ວັນທີ 25 ກໍລະກົດ 2024, ພະແນກຖະແຫລງຂ່າວ ວັດທະນະທໍາ ແລະ ທ່ອງທ່ຽວ ແຂວງບໍ່ແກ້ວ ໄດ້ອອກແຈ້ງການເລກທີ 637/ຖວທ.ບກ ກ່ຽວກັບການອອກອະນຸຍາດສ້າງຕັ້ງສູນບໍລິການຕູ້ເກມ ໃນຂອບເຂດແຂວງບໍ່ແກ້ວ ດັ່ງນີ້:
1. ຫ້າມອອກໃບອະນຸຍາດສ້າງຕັ້ງ ແລະ ອອກຢັ້ງຢືນການເຄື່ອນໄຫວສູນ ຫລື ສະໂມສອນບໍລິການຕູ້ເກມ ເພື່ອການພະນັນທຸກປະເພດ ໃນຂອບເຂດທົ່ວແຂວງບໍ່ແກ້ວ; ສູນ ຫລື ສະໂມສອນໃດ, ຫົວໜ່ວຍທຸລະກິດໃດ, ບຸກຄົນໃດ ຫາກໄດ້ຮັບອະນຸຍາດຈາກພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວແຂວງ, ຫ້ອງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວເມືອງ ມາກ່ອນແລ້ວນັ້ນ ລ້ວນແລ້ວແຕ່ຖືກລຶບລ້າງນັບແຕ່ມື້ອອກແຈ້ງການນີ້ ເປັນຕົ້ນໄປ.
2. ບຸກຄົນ ແລະ ນິຕິບຸກຄົນໃດມີຈຸດປະສົງຢາກສ້າງຕັ້ງສູນບໍລິການຕູ້ເກມໄຟຟ້າ ຕ້ອງຂໍອະນຸຍາດຈາກຫ້ອງວ່າການສໍານັກງານນາຍົກລັດຖະມົນຕີເທົ່ານັ້ນ.
3. ບັນດາພະແນກການ, ອົງການ, ສອງກອງບັນຊາການທະຫານ, ຕໍາຫລວດ, ເຈົ້າເມືອງ 5 ເມືອງ, ຫົວໜ້າຫ້ອງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວ 5 ເມືອງ, ບັນດາທ່ານຜູ້ປະກອບການ, ຫົວໜ່ວຍທຸລະກິດຕ່າງໆ ພາຍໃນແຂວງບໍ່ແກ້ວ ຈຶ່ງຮັບຊາບ ແລະ ພ້ອມກັນຈັດຕັ້ງປະຕິບັດຢ່າງເຂັ້ມງວດ.
4. ມອບໃຫ້ຂະແໜງວັດທະນະທໍາ, ຂະແໜງທ່ອງທ່ຽວ, ຫ້ອງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ເມືອງ ເປັນເຈົ້າການສົມທົບເຈົ້າໜ້າທີ່ ສອງກໍາລັງ ປກຊ-ປກສ ແຂວງ ແລະ ເມືອງ ລົງຕິດຕາມ, ກວດກາ ພ້ອມທັງປະຕິບັດມາດຕະການຕໍ່ຜູ້ລະເມີດ ຫລື ພາກສ່ວນທີ່ຍັງມີການເຄື່ອນໄຫວບໍລິການຕູ້ເກມ ຢ່າງເດັດຂາດຕາມລະບຽບກົດຫມາຍ ພ້ອມທັງປົດປ້າຍໂຄສະນາລົງ.
