ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ແຂວງບໍລິຄຳໄຊ ຈັດສົ່ງອັດຖິທະຫານອາສາສະໝັກ ຫວຽດນາມກັບຄືນປະເທດ ຢ່າງສົມກຽດ

ພິທີເຊັນບົດບັນທຶກມອບ-ຮັບ ອັດຖິທະຫານອາສາສະໝັກ ແລະ ຊ່ຽວຊານ ຫວຽດນາມ ທີ່ເສຍສະຫລະຊີວິດໃນປາງສົງຄາມຢູ່ ສປປ ລາວ ກັບຄືນສູ່ປະເທດ ໄດ້ຈັດຂຶ້ນໃນວັນທີ 17 ພຶດສະພາ 2017 ທີ່ສະໂມສອນແຂວງບໍລິຄຳໄຊ, ໃຫ້ກຽດເຂົ້າຮ່ວມໃນພິທີດັ່ງກ່າວໂດຍທ່ານ ກອງແກ້ວ ໄຊສົງຄາມ ເລ ຂາພັກແຂວງ ເຈົ້າແຂວງບໍລິຄຳໄຊ, ທ່ານ ແດນປີ ມູນທະດີ ຮອງເລຂາພັກແຂວງ ຫົວໜ້າ ຄະນະຈັດຕັ້ງແຂວງ ຫົວໜ້າຄະນະປະຕິບັດງານພິເສດ ແຂວງບໍລິຄຳໄຊ, ທ່ານ ດັ້ງກວັກວິງ ຄະນະປະຈຳພັກແຂວງ ຮອງປະທານຄະນະ ກຳມະການປະຊາຊົນແຂວງຮ່າຕິ່ງ ຫົວໜ້າຄະນະປະຕິບັດງານ ແຂວງຮ່າຕິ່ງ, ມີການນຳພັກ-ລັດ, ພະນັກງານ, ທະຫານ, ຕຳຫລວດຈາກ ແຂວງບໍລິຄຳໄຊ ແລະ ແຂວງຮ່າຕິ່ງເຂົ້າຮ່ວມ.


ອັດຖິທີ່ມອບ-ຮັບໃນຄັ້ງນີ້ ແມ່ນອັດຖິ ທີ່ຂຸດຄົ້ນໄດ້ໃນປີ 2017 ຢູ່ບັນດາເມືອງ ໃນແຂວງບໍລິຄຳໄຊ ລວມມີຈຳນວນ 12 ຮ່າງ
​ເຊິ່ງຄະນະນຳທັງສອງແຂວງ ໄດ້ຮ່ວມກັນຈັດພິທີວາງພວງມາລາ ໄຫວ້ອາໄລເຖິງ ດວງວິນຍານຂອງ ທະຫານອາສາສະຫມັກ ແລະ ຊ່ຽວຊານຫວຽດນາມ ເຫລົ່ານັ້ນຢ່າງສົມກຽດ, ພ້ອມ​ນັ້ນຄະນະພັກ ຄະນະປົກຄອງແຂວງບໍລິຄຳໄຊ ແລະ ແຂວງຮ່າຕິ່ງ ພ້ອມ​ຄະນະ​ນຳໃນ ແຂວງບໍລິຄຳໄຊ ເຂົ້າຮ່ວມ, ພ້ອມທັງຈັດພິທີທາງສາດສະໜາ ແລະ ຄົບງັນຕາມວັດທະນະທຳ, ຮີດຄອງປະເພນີອັນດີງາມ ຂອງທັງສອງຊາດລາວ-ຫວຽດນາມ.

ໃນຕອນເຊົ້າຂອງວັນທີ 18 ພຶດສະພາ ແຂວງບໍລິຄຳໄຊ ກໍໄດ້ນຳສົ່ງອັດຖິຈຳນວນດັ່ງກ່າວ ກັບຄືນປະເທດຢ່າງສົມກຽດ, ນຳຂະບວນໂດຍທ່ານ ປອ ກອງແກ້ວ ໄຊສົງຄາມ ເລຂາພັກແຂວງ ເຈົ້າແຂວງ ບໍລິຄຳໄຊ, ໂດຍມີມວນຊົນຊາວ ແຂວງບໍລິຄຳໄຊ ຫລາຍພັນຄົນ ໄດ້ເຂົ້າຮ່ວມສົ່ງຂະບວນແຫ່ອັດຖິ ກັບຄືນປະເທດດ້ວຍ ຄວາມອາໄລອາວອນ.

ຂ່າວຈາກ:ຂປລ