ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ແຂວງບໍລິຄໍາໄຊກຽມຈັດ 3 ກິດຈະກໍາໃຫ່ຍ ໃນໂອກາດບຸນອອກພັນສາປະວໍລະນາ

ແຂວງບໍລິຄໍາໄຊ ກຽມຈັດ 3 ກິດຈະກໍາໃຫ່ຍ ໃນໂອກາດບຸນອອກພັນສາ ປຣະວໍລະນາລະຫວ່າງວັນທີ 23 ຫາ 24ຕຸລາ 2018 ເພື່ອປະກອບສ່ວນດຶງດູດນັກທ່ອງທ່ຽວທັງພາຍໃນແລະຕ່າງປະເທດ ເຂົ້າໄປທ່ອງທ່ຽວພາຍໃນແຂວງໃຫ້ນັບມື້ນັບເພີ່ມຂຶ້ນ.

ທ່ານເຄນ ລໍມະນີ ຫົວໜ້າພະແນກຖະແຫລງຂ່າວວັດທະນະທໍາແລະທ່ອງທ່ຽວແຂວງບໍລິ ຄໍາໄຊ ໃຫ້ສໍາພາດວ່າ 3ກິດຈະກໍາໃຫ່ຍທີ່ຈະຈັດຂຶ້ນ ລວມມີ ຈັດຊ່ວງເຮືອມິດຕະພາບ 3ປະເທດ ລາວ, ໄທແລະຫວຽດນາມ, ຈັດວຽນທຽນໃຫ່ຍອ້ອມພະທາດພະບາດໂພນສັນ ແລະຊົມບັ້ງໄຟພະຍານາກ .ສະເພາະກິດຈະກໍາຊົມບັ້ງໄຟພະຍານາກ ຈັດຢູ່ 4ຈຸດຂອງເມືອງທ່າພະບາດ ຄືຈຸດໂພນສັນ, ຈຸດທ່າແປ້ນແລະເຂດໃກ້ຄຽງ.

ຫົວໜ້າພະແນກຖະແຫລງຂ່າວວັດທະນະທໍາແລະທ່ອງທ່ຽວແຂວງບໍລິຄໍາໄຊ ໃຫ້ຮູ້ຕື່ມວ່າ ໂອກາດປີທ່ອງທ່ຽວລາວ 2018 ແຂວງບໍລິຄໍາໄຊ ວາງຄາດໝາຍດຶງດູດນັກທ່ອງທ່ຽວທັງພາຍໃນແລະຕ່າງປະເທດ ບໍ່ໃຫ້ຫລຸດ 3ແສນຄົນ ປະຈຸບັນສາມາດດຶງດູດໄດ້ແລ້ວ 2ແສນກວ່າຄົນ, ປີນີ້ເປັນຄັ້ງທໍາອິດທີ່ແຂວງບໍລິຄໍາໄຊ ຈັດ 3ກິດຈະກໍາໃຫ່ຍກວ່າທຸກຄັ້ງທີ່ເຄີຍຈັດມາ ເພື່ອສ້າງຄວາມປະທັບໃຈໃຫ້ນັກທ່ອງທ່ຽວທີ່ເຂົ້າໄປຮ່ວມງານ. ປະຈຸບັນພາກສ່ວນກ່ຽວຂ້ອງພວມກະກຽມສະຖານທີ່ຕ່າງໆເພື່ອອໍານວຍຄວາມສະດວກໃຫ້ຜູ້ຈະເຂົ້າຮ່ວມງານໃນຄັ້ງນີ້.