ພະແນກກະສິກໍາ ແລະ ປ່າໄມ້ແຂວງ ຈໍາປາສັກ ໄດ້ຈັດງານຕະຫຼາດນັດຊື້-ຂາຍສິນຄ້າກະສິກໍາສະອາດ ເພື່ອຕ້ອນຮັບຊົມເຊີຍກອງປະຊຸມໃຫຍ່ອົງຄະນະພັກແຂວງຄັ້ງທີ VIII ໃນວັນທີ 27-31 ຕຸລາ 2020 ທີ່ຕະຫຼາດປ່ຽນຖ່ານສິນ​ຄ້າ(ຕະຫຼາດກາງຄືນ) ບ້ານໂພນສະອາດ ນະຄອນປາກເຊ ແຂວງຈໍາປາສັກ (ຂ້າງສະໜາມກິລາ ຫຼັກ 2 )
ທ່ານ ສົມລິດ ວິລະວົງ ຮອງຫົວໜ້າພະແນກກະສິກໍາ ແລະປ່າໄມ້ແຂວງ ໄດ້ກ່າວວ່າ: ພາຍໃນງານຕະຫຼາດນັດຄັ້ງນີ້ໄດ້ມີຜູ້ປະກອບການຫ້າງຮ້ານທີ່ເຮັດທຸລະກິດກ່ຽວກັບກະສິກໍາ ແລະ ປ່າໄມ້ ທັງພາກລັດ ແລະ ເອກະຊົນເຂົ້າຮ່ວມ 38 ຮ້ານ,ໃນນັ້ນຮ້ານພາກລັດ 6 ພາກສ່ວນ,ຜູ້ປະກອບການ 9 ພາກສ່ວນ,ກຸ່ມການຜະລິດ ແລະ ສະຫະກອນ 5 ພາກສ່ວນ,ຜູ້ຊື້ຂາຍຜັກທົ່ວໄປ 18 ພາກສ່ວນ.
ສິນຄ້າກະສິກໍາສະອາດທີ່ນໍາມາຊື້-ຂາຍຫຼາຍກວ່າໝູ່ ແມ່ນສິນຄ້າທີ່ມີຊື່ສຽງຂອງແຂວງເຊັ່ນ: ເຂົ້າສານ,ກາເຟ,ຊາ,ໝາກສະເວີ່,ຜັກຊູ,ໝາກນ໋ອດ,ໝາກກ້ຽງ,ເຜືອກ,ມັນດ້າງ,ມັນຕົ້ນ,ຂີງ,ຜັກກາດ,ຜັກສະຫຼັດ ແລະອື່ນໆ ທີ່ຊາວກະສິກອນ ແລະ ຜູ້ປະກອບການພາຍໃນແຂວງສາມາດຜະລິດໄດ້.
ຈຸດປະສົງຂອງການຈັດງານໃນຄັ້ງນີ້ ນອກຈາກເພື່ອຕ້ອນຮັບຊົມເຊີຍກອງປະຊຸມໃຫຍ່ອົງຄະນະພັກແຂວງຄັ້ງທີ VIII ແລ້ວ,ຍັງເປັນການສົ່ງເສີມການຜະລິດກະສິກໍາສະອາດ,ປອດສານພິດ ພາຍໃນແຂວງໃຫ້ມີຕະຫຼາດຈໍາໜ່າຍກ້ວາງຂວາງຫຼາຍຂື້ນ,ແນໃສ່ຕອບສະໜອງຕາມຄວາມຕ້ອງການບໍລິໂພກພາຍໃນ ແລະ ການສົ່ງອອກ, ສ້າງມູນຄ່າເພີ່ມແກ່ການຜະລິດ ດ້ວຍການປັບປຸງຄຸນນະພາບໃຫ້ດີຂື້ນເລື້ອຍໆ.
ໄປຄຽງຄູ່ກັບການຈັດງານຕະຫຼາດນັດ ຍັງຖືໂອກາດນີ້ໃຫ້ບັນດາບໍລິສັດເກັບຊື້-ສົ່ງອອກ ກັບຜູ້ປະກອບການການຜະລິດໄດ້ ຈັບຄູ່ເຊັນສັນຍາຊື້-ຂາຍຮ່ວມກັນອີກດ້ວຍ.
ໃຫ້ກຽດຮ່ວມພິທີເປີດງານຕະຫຼາດນັດໃນຄັ້ງນີ້,ມີທ່ານ ມະໄລທອງ ກົມມະສິດ ຮອງເຈົ້າແຂວງຈໍາປາສັກ,ທ່ານ ບົວລີ ເພັດສົງຄາມ ຫົວໜ້າພະແນກກະສິກໍາ ແລະປ່າໄມ້ແຂວງ ພ້ອມດ້ວຍຄະນະ,ການນໍາບັນດາເມືອງ,ນະຄອນປາກເຊ,ພະແນກການກົມກອງອ້ອມຂ້າງແຂວງ,ຜູ້ປະກອບການທຸລະກິດ,ຫົວໜ່ວຍການຜະລິດກະສິກໍາ-ປ່າໄມ້ ຕະລອດຮອດຊາວຄ້າຂາຍເຂົ້າຮ່ວມ.

ເກດສະໜາ ແກ້ວສຸວັນນະແສງ

Loading...