ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ແຂວງຊຽງຂວາງ ສປປ ລາວ ແລະ ກອງບັນຊາການທະຫານເຂດ 4 ສສ ຫວຽດນາມ ຮ່ວມລົງນາມເຊັນບົດບັນທຶກ ກວດກາໂຄງການກໍ່ສ້າງ ໂຮງຮຽນພອນສະຫວັນ ທີ່ແຂວງຊຽງຂວາງ

ພິທີເຊັນບົດບັນທຶກກວດກາໂຄງການກໍ່ສ້າງໂຮງຮຽນພອນສະຫວັນຢູ່ເຂດເທດສະບານໂພນສະຫວັນ ແຂວງຊຽງຂວາງ ສໍາເລັດ 100% ລະຫວ່າງແຂວງຊຽງຂວາງ ສາທາລະນະລັດ ປະຊາທິປະໄຕ ປະຊາຊົນລາວ (ສປປ ລາວ) ແລະ ກອງບັນຊາການທະຫານເຂດ 4 ສາທາລະນະລັດ ສັງຄົມນິຍົມຫວຽດນາມ (ສສ ຫວຽດນາມ) ມີຂຶ້ນໃນຕອນບ່າຍຂອງວັນທີ 10 ມີນາ 2020 ນີ້ ທີ່ໂຮງຮຽນພອນສະຫວັນ ແຂວງຊຽງຂວາງ, ຕາງໜ້າເຂົ້າຮ່ວມຝ່າຍລາວ ໂດຍແມ່ນທ່ານ ບົວສອນ ສີນວນທອງ ຮອງເຈົ້າແຂວງຊຽງຂວາງ ພ້ອມຄະນະ, ຕາງໜ້າຝ່າຍ ສສ ຫວຽດນາມ ໂດຍແມ່ນທ່ານ ພັ.ອ ພິເສດ ຫງວຽນ ຫວຽດ ອ່ຽນ ຫົວໜ້າພະແນກເສດຖະກິດ ທະຫານເຂດ 4/ກອງທັບປະຊາຊົນຫວຽດນາມ ພ້ອມຄະນະ ແລະ ພາກສ່ວນທີ່ກ່ຽວຂ້ອງທັງສອງຝ່າຍ.
ໂຄງການກໍ່ສ້າງໂຮງຮຽນພອນສະຫວັນ ຢູ່ເທດສະບານໂພນສະຫວັນ ແຂວງຊຽງຂວາງ ສປປ ລາວ ໂດຍແມ່ນທຶນຊ່ວຍເຫຼືອລ້າຂອງລັດຖະບານ ສສ ຫວຽດນາມດ້ວຍມູນຄ່າ 134,767,069,000 ດົງ(ໜຶ່ງຮ້ອຍ ສາມສິບສີ່ຕື້ ກ່ວາດົງ), ນອກນັ້ນຍັງມີທຶນສົມທົບຂອງລັດຖະບານລາວ 2,713,017,000 ດົງ(ສອງຕື້ກ່ວາດົງ), ເຊິ່ງໄດ້ເລີ່ມລົງມືກໍ່ສ້າງມາແຕ່ວັນທີ 03 ກັນຍາ 2018 ໂດຍແມ່ນກຸ່ມບໍລິສັດຮ່ວມມືເສດຖະກິດຫວຽດນາມເປັນຜູ້ຮັບເໝົາກໍ່ສ້າງ ແລະ ໄດ້ວາງຄາດໝາຍສັນຍາເບື້ອງຕົ້ນຈະໃຫ້ສໍາເລັດການກໍ່ສ້າງໃນວັນທີ 24 ກຸມພາ 2021, ຜ່ານການດຳເນີນການກໍ່ສ້າງຕົວຈິງເຫັນວ່າສໍາເລັດກ່ອນສັນຍາ 11 ເດືອນ. ໂຮງ ຮຽນແຫ່ງດັ່ງກ່າວນີ້ປະກອບດ້ວຍຕຶກອາຄານຮຽນ 2 ຫຼັງ 2 ຊັ້ນ, ຕຶກບໍລິຫານ-ຄະນະອໍານວຍການ-ຫ້ອງອ່ານ-ສະໂມສອນ ຊັ້ນດຽວ 1 ຫຼັງ, ຕຶກເຮືອນຄົວ-ຫ້ອງອາຫານ 1 ຫຼັງ 2 ຊັ້ນ, ຕຶກຫໍພັກ 1 ຫຼັງ 4 ຊັ້ນ ແລະ ຕຶກສະໂມສອນອອກກໍາລັງກາຍ ຊັ້ນດຽວ 1 ຫຼັງ, ແຕ່ລະຕຶກກໍ່ດ້ວຍເບຕົ່ງເສີມເຫຼັກ ມຸງດ້ວຍກະເບື້ອງທີ່ໄດ້ມາດຕະຖານ ປະກອບດ້ວຍອຸປະກອນ ໄຟຟ້າ, ນໍ້າປະປາ, ໂຕະ, ຕັ່ງ, ຕູ້, ກະດານ ຄົບຊຸດ, ພ້ອມນັ້ນ ຍັງໄດ້ຕິດຕັ້ງລະບົບເຕືອນໄພ ແລະ ລະບົບປ້ອງກັນອັກຄີໄພຢູ່ແຕ່ລະຈຸດຢ່າງແໜ້ນໜາ ເພື່ອຄວາມຮັບປະກັນເວລາທີ່ມີອຸທົກກະໄພເກີດຂຶ້ນ, ນອກນັ້ນບັນດາພື້ນຖານໂຄງລ່າງພາຍນອກເຊັ່ນວ່າ: ປະຕູ, ປ້ອມຍາມ, ຮົ້ວກໍາແພງ, ບ່ອນຈອດລົດ, ໂປ໋ມດູດນໍ້າຂຶ້ນຫາອ່າງເກັບນໍ້າ, ໝໍ້ແປງໄຟ, ຫ້ອງນໍ້າລວມ, ລະບຽງຕໍ່ລະຫວ່າງບັນດາຕຶກແມ່ນໄດ້ກໍ່ສ້າງ ແລະ ຕິດຕັ້ງສໍາເລັດ, ສ່ວນການປະດັບປະດາເດີ່ນທາງໜ້າແຕ່ລະຕຶກໄດ້ມິີການປູກຫຍ້າ, ປູກດອກໄມ້ ແລະ ປູກຕົ້ນໄມ້ເປັນທີ່ຮຽບຮ້ອຍ, ມາຮອດປະຈຸບັນໂຄງການກໍ່ສ້າງໂຮງຮຽນພອນສະຫວັນແຂວງຊຽງຂວາງແມ່ນສໍາເລັດ 100% ໃນພາກສະໜາມແລະ ໄດ້ຕາມມາດຕະຖານການອອກແບບທຸກຂັ້ນຕອນ ສາມາດນໍາໃຊ້ໄດ້, ດັ່ງນັ້ນຄະນະຜູ້ແທນທັງສອງຝ່າຍຈິ່ງໄດ້ລົງນາມເຊັນບົດບັນທຶກຮ່ວມກັນໃນການກວດກາໂຄງການກໍ່ສ້າງໂຮງຮຽນພອນສະຫວັນທີ່ແຂວງຊຽງຂວາງຄັ້ງນີ້ ເພື່ອເປັນຂໍ້ມູນອ້ງອີງໃຫ້ແກ່ຄະນະນໍາສອງປະເທດທີ່ຈະເປີດພິທີມອບ-ຮັບເປັນທາງການໃນຂັ້ນຕອນຕໍ່ໄປ.

 

 

 

 

 

 

ໂອກາດນີ້ທ່ານ ບົວສອນ ສີນວນທອງ ຮອງເຈົ້າແຂວງຊຽງຂວາງ ແລະ ທ່ານ ພັ.ອ ພິເສດ ຫງວຽນ ຫວຽດ ອ່ຽນ ຫົວໜ້າພະແນກເສດຖະກິດ ທະຫານເຂດ 4 ສສ ຫວຽດນາມ ໄດ້ພັດປ່ຽນກັນຂຶ້ນມີຄໍາຄິດຄໍາເຫັນ ໃນຄໍາຄິດຄໍາເຫັນທັງສອງທ່ານລ້ວນແລ້ວແຕ່ໄດ້ມຸ່ງເນັ້ນເຖິງມູນເຊື້ອຄວາມສາມັກຄີອັນພິເສດລະຫວ່າງລາວ-ຫວຽດນາມສອງປະເທດອ້າຍນ້ອງທີ່ເຄີຍມີມາແຕ່ດຶກກໍາບັນ ແລະ ຈະພ້ອມກັນສືບຕໍ່ເພີ່ມພູນຄູນສ້າງໃຫ້ເຕີບໃຫຍ່ເຂັ້ມແຂງຂຶ້ນເລື້ອຍໆ ການກໍ່ສ້າງໂຮງຮຽນພອນສະຫວັນຫຼັງດັ່ງ ກ່າວນີ້ ເປັນຂອງຂັວນອັນພິເສດຂອງລັດຖະບານຫວຽດນາມມອບໃຫ້ລັດຖະບານລາວ ໂດຍສະເພາະແຂວງຊຽງຂວາງ ເພື່ອນໍາໃຊ້ເຂົ້າໃນການກໍ່ສ້າງຊັບພະຍາກອນມະນຸດໃຫ້ມີຄຸນນະພາບ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຖາວອນ.

ຂ່າວຈາກ: ຄານສີສະຫວັນ)