ວັນທີ 20 ສິງຫານີ້, ແຂວງຈໍາປາສັກ ໄດ້ຈັດພິທີປາຖະກະຖາເຜີຍແຜ່ເອກະສານ ສໍາຄັນຂອງຊາດ ແລະ ຂອງພັກ 4 ເອກະສານ ຄື: ເອກະສານວັນລັດຖະທຳມະນູນ ຄົບຮອບ 33 ປີ (15/8/1991- 15/8/2024), ວັນສ້າງຕັ້ງແນວລາວສ້າງຊາດ ຄົບຮອບ 74 ປີ, ວັນສ້າງຕັ້ງສື່ມວນຊົນ ຄົບຮອບ 74 ປີ (13/8/1950-13/8/2024), ວັນຢຶດອໍານາດ ຄົບຮອບ 79 ປີ ແລະ ຄົບຮອບ 49 ປີ (23/8/1975- 23/8/2024).
ພິທີຈັດຂຶ້ນ ທີ່ສະໂມສອນແຂວງ ຫຼັກ 4 ນະຄອນປາກເຊ ໂດຍການເປັນປະທານຮ່ວມຂອງ ສະຫາຍ ຄຳໄຫຼ ສີປະເສີດ ກຳມະການສູນກາງພັກ ຮອງປະທານ ຜູ້ປະຈຳ ການສູນກາງແນວລາວສ້າງຊາດ, ສະຫາຍ ອາລຸນໄຊ ສູນນະລາດ ກໍາມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ. ຕະຫຼອດຮອດພະນັກງານ – ລັດຖະກອນພາຍໃນແຂວງເຂົ້າຮ່ວມ 345 ຄົນ, ຍິງ 120 ຄົນ.
ໃນພິທີ ສະຫາຍ ຄຳໄຫຼ ສີປະເສີດ ໄດ້ໃຫ້ກຽດບັນລະຍາຍເອກະສານວັນສ້າງຕັ້ງແນວລາວ ສ້າງຊາດຄົບຮອບ 74 ປີ ຊຶ່ງໄດ້ຍົກໃຫ້ເຫັນເຖິງຂະບວນວິວັດ ແຫ່ງການກຳເນີດເຕີບໃຫຍ່ຂະຫຍາຍຕົວ ແລະ ຜົນງານອັນພົ້ນເດັ່ນ ໃນໄລຍະ ເປັນແນວລາວອິດສະຫຼະ ແລະ ຜົນງານດີເດັ່ນ ອົງການແນວລາວສ້າງຊາດ ໄດ້ເຕີບໃຫ່ຍຂະຫຍາຍຕົວທາງດ້ານການຈັດຕັ້ງ ແລະ ຮ່ວມກັບບັນດາອົງການຈັດຕັ້ງສັງຄົມ, ໄດ້ຍົກສູງບົດບາດໃນການເຕົ້າໂຮມກ້ອນກໍາລັງມະຫາສາມັກຄີປອງດອງທົ່ວປວງຊົນ. ຈາກນັ້ນ ທ່ານຍັງໄດ້ບັນລະຍາຍເອະສານວັນສື່ມວນຊົນ ແລະ ການພິມຈຳໜ່າຍ ຄົບຮອບ 74 ປີ ໂດຍຍົກໃຫ້ເຫັນພາລະບົດບາດ, ສິດ ແລະ ໜ້າທີ່ຂອງສື່ມວນຊົນ.
ນັບແຕ່ມື້ສ້າງຕັ້ງ ສື່ມວນຊົນກໍໄດ້ເຕີບໃຫຍ່ເຂັ້ມແຂງເປັນແຕ່ລະໄລຍະ, ຈາກການນໍາໃຊ້ເຄື່ອງມືອຸປະກອນແບບປະຖົມປະຖານ ກ້າວສູ່ຄວາມທັນສະໄໝ, ປັດຈຸ ບັນແຕ່ລະສື່ມວນຊົນ ກໍໄດ້ມີການພັດທະນາຕົນເອງຢ່າງວ່ອງໄວທັນຍຸກທັນເຫດ ການ; ຕໍ່ມາ, ສະຫາຍ ແກ້ວລັດຕະນະ ສີຫາວົງ ຄະນະປະຈຳພັກແຂວງ ຮອງປະທານສະພາປະຊາຊົນແຂວງ ກໍໄດ້ຜ່ານເອກະສານປະຫວັດມູນເຊື້ອ ວັນລັດຖະທຳມະນູນ ຄົບຮອບ 33 ປີ ຊຶ່ງຍົກໃຫ້ເຫັນ ເຖິງປະຫັວດຄວາມເປັນມາ ແລະ ຄວາມໝາຍສຳຄັນຂອງລັດຖະທຳມະນູນ ແຫ່ງ ສປປ ລາວ.
ຈາກນັ້ນ ສະຫາຍ ສະນັ່ນ ສີພາພົມມະຈັນ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ກໍໄດ້ບັນລະຍາຍເອກະສານມູນເຊື້ອວັນຍຶດອຳນາດທົ່ວປະເທດ ຄົບ ຮອບ 79 ປີ ແລະ 49 ປີ ຊຶ່ງແມ່ນເຫດການສໍາຄັນທາງປະຫວັດສາດແຫ່ງການຕໍ່ສູ້ຕ້ານລັດທິລ່າເມືອງຂຶ້ນແບບເກົ່າ, ການຕໍ່ສູ້ມີໄຊຂອງປະຊາຊົນລາວພາຍໃຕ້ການນຳພາຂອງພັກ,ເສີມຂະຫຍາຍມູນເຊື້ອສາມັກຄີຕໍ່ສູ້ພິລະອາດ ຫານຂອງຊາດລາວ-ຄົນລາວວິລະຊົນ, ການເຊີດຊູມານະຈິດປະຕິວັດ ແລະ ນ້ຳໃຈຮັກຊາດອັນສູງສົ່ງຂອງຄົນລາວ ເພື່ອສ້າງຜົນງານ ແລະ ຍາດເອົາໄຊຊະນະໃໝ່ໃຫຍ່ຫຼວງກວ່າເກົ່າຢ່າງບໍ່ຢຸດຢັ້ງ.
ໃນວັນດຽວກັນ, ສະຫາຍ ອາລຸນໄຊ ສູນນະລາດ ຍັງໄດ້ນຳພາຄະນະພັກ-ຄະນະນຳ, ແນວລາວສ້າງຊາດແຂວງ, ອົງການຈັດຕັ້ງມະຫາຊົນ, ປກຊ-ປກສ, ຕົວແທນຊາວໜຸ່ມ, ເຍົາວະຊົນ, ອະນະຊົນ ເຂົ້າວາງພວງມາລາ, ກະຕ່າດອກໄມ້ ຢູ່ອະນຸສາວະລີນັກຮົບນິລະນາມ ແລະ ອະນຸສອນສະຖານປະທານ ໄກສອນ ພົມວິຫານ ຢູ່ສະໜາມແດງ ນະຄອນປາກເຊ ຕື່ມອີກ.
(ຂ່າວ-ພາບ: ນັກຂ່າວໂຄສະນາອົບຮົມແຂວງ+ຫ້ອງວ່າການແຂວງ)
