ສະໂມສອນລົດຖີບ,ຮ່ວມກັບພະແນກຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ ( ຖວທ )ແຂວງຈໍາປາສັກຈັດກິດຈະກໍາຂີ່ລົດຖີບສົ່ງເສີມການທ່ອງທ່ຽວພາຍໃຕ້ຫົວ​ຂໍ້”ລາວທ່ຽວລາວ“ ຂຶ້ນໃນຕອນເຊົ້າວັນທີ 5 ທັນວາ 2020 .ໃຫ້ກຽດກ່າວເປີດງານໂດຍທ່ານ ໂສມ ບຸດຕະກູນ ຫົວໜ້າພະແນກ ຖະແຫຼງຂ່າວ,ວັດທະນະທໍາ ແລະ ທ່ອງ​ທ່ຽວ ແຂວງ,ມີທ່ານ ສຸລິນ ເພັດທານີ ຮອງຫົວໜ້າພະແນກ ຖະແຫຼງຂ່າວ,ວັດທະນະທໍາ ແລະ ທ່ອງທ່ຽວແຂວງ,ທ່ານ ຄໍາໝັ້ນ ແກ້ວວິໄລສັກ ປະທານສະໂມສອນລົດຖີບແຂວງຈໍາປາສັກ,ບັນດາ ຮອງປະທານ,ຄະນະ ແລະ ສະມາຊິກສະໂມສອນລົດຖີບແຂວງຈໍາປາສັກ ຈໍານວນ 70 ກ່ວາຄົນ ແລະມີນັກກິລາລົດຖີບຈາກສະຫະພັນກິລາລົດຖີບແຫ່ງ​ຊາດ,ຈາກນະຄອນຫຼວງ,ແຂວງຄໍາມ່ວນ,ສະຫວັນນະເຂດ ແລະອັດຕະປືເຂົ້າຮ່ວມເກືອບ 300 ຄົນ.
ທ່ານ ຄໍາໝັ້ນ ແກ້ວວິໄລສັກ ປະທານສະໂມສອນລົດ​ຖີບ​ແຂວງຈໍາປາສັກ ໄດ້ໃຫ້ສໍາພາດວ່າ:ຈຸດປະສົງໃນການຈັດກິດຈະກໍາໃນຄັ້ງນີ້ ນອກຈາກເພື່ອຊົມເຊີຍຜົນສໍາເລັດກອງປະຊຸມໃຫຍ່ອົງຄະນະພັກແຂວງຄັ້ງທີ VIII,ສະເຫຼີມສະຫຼອງວັນຊາດທີ 2 ທັນວາ ຄົບຮອບ 45 ປີ,ວັນເກີດປະທານ ໄກສອນ ພົມວິຫານ ຄົບຮອບ 100 ປີ ແລ້ວ ແມ່ນແນໃສ່ ສົ່ງເສີມການທອງທ່ຽວແບບລາວທ່ຽວລາວໃຫ້ມີການຂະຫຍາຍຕົວກ້ວາງຂວາງຫຼາຍຂຶ້ນ ໄປຄຽງຄູ່ກັນກັບການປຸກລະດົມທົ່ວສັງຄົມໃຫ້ຫັນມາສົນໃຈການຂີ່ລົດຖີບອອກກໍາລັງກາຍ ເພື່ອເຮັດໃຫ້ສຸຂະພາບເຂັ້ມແຂງ ແລະ ກ້າວໄປສູ່ການເປັນນັກກິລາ ເຂົ້າຮ່ວມລາຍການແຂ່ງຂັນຕ່າງໆໃນຕໍ່ໜ້າ.
ທ່ານ ຄໍາໝັ້ນ ແກ້ວວິໄລສັກ ກ່າວອີກວ່າ: ໃນການຂີ່ລົດຖີບລາວທ່ຽວລາວຢູ່ແຂວງຈໍາປາສັກ ໃນຄັ້ງນີ້,ເຖິິງຈະເປັນຄັ້ງທໍາອິດແຕ່ກໍໄດ້ຮັບການສະໜັບສະໜູນເປັນຢ່າງດີຈາກທາງພາກລັດໂດຍສະເພາະພະແນກ ຖວທ ແຂວງ ແລະບັນດາບໍລິສັດ ເອກະຊົນ,ນິຕິບຸກຄົນ ຕະຫຼອດຮອດນັກກິລາຜູ້ທີ່ຮັກມັກໃນການຂີ່ລົດຖີບ ອັນໄດ້ເຮັດໃຫ້ມີຜູ້ລົງທະບຽນເຂົ້າຮ່ວມເຖິງ 300 ກ່ວາຄົນ.
ກິດຈະກໍາຂີ່ລົດຖີບສົ່ງເສີມການທ່ອງທ່ຽວແບບລາວທ່ຽວລາວໃນຄັ້ງນີ້,ຫຼັງຈາກເປີດພິທີແລ້ວ ບັນດານັກຂີ່ລົດຖີບກໍໄດ້ປັ່ນລົດຖີບຈາກຈຸດເລີ່ມຕົ້ນແຕ່ ພະແນກ ຖວທ ແຂວງ(ຫຼັກ KM 3) ນະຄອນປາກເຊ ມຸ່ງໜ້າສູ່ເມືອງປາກຊ່ອງ,ເຂົ້າແວ່ຊົມທໍາມະຊາດຕາດຟານ,ຕາດຄູ່ ແລະ ຈະພົບປະສ້າງສັນ,ສະຫຼຸບກິດຈະກໍາຢູ່ທີ່ແຫຼ່ງທ່ອງທ່ຽວ ທີ່ນີ້ປາກຊ່ອງ ຫຼັກ 42 ເພື່ອສໍາພັດກັບທໍາມະຊາດ ແລະອາກາດໜາວເຢັນໜ້າພັກຜ່ອນແລະທ່ຽວຊົມ ອີກແຫ່ງໜຶ່ງຂອງເມືອງປາກຊ່ອງ ແຂວງຈໍາປາສັກ.
ເກດສະໜາ ແກ້ວສຸວັນນະແສງ
Loading...