກີນວັນທີ 23 ສິງຫາ 2024.

ໂອກາດດຽງກັນ, ຄະນະດັ່ງກ່າວ ຍັງໄດ້ລົງກວດກາການເຄື່ອນ ໄຫວດຳເນີນທຸລະກິດ 2 ຮ້ານຄື: ຮ້ານ ເຢດ 99 ບາ ແລະ ຮ້ານ ໂຊບາ, ຊຶ່ງໃບທະບຽນອະນຸຍາດ ແມ່ນເປີດເປັນຮ້ານອາຫານ, ແຕ່ຕົວຈິງແມ່ນເປັນຮ້ານບັນເທີງ ຊຶ່ງຜິດກັບການອະນຸຍາດ ແລະ ໄດ້ເຮັດບົດບັນທຶກ ໃຫ້ເຈົ້າຂອງກິດຈະການ ໄປປະກອບເອກະສານອະນຸຍາດ ໃຫ້ຖືກຕ້ອງ.