ປີນີ້ແຂວງບໍ່ແກ້ວ ຖືກຈັດເປັນລໍາດັບທີ 17 ໃນຈໍານວນ 18 ແຂວງທົ່ວປະເທດທີ່ສູນວິເຄາະລະ ບາດວິທະຍາ ກະຊວງສາທາລະນະສຸກປະເມີນວ່າມີຈໍານວນຜູ້ເປັນພະຍາດໄຂ້ຍຸງລາຍໜ້ອຍ ໂດຍກວດພົບຜູ້ເປັນໄຂ້ຍຸງລາຍທັງໝົດ 94 ກໍລະນີ ນັບແຕ່ຕົ້ນເດືອນມິຖຸນາຫາເດືອນຕຸລານີ້ ແລະຍັງບໍ່ມີລາຍງານກໍລະນີຜູ້ເສຍຊີວິດມາເຖິງປັດຈຸບັນ.
ດຣ ບຸນຍະເວດ ວົງຄໍາຊາວ, ຫົວໜ້າພະແນກສາທາລະນະສຸກແຂວງ ໃຫ້ສໍາພາດຕໍ່ນັກຂ່າວິທະຍຸກະຈາຍສຽງແຫ່ງ ຊາດລາວວ່າ: ປີນີ້ຂະແໜງສາທາລະນະສຸກແຂວງໄດ້ສຸມໃສ່ຈັດຕັ້ງປະຕິບັດຫລາຍໜ້າວຽກ ເພື່ອສະກັດກັ້ນ ແລະປ້ອງກັນບໍ່ໃຫ້ມີຈໍານວນຜູ້ເປັນພະຍາດໄຂ້ຍຸງລາຍເພີ່ມຂື້ນ ເປັນຕົ້ນວຽກງານປ້ອງ ກັນ ແລະເຝົ້າລະວັງ, ແນະນໍາໃຫ້ປະ ຊາຊົນພາຍໃນແຂວງເອົາໃຈໃສ່ປະຕິບັດມາດຕະການ 5 ປໍຢ່າງເຂັ້ມງວດ, ກ່ອນຈະກ້າວເຂົ້າສູ່ລະດູຝົນໄດ້ອອກແຈ້ງການ ແລະຄໍາສັ່ງໃນການຄວບຄຸມ ແລະສະກັດກັ້ນພະຍາດໄຂ້ຍຸງລາຍໃຫ້ອົງການປົກ ຄອງເມືອງ, ຫ້ອງການສາທາລະນະສຸກເມືອງ ແລະຂັ້ນບ້ານ ຄຽງຄູ່ກັບການລົງໂຄສະນາສຸຂະສຶກສາໃຫ້ປະຊາຊົນໄດ້ຮັບຮູ້ຢ່າງກ້ວາງຂວາງ.
ດຣ ບຸນຍະເວດ ວົງຄໍາຊາວ ໃຫ້ຮູ້ຕື່ມວ່າ: ເຖິງວ່າແຂວງບໍ່ແກ້ວຈະມີຈໍານວນຜູ້ເປັນພະຍາດໄຂ້ຍຸງລາຍໜ້ອຍ ແຕ່ພະ ແນກສາທາລະນະສຸກແຂວງບໍ່ໄດ້ຖືເບົາໃນການສືບຕໍ່ລົງຈັດຕັ້ງປະຕິບັດການປ້ອງກັນ ແລະຄວບຄຸມພະຍາດໄຂ້ຍຸງລາຍ ໂດຍຖືສໍາຄັນການທໍາລາຍແຫລ່ງເພາະພັນຂອງໜອນນໍ້າຍຸງລາຍ, ສີດພົ່ນຢາຂ້າເຊື້ອໃຫ້ບ້ານທີ່ມີລາຍງານການກວດພົບກໍລະນີຜູ້ເປັນໄຂ້ຍຸງລາຍທັນທີ.
ຂ່າວ;ພາບ: ຈັນທະສອນ ສີຫານາດ