ປັດຈຸບັນ, ແຂວງບໍລິຄໍາໄຊ ໄດ້ປະກາດເປັນສິນຄ້າໜຶ່ງເມືອງໜຶ່ງຜະ ລິດຕະພັນ ຫລື ODOP ໃນທົ່ວແຂວງແລ້ວ 18 ຫົວໜ່ວຍ, ໃນນີ້ ທີ່ໄດ້ຮັບກາໝາຍ ODOP ແຫ່ງຊາດຮຽບຮ້ອຍແລ້ວມີ 11 ຫົວໜ່ວຍ. ສ່ວນອີກ 7 ຫົວໜ່ວຍທີ່ເຫລືອຄາດວ່າຈະໄດ້ຮັບກາໝາຍ ODOP ແຫ່ງຊາດໃນອີກບໍ່ດົນນີ້.
11 ຫົວໜ່ວຍທີ່ໄດ້ຮັບກາໝາຍ ODOP ແຫ່ງຊາດ ແມ່ນສິນຄ້າຈາກ 5 ເມືອງ ຄື: ເມືອງທ່າພະບາດ ມີ 3 ສິນຄ້າ ຄື: ຕໍ່າແຜ່ນແພບ້ານໄຊສະ ຫວາດ, ກຸ່ມຈັກສານໄມ້ປ່ອງນາເຂົ້າພະ ແລະ ຢາພື້ນເມືອງການພູເຂົາຄວາຍ. ເມືອງປາກຊັນ ມີ 3 ສິນຄ້າ ຄື: ແກະສະຫລັກ ແລະ ຄວັດໂຖດອກໄມ້ທານີນ, ສະມຸນໄພເທບລິມິດ ແລະ ເຮືອນລໍມະນີ. ເມືອງບໍລິຄັນ ມີ 2 ສິນຄ້າ ຄື: ຕໍ່າຫູກທໍໃໝບ້ານຫາດດອນຄູນ ແລະ ນໍ້າອ້ອຍກ້ອນຍ້ານຊົມຊື່ນ. ເມືອງຄໍາເກີດ 2 ສິນຄ້າ ຄື: ຕໍ່າແຜ່ນຜ້າລາວເດີມ( ສີທໍາມະຊາດ ) ແລະ ກຸ່ມຫວາຍທູນ ແລະ ໄມ້ປ່ອງທ່າແວ່ງ ແລະ ເມືອງປາກກະດິງ ມີ 1 ສິນຄ້າ ຄື: ຕໍ່າຫູກເຜົ່າເມີ້ຍລາຍປະຍຸກ.
ສ່ວນອີກ 7 ຫົວໜ່ວຍທີ່ປະກາດເປັນສິນຄ້າໜຶ່ງເມືອງໜຶ່ງຜະລິດຕະ ພັນ ແຕ່ຍັງບໍ່ທັນໄດ້ກາໝາຍ ODOP ແຫ່ງຊາດ ມີຢູ່ 3 ເມືອງ ຄື: ເມືອງທ່າພະບາດ ມີ 5 ສິນຄ້າ ຄື: ຈັກສານປ່າໄລ່, ສາດຜືກຸດຟ້າແມບ, ປາແຫ້ວນໍ້າໂລ້, ແປຮູບຜະລິດຕະພັນກະສິກໍານາຄໍາ ແລະ ເຫລົ້າຂາວບ້ານທວຍ. ເມືອງວຽງທອງ ມີ 1 ສິນຄ້າ ຄື: ຕໍ່າແຜ່ນແພນໍ້າກ້າງ ແລະ ເມືອງປາກຊັນ ມີ 1 ສິນຄ້າ ຄື: ຈັກສານປັດຊຸມ.
ທ່ານ ໄກສອນ ຈັນສີນາ ຫົວໜ້າພະແນກອຸດສາຫະກໍາ ແລະ ການຄ້າແຂວງບໍລິຄໍາໄຊ ໃຫ້ຮູ້ວ່າ: ອົງການປົກຄອງແຂວງບໍລິຄໍາໄຊ ໃຫ້ຄວາມສໍາຄັນຢ່າງຕໍ່ເນື່ອງຕໍ່ການຊຸກຍູ້ສົ່ງເສີມການສ້າງສິນຄ້າ ODOP ພ້ອມທັງໄດ້ມອບງົບປະມານຈໍານວນໜຶ່ງເພື່ອຊຸກຍູ້ສົ່ງເສີມວຽກງານດັ່ງກ່າວ ໂດຍແມ່ນພະແນກອຸດສາຫະກໍາ ແລະ ການຄ້າແຂວງເປັນເຈົ້າການຈັດຕັ້ງປະຕິບັດຮ່ວມກັບພາກສ່ວນກ່ຽວຂ້ອງຂອງແຂວງ ເພື່ອແນໃສ່ຊຸກຍູ້ສົ່ງ ເສີມການຜະລິດ ແລະ ການຈໍາໜ່າຍສິນຄ້າຢູ່ແຕ່ລະທ້ອງຖິ່ນໃຫ້ເປັນຂະ ບວນກວ້າງຂວາງ ເຮັດໃຫ້ສ້າງລາຍຮັບໃຫ້ຂອງປະຊາຊົນນັບມື້ເພີ່ມຂຶ້ນ. ໃນນີ້ ນອກຈາກ ໄດ້ແຕ່ງຕັ້ງຄະນະວິຊາການທີ່ກ່ຽວຂ້ອງລົງຊຸກຍູ້ສົ່ງເສີມການສ້າງສິນຄ້າ ODOP ຢູ່ແຕ່ລະເມືອງ ຍັງໄດ້ເອົາໃຈໃສ່ໃນການຊອກຫາຕະຫລາດຈຳໜ່າຍສິນຄ້າໃຫ້ປະຊາຊົນ ໂດຍສະເພາະການສົ່ງເສີມໃຫ້ເຂົ້າງານຕະຫລາດນັດໃນໂອກາດສໍາຄັນຕ່າງໆ ທັງຢູ່ພາຍໃນແຂວງ, ຕ່າງແຂວງ, ລວມເຖີງຢູ່ຕ່າງປະເທດ ໂດຍສະເພາະກ່ອນເກີດການລະບາດຂອງພະຍາດໂຄວິດ-19 ເຫັນວ່າສິນຄ້າ ODOP ຂອງແຂວງບໍລິຄໍາໄຊ ໄດ້ຮັບຄວາມສົນໃຈຈາກຜູ້ບໍລິໂພກດີສົມຄວນ.
ຂ່າວ: ບຸນຕຽງ ຈັນທະວົງ
Loading...