ອັດຕາເຂົ້າຮຽນຂອງນັກຮຽນສາຍສາມັນສຶກສາຢູ່ພາຍໃນແຂວງບໍລິຄໍາໄຊ ໃນສົກຮຽນ 2024-2025 ນີ້ ມີທ່າອ່ຽງຫລຸດ ລົງ ເມື່ອທຽບໃສ່ສົກຮຽນ 2023-2024 ຜ່ານມາ. ແຕ່ທົ່ວແຂວງຍັງມີຄວາມຕ້ອງການຄູສອນເຖີງ 413 ຄົນ.
ທ່ານ ໂພເພັດ ກຸນນາວົງ ຮອງຫົວໜ້າພະແນກສຶກສາທິ ການ ແລະ ກິລາ ແຂວງບໍລິຄຳໄຊ ໃຫ້ສໍາພາດຕໍ່ນັກຂ່າວວິທະຍຸກະຈາຍສຽງແຫ່ງຊາດລາວ ໃນວັນທີ 2 ກັນຍາ 2024 ວ່າ: ອີງຕາມສະຖິ ຕິເບື້ອງຕົ້ນທີ່ນັກຮຽນທົ່ວແຂວງ ມາລົງທະບຽນຮຽນໃນສົກຮຽນ 2024-2025. ຊັ້ນອະນຸບານ ມີ 8,900 ກວ່າຄົນ, ປະຖົມ 38,100 ກວ່າຄົນ ແລະ ມັດທະຍົມ 23,500 ກວ່າຄົນ. ເຖີງວ່າພາຍຫລັງເປີດຮຽນປົກກະຕິ ອາດຈະມີນັກຮຽນມາລົງທະບຽນຮຽນເພີ່ມອີກ, ແຕ່ໂດຍລວມເຫັນວ່າຈໍານວນນັກຮຽນໃນແຕ່ລະຊັ້ນມີທ່າອ່ຽງຫລຸດລົງຫລາຍສົມຄວນເມື່ອທຽບໃສ່ສົກຮຽນຜ່ານມາ. ສ່ວນການຈັດຕັ້ງປະຕິບັດແຜນພັດທະນາຂະແໜງການສຶກສາ ແລະ ກິລາ ຂອງແຂວງໃນສົກຮຽນ 2023-2024 ຜ່ານ ມາ, ໃນຈໍານວນ 14 ຄາດໝາຍທີ່ກໍາົນດໄວ້, ມີ 6 ຄາດໝາຍ ສາມາດບັນລຸໄດ້ຕາມແຜນ, 1 ຄາດໝາຍທີ່ມີຄວາມກ້າວໜ້າແຕ່ບໍ່ສາມາດບັນລຸ ແລະ 7 ຄາດໝາຍ ຍັງເປັນສິ່ງທ້າທາຍ (ໜຶ່ງໃນນັ້ນແມ່ນບັນຫາອັດ ຕາການປະລະການຮຽນຂອງນັກຮຽນເພີ່ມ ຂຶ້ນ ແລະ ນັກຮຽນບໍ່ຢາກຮຽນຕໍ່ ເຊັ່ນ: ຮຽນຈົບປະຖົມແລ້ວບໍ່ ຢາກຮຽນຕໍ່ຊັ້ນ ມ1 ແລະ ຮຽນຈົບຊັ້ນ ມ3 ແລ້ວບໍ່ຢາກຮຽນຕໍ່ຊັ້ນ ມ4).
ຮອງຫົວໜ້າພະແນກສຶກສາທິການ-ກິລາ ແຂວງບໍລິຄຳໄຊ ໃຫ້ຮູ້ຕື່່ມວ່າ: ປັດຈຸ ບັນ, ທົ່ວແຂວງບໍລິຄໍາໄຊ ມີໂຮງຮຽນປະຖົມ 319 ແຫ່ງ, ມັດທະຍົມຕົ້ນ 28 ແຫ່ງ, ມັດທະຍົມຕອນປາຍ 2 ແຫ່ງ ແລະ ມັດທະຍົມສົມບູນ 24 ແຫ່ງ, ມີພະນັກງານໃນຂົງເຂດສຶກສາທັງໝົດ 3,200 ກວ່າຄົນ, ເປັນຄູສອນ 2.909 ຄົນ, ພະນັກງານບໍລິ ຫານ 366 ຄົນ, ຄູອາສາສະໝັກ 100 ກວ່າຄົນ. ເຖີງວ່າຈໍານວນນັກຮຽນຫລຸດລົງ ແຕ່ຕາມການປະເມີນແລ້ວທົ່ວແຂວງຍັງຕ້ອງ ການຄູສອນເພີ່ມຕື່ມ 413 ຄົນ ເພື່ອໃຫ້ພຽງພໍກັບຄວາມຕ້ອງການ. ໃນນີ້ ຊັ້ນອະນຸບານ ຕ້ອງການ 30 ຄົນ, ປະຖົມ 85 ຄົນ ແລະ ມັດທະຍົມ 298 ຄົນ.
