ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ແຂວງຜົ້ງສາລີປະກາດໃຊ້ອີກ 9 ມາດຕະການ ຍົກລະດັບການຕ້ານ ແລະ ຕອບໂຕ້ພະຍາດ COVID – 19 ເພື່ອຮັກສາຊີວິດຂອງປະຊາຊົນບັນດາເຜົ່າ ໃຫ້ປອດໄພ

ປະຈຸບັນນີ້, ສະພາບການແຜ່ລະບາດຂອງເຊື້ອພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ-19 (COVID – 19) ໃນຫຼາຍປະເທດໄດ້ຂະຫຽາຍເປັນວົງກວ້າງ , ສືບຕໍ່ມີກໍລະນີຕິດເຊື້ອ ແລະ ເສຍຊີວິດເພີ່ມຂື້ນໃນແຕ່ລະວັນ, ອົງການອານາໄມໂລກໄດ້ປະເມີນວ່າພະຍາດ COVID – 19 ແມ່ນມີຄວາມສ່ຽງຫຼາຍທີ່ສຸດທີ່ຈະແຜ່ລະບາດໄປທົ່ວໂລກ ແລະ ມາຮອດປະຈຸບັນ ສປປ ລາວ ກໍ່ໄດ້ພົບຜູ້ຕິດເຊື້ອແລ້ວ.

ຕໍ່ສະພາບການດັ່ງກ່າວ, ທາງຄະນະສະເພະາກິດເພື່ອປ້ອງກັນ, ຄວມຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງຜົ້ງສາລີ ໄດ້ເປັນເຈົ້້າການໃນການສະກັດກັ້ນ ແລະ ຕອບໂຕ້ພະຍາດດັ່ງກ່າວ ດ້ວຍທຸກຮູບການ ຕາມການຊີ້ນຳຂອງສູນກາງ ໂດຍໃນໄລຍະຜ່ານມາ, ຄະນະສະເພາະກິດໄດ້ອອກແຈ້ງການ ສະບັບເລກທີ 0252/ຈຂ.ສພກ.ຜລ ລົງວັນທີ 16 ມີນາ 2020 ວ່າດ້ວຍການປະຕິບັດມາດຕະການປ້ອງກັນຕ້ານ, ຄວມຄຸມ ແລະ ຕອບໂຕ້ການລະບາດຂອງພະຍາດໂຄວິດ-19 ຢູ່ແຂວງຜົ້ງສາລີ ໂດຍສັ່ງໃຫ້ມີການໂຈະການຈັດງານຕ່າງໆ ແລະ ການໂຮມຊຸມນຸມທີ່ມີຄົນເຂົ້້າຮ່ວມເປັນຈຳນວນຫຼາຍ, ທຸກໂຮງແຮມບ້ານພັກຕ້ອງກວດກາຄົນມາພັກເຊົາຢ່າງລະອຽດ, ສັ່ງປິດດ່ານປະເພນີ ແລະ ດ່ານທ່ອງຖິ່ນໃນທົ່ວແຂວງ ໃຫ້ເປີດບໍລິການພຽງ 3 ດ່ານຄື: ດ່ານສາກົນປາງຫົກ, ດ່ານລານຕຸ້ມ ແລະ ດ່ານປາຄ່າ, ພ້ອມນີ້ ກໍ່ໄດ້ແຕ່ງຕັ້້ງທິມແພດໃຫ້ປະຈຳຢູ່ຕາມແຕ່ລະດ່ານ, ໂຮງໝໍແຂວງ, ເມືອງ ແລະ ສຸກສາລາ, ສັງພັກຮຽນໂຮງຮຽນລ້ຽງເດັກ, ອານຸບານ, ປະຖົມ ແລະ ມັດທະຍົມທົ່ວແຂວງ ແລະ ໂຄສະນາເຜີຍແຜ່ໃຫ້ທົ່ວແຂວງຮັບຮູ້ເຖິງ ຜົນຮ້າຍ ແລະ ຄວາມອັນຕະລາຍຂອງພະຍາດ;  ພ້ອມດຽວກັນ, ພະແນກສຶກສາທິການ ແລະ ກິລາແຂວງ ກໍ່ໄດ້ອອກແຈ້ງການ ເລກທີ 604 /ສກຂ ລົງວັນທີ 18 ມີນາ 2020 ສັ່ງພັກການສອນ-ການຮຽນຂອງບັນດາໂຮງຮຽນໃນຂອບເຂດທົ່ວແຂວງ; ພະແນກ ຖວທ ແຂວງ ກໍ່ອອກແຈ້ງການ ເລກທີ 277/ຖວທ.ຂ ລົງວັນທີ 18 ມີນາ 2020 ສັ່ງໂຈະການບໍລິການຮ້ານກິນດື່ມ, ບັນເທີງ ແລະ ຮ້ານຄາລາໂອເກະໃນທົ່ວແຂວງ; ຫົວໜ່ວຍການບໍລິການ-ບໍລິສັດການທ່ອງທ່ຽວ, ສູນຂໍ້ມູນຂ່າວສານການທ່ອງທ່ຽວແຫ່ງຕ່າງໆ ໂຈະການນຳນັກທ່ອງທ່ຽວໄປໃນສະຖານທ່ອງທ່ຽວທີ່ຕ່າງໆ ແລະ ໂຈະການຈັດງານປະເພນີທີມີຄົນເຂົ້້າຮ່ວມເປັນຈຳນວນຫຼວງຫຼາຍ ແລະ ພະແນກແຮງງານ ແລະ ສະຫວັດດີການສັງຄົມແຂວງ ໄດ້ອອກແຈ້ງການ ເລກທີ່ 285/ຮສສຂ.ຜລ ຜົ້ງສາລີ ລົງວັນທີ 13 ມີນາ 2020 ວ່າດ້ວຍການເພີ່ມທະວີການຄຸມຄອງແຮງງານ, ການນຳເຂົ້້າແຮງງານຕ່າງປະເທດ ແລະ ຂໍ້ຫ້າມຕ່າງໆສຳລັບການອອກແຮງງານ ແລະ ຄະນະສະເພະາກິດ ເພື່ອປ້ອງກັນ, ຄວມຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ແຂວງຜົ້ງສາລີ  ທີ່ນຳໂດຍທ່ານ ທອງສີ ເສົາສຸລິພົມ, ຮອງເຈົ້າແຂວງ, ທ່ານຫົວໜ້າຄະນະສະເພາະກິດ ເພື່ອປ້ອງກັນ, ຄວມຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ແຂວງຜົ້ງສາລີ ໄດ້ລົງຕິດຕາມຊຸກຍູ້ການປະຕິບັດໜ້າ ແລະ ໃຫ້ກຳລັງໃຈ ພະນັກງານເຈົ້້າໜ້າທີ່ ແລະ ແພດໝໍກວດກາຄົນຜ່ານດ່ານເຂົ້າ-ອອກ ທີ່ດ່ານສາກົນປາງຫົກ, ດ່ານລານຕຸ້ຍ ແລະ ດ່ານປ່າຄ່າ.

ຕໍ່ມາດຕະການດັ່ງກ່າວ, ມາຮອດປະຈຸບັນ ເຮັດໃຫ້ແຂວງຜົ້ງສາລີຍັງບໍ່ມີຜູ້ຕິດເຊື້ອ ໂຄວິດ-19  ເທື່ອ ແຕ່ເນື່ອງຈາກວ່າຢູ່ ສປປ ລາວ ຫາກໍ່ພົບຜູ້ຕິດເຊື້ອ ໂດຍກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ຖະແຫຼງຂ່າວຢັ້ງຢືນ ເມື່ອວັນທີ 26 ມີນາຜ່ານມາ  ວ່າ ໄດ້ພົບຜູ້ຕິດເຊື້ອ ໂຄວິດ-19 ຢູ່ນະຄອນລວງວຽງຈັນ ແລະ ແຂວງຫຼວງພະບາງແລ້ວ 6 ກໍລະນີ. ດັງນັ້ນ, ທາງແຂວງຜົ້ງສາລີ ຈຶ່ງໄດ້ຍົກລະດັບການປ້ອງກັນ ແລະ ຕອບໂຕ້ພະຍາດດັ່ງກ່າວຂຶ້ນຕື່ມ ໃນຂະນະທີ່ ຄະນະສະເພາະກິດ ເພື່ອປ້ອງກັນ, ຄວມຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ແຂວງຜົ້ງສາລີ ໄດ້ອອກແຈ້ງການເພີ່ມອີກສະບັບໜຶງ ເລກທີ 0381/ຈຂ.ສພກ.ຜລ ລົງວັນທີ 26 ມີນາ 2020 ວ່າດ້ວຍການເພີ່ມມາດຕະການ ປ້ອງກັນ, ຄວມຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດ ໂຄວິດ-19 ຢູ່ແຂວງຜົ້ງສາລີ  ເພື່ອເຮັດໃຫ້ການຈັດຕັ້ງປະຕິບັດບັນດາມາດຕະການປ້ອງກັນ ແນ່ໃສ່ເພື່ອບໍ່ໃຫ້ພະຍາດແຜ່ລະບາດມາຮອດແຂວຜົ້ງສາລີ ໂດຍມີມາດຕະການຄື:

ມາດຕະການທີໜຶ່ງ: ໃຫ້ບັນດາ ທ່ານເຈົ້າເມືອງ ຊີ້ນໍາບັນດາກຸ່ມ, ບັນດາບ້ານ ທີ່ຢູ່ໃນຂອບເຂດການຄຸ້ມຄອງຂອງຕົນ ໃຫ້ພ້ອມກັນຜັນຂະຫຍາຍຄໍາສັ່ງແນະນໍາເພີ່ມເຕີມສະບັບນີ້ ແລະ ເປັນເຈົ້າການໃນການປຸກລະດົມປະຊາຊົນທີ່ມີພີ່ນ້ອງ, ລູກ, ຫຼານ ຫຼື ສະມາຊິກ ໃນຄອບຄົວທີ່ເດີນທາງມາແຕ່ຕ່າງແຂວງ ແລະ ຕ່າງປະເທດ ເປັນຕົ້ນແມ່ນ: ນັກສຶກສາ , ຜູ້ອອກແຮງງານ ແລະ ອື່ນໆ ໃຫ້ປະຕິບັດມາດຕະການ ການຈໍາກັດບໍລິເວນຢູ່ສະຖານທີ່ພັກເຊົາຂອງຕົນເອງ (ຕາມຫນັງສືແຈ້ງການ ສະບັບເລກທີ 02/ສພກ, ລົງວັນທີ 16 ມີນາ 2020 ຂອງຄະນະສະເພາະກິດແຫ່ງຊາດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ແລະ ຄໍາແນະນໍາເພີ່ມເຕີມ ສະບັບເລກທີ 341/ກຄທຕ, ລົງວັນທີ 22 ມີນາ 2020 ຂອງກົມຄວບຄຸມພະຍາດຕິດຕໍ່).

ມາດຕະການທີສອງ: ໃຫ້ໂຮງໝໍແຂວງ, ບັນດາໂຮງໝໍຊຸມຊົນ, ໂຮງໝໍເມືອງ ແລະ ສຸກສາລາແຕ່ລະບ່ອນຕ້ອງກໍານົດ ແລະ ຈັດສັນສະຖານທີ່ ທີ່ເໝາະສົມໄວ້ເພື່ອຮອງຮັບດູແລຜູ້ຕິດເຊື້ອ (ໃນກໍລະນີເກີດມີຜູ້ຕິດເຊື້ອ) ແລະ ກະກຽມຮັບມືຫາກເກີດການລະບາດຂອງພະຍາດ COVID-19.

ມາດຕະການທີສາມ: ໃຫ້ອົງການປົກຄອງເມືອງ, ກຸ່ມບ້ານ ແລະ ບ້ານ ສົມທົບກັບອົງການແນວລາວສ້າງຊາດ, ອົງການຈັດຕັ້ງມະຫາຊົນ ແລະ ອສບ (ອາສາສະໝັກບ້ານ) ເອົາໃຈໃສ່ປະຕິບັດຢ່າງເຂັ້ມງວດດັ່ງນີ້:

1.) ເກັບກໍາຂໍ້ມູນລະອຽດຂອງປະຊາຊົນ ທີ່ເດີນທາງກັບຈາກຕ່າງປະເທດ ເພື່ອກໍານົດວັນເວລາເລີ່ມ ແລະ

ວັນສິ້ນສຸດ (14 ວັນ) ສໍາລັບການຈໍາກັດບໍລິເວນຕົນເອງ, ພ້ອມທັງຕິດຕາມ ແລະ ເກັບກໍາສະພາບ ອາການຂອງບຸກຄົນດັ່ງກ່າວຢ່າງໃກ້ຊິດ ແລະ ເປັນປົກກະຕິ ພາຍໃນ 14 ວັນ; ຖ້າຫາກມີການໄຂ້, ໄອ ຫຼື ຫາຍໃຈຍາກ ຂອງຜູ້ທີ່ຖຶກຈໍາກັດບໍລິເວນ ແມ່ນໃຫ້ຮີບດ່ວນແຈ້ງໃຫ້ການຈັດຕັ້ງຂອງຕົນຊາບ.

2.) ຕິດຕາມ, ແນະນໍາໃຫ້ປະຊາຊົນພາຍໃນເມືອງ ແລະ ບ້ານ ປະຕິບັດມາດຕະການ ການຈໍາກັດບໍລິເວນ ຢູ່ສະຖານທີ່ພັກເຊົາຂອງຕົນເອງຢ່າງເຂັ້ມງວດ; ໃຫ້ແນະນໍາປະຊາຊົນຢູ່ແຕ່ລະບ້ານ ໂດຍສະເພາະ ປະຊາຊົນຢູ່ຕາມລຽບຊາຍແດນ ສປ ຈີນ, ສສ ຫວຽດນາມ, ຕາມຊາຍແດນຕິດກັບບັນດາແຂວງ ແລະ ການເດີນທາງໄປມາຫາສູ່ລະຫວ່າງ ບ້ານຕໍ່ບ້ານ, ເມືອງຕໍ່ເມືອງ ຫຼື ຕໍ່ສໍານັກງານແມ່ນໃຫ້ຫຼຸດຜ່ອນ, ໃຫ້ຫັນມາໃຊ້ໂທລະສັບອອນລາຍຫາກັນ, ຖ້າມີຄວາມຈໍາເປັນຮີບດ່ວນ ແມ່ນໃຫ້ປະຕິບັດຕາມມາດຕະການທີ່ໄດ້ແຈ້ງໃຫ້ແລ້ວຢ່າງເຂັ້ມງວດເຊັ່ນ: ກວດອຸນຫະພູມ, ໃສ່ຜ້າອັດປາກ, ໃຊ້ເຈວລ້າງມື, ໃຫ້ອົງການປົກຄອງຂັ້ນຕ່າງໆ ລະດົມກໍາລັງທະຫານ, ຕໍາຫຼວດ, ກອງຫຼອນ ເຂົ້າໃນການຕິດຕາມ, ກວດກາ ແລະ ຮັກສາຄວາມເປັນລະບຽບຮຽບຮ້ອຍໃນຂອບເຂດຄວາມຮັບຜິດຊອບຂອງຕົນຕາມພາລະບົດບາດຫນ້າທີ່ຂອງແຕ່ລະພາກສ່ວນ, ຖ້າຫາກເກີດຂຶ້ນຢູ່ເມືອງໃດຍ້ອນຄວາມຮັບຜິດຊອບແມ່ນຈະໄດ້ໄຕ່ສວນຕາມຂະບວນການຍຸຕິທໍາ.

3.) ໃຫ້ອົງການປົກຄອງແຕ່ລະຂັ້ນ ລະດົມທົ່ວສັງຄົມ ໃຫ້ຄວາມຮ່ວມມື ແລະ ເຂົ້າຮ່ວມຂະບວນການຄວບຄຸມ, ປ້ອງກັນ ແລະ ສະກັດກັ້ນການລະບາດຂອງພະຍາດ COVID-19 ໃນຄັ້ງນີ້ຢ່າງເປັນເຈົ້າການ,ດ້ວຍຄວາມຮັບຜິດຊອບສູງຄືການກັບການກະກຽມເຮັດສົງຄາມ.

ມາດຕະການທີສີ່: ຫາກຜູ້ທີ່ຖືກຈໍາກັດບໍລິເວນຕົນເອງ ບໍ່ປະຕິບັດຕາມມາດຕະການທີ່ຄະນະສະເພາະກິດກໍານົດໄວ້ ພາຍໃນ 14 ວັນ ແມ່ນຈະຖືກດໍາເນີນການຕາມລະບຽບກົດໝາຍ.

ມາດຕະການທີຫ້າ: ໃຫ້ປິດກິດຈະການຊົ່ວຄາວ ກ່ຽວກັບກິດຈະການການບໍລິການເດີ່ນກິລາບານເຕະ, ເດີ່ນເປຕັງ, ຮ້ານສະນຸກເກີ, ຮ້ານບັນເທິງ, ຮ້ານຄາຣາໂອເກະ, ຮ້ານນວດ ເລີ່ມແຕ່ວັນທີ 26 ມີນາ 2020 ຈົນກວ່າສະພາບການແຜ່ ລະບາດ ຂອງພະຍາດ COVID-19 ຈະສະຫງົບລົງ ແລະ ການຈັດປະຊຸມທີ່ມີຈໍານວນຄົນເຂົ້າຮ່ວມ ຫຼວງຫຼາຍ ແລະ ອື່ນໆ ທີ່ມີຄວາມສ່ຽງຕໍ່ການຕິດເຊື້ອແມ່ນໃຫ້ຍຸດຕິ, ຖ້າເປົ້າໝາຍໃດຫາກລະເມີດແມ່ນຈະໄດ້ດໍາເນີນຕາມລະບຽບກົດໝາຍ, ສ່ວນຮ້ານອາຫານ, ຮ້ານເຝີ ກໍ່ໃຫ້ມີວິທີການ ໂດຍການຈັດໂຕະໃຫ້ຫ່າງ ຈາກກັນ ແລະ ບໍ່ໃຫ້ຈັດແບບແອອັດ, ຈໍານວນຄົນຫຼວງຫຼາຍ ແລະ ບໍ່ໃຫ້ຮັບການຈັດງານລ້ຽງ, ມ່ວນຊື່ນລໍາວົງ.

ມາດຕະການທີຫົກ: ໃຫ້ພະແນກສາທາລະນະສຸກ ກະກຽມຄວາມພ້ອມທາງດ້ານບຸກຄະລາກອນ, ອຸປະກອນການແພດ ແລະ ສະຖານທີ່ ເພື່ອຮອງຮັບໃນກໍລະນີມີການລະບາດຂອງພະຍາດ ໂຄວິດ-19 ຢູ່ແຂວງຜົ້ງສາລີ.

ມາດຕະການທີເຈັດ: ໃຫ້ພະແນກສາທາລະນະສຸກແຂວງ ສົມທົບກັບ ກອງບັນຊາການ ປກສ ແຂວງ ແລະ ພະແນກ ຖະແຫຼງຂ່າວ , ວັດທະນະທໍາ ແລະ ທ່ອງທ່ຽວແຂວງ ແຕ່ງຕັ້ງທີມງານວິຊາການ ລົງຕັ້ງຈຸດກວດກາຄົນເຂົ້າ-ອອກ ຢູ່ 2 ຈຸດ ເຊັ່ນ: ຈຸດ ປາກນໍ້ານ້ອຍ, ຈຸດນໍ້າບູດ ເມືອງຂວາ ແລະ ຈຸດປາງໄຄ່ ເມືອງບຸນໃຕ້ ຊາຍແດນເມືອງນາໝໍ້, ແຂວງ ອຸດົມໄຊ ແລະ ໃຫ້ບັນດາເມືອງ ແຕ່ງຕັ້ງທີມງານວິຊາການຂອງຕົນລົງຕັ້ງຈຸດກວດກາ ຄົນເຂົ້າ-ອອກ ຢູ່ບາງຈຸດເຫັນວ່າມີຄວາມຈໍາເປັນລະຫວ່າງຊາຍແດນເມືອງຕໍ່ເມືອງ.

ມາດຕະການທີແປດ:  ບຸກຄົນ ແລະ ການຈັດຕັ້ງທີ່ຈະລົງຂ່າວຜ່ານສື່ສັງຄົມຕ່າງໆ ກ່ຽວກັບການປ້ອງກັນ, ຕ້ານ ແລະ ຄວບຄຸມການລະບາດພະຍາດ (COVID-19) ນັ້ນ ຕ້ອງໄດ້ຮັບອະນຸຍາດຈາກພາກສ່ວນກ່ຽວຂ້ອງ ແລະ ເປັນຂໍ້ມູນທີ່ ຖືກຕ້ອງຕາມຄວາມເປັນຈິງແທ້, ຖ້າບຸກຄົນ ຫຼື ການຈັດຕັ້ງໃດຫາກລົງຂ່າວຜ່ານສື່ສັງຄົມຕ່າງໆທີ່ບໍ່ມີມູນ ຄວາມຈິງ, ຊຶ່ງສ້າງຄວາມຫຍຸ້ງຍາກໃຫ້ແກ່ບຸກຄົນ, ການຈັດຕັ້ງ ແລະ ສັງຄົມ ແມ່ນບຸກຄົນ ຫຼື ການຈັດຕັ້ງຜູ້ນັ້ນຕ້ອງໄດ້ຮັບຜິດຊອບທັງໝົດເສຍຫາຍທັງຫມົດ ແລະ ຕາມລະບຽບກົດຫມາຍກ່ຽວຂ້ອງ.

ມາດຕະການທີເກົ້້າ: ໃຫ້ແຕ່ລະພະແນກການ, ອົງການການ ແລະ ບັນດາເມືອງ ອະນຸຍາດໃຫ້ພະນັກງານ-ລັດຖະກອນ ຜູ້ເປັນພໍ່ ຫຼື ແມ່ ສະເພາະຜູ້ທີ່ມີລູກອ່ອນທີ່ຍັງບໍ່ທັນເຂົ້າຮຽນຢູ່ໂຮງລ້ຽງເດັກ, ຮຽນຢູ່ໂຮງລ້ຽງເດັກ ແລະ ໂຮງຮຽນ ອະນຸບານ ໃຫ້ພັດປ່ຽນກັນເພື່ອດູແລເບິ່ງແຍງລູກຫຼານຢູ່ເຮືອນ (ບໍ່ໃຫ້ເອົາລູກມາຫ້ອງການ) ສໍາລັບການປະຕີບັດຫນ້າທີ່ວຽກງານແມ່ນໃຫ້ສືບຕໍ່ຈັດຕັ້ງປະຕິບັດໂດຍໃຊ້ລະບົບທາງອອນລາຍ ແລະ ລະບົບໄອທີ… ແຕ່ວັນ ທີ 27 ຮອດວັນທີ 21 ເມສາ 2020.

ເພື່ອຫຼີກລ້ຽງຈາກການຕິດເຊື້ອ COVID – 19  ທ່ານສາມາດປ້ອງກັນຕົນເອງໄດ້ດ້ວຍວິທີການຄື:

  1. ໝັ່ນລ້າງມືດ້ວຍສະບູ່ ແລະ ນ້ຳ ຫຼື ເຈວລ້າງມືທີ່ມີສ່ວນປະສົມຂອງເຫຼົ້າ ໃຫ້ທົ່ວ ແລະ ໃຫ້ຄົບ 20 ວິນາທີ.
  2. ຫຼີກລ່ຽງການສຳພັດຕາ, ດັງ ແລະ ປາກ.
  3. ຮັກສາໄລຍະຫ່າງ 1 – 2 ແມັດ.
  4. ຫຼີກລ່ຽງການໄປບ່ອນທີ່ມີຄົນຫຼາຍ

ສ່ວນວິທີປ້ອງກັນຄົນທີທ່ານຮັກ ແລະ ຄົນອ້ອມຂ້າງທ່ານບໍ່ໃຫ້ຕິດພະຍາດ COVID – 19  ແມ່ນມີວິທີດັ່ງນີ້:

  1. ເວລາໄອ ຫຼື ຈາມຕ້ອງປິດປາກ ຫຼື ດັງດ້ວຍເຈ້ຍ ຫຼື ຫ່ວາງຂໍ້ສອກ.
  2. ຫຼີກລ່ຽງການສຳພັດ ຫຼື ໃກ້ຊິດກັບຄົນທີ່ມີອາການໄຂ້ ຫຼື ໄອ.
  3. ແຍກປ່ຽວຕົນເອງ 14 ມື້ ຫຼັງຈາກເດີນທາງມາແຕ່ຕ່າງປະເທດ ແລະ ນະຄອນຫຼວງວຽງຈັນໂດຍອາການຂອງຜູ້ທີ່ຕິດເຊື່ອ ໂຄວິດ-19 ຈະມີອາການໄຂ້, ໄອ ແລະ ຫາຍໃຈຝືດ. ຖ້າທ່ານສົງໄສມີອາການໄຂ້, ໄອ ແລະ ຫາຍໃຈຝືດ ແມ່ນໃຫ້ໄປພົບກັບແພດໝໍເພື່ອກວດດ່ວນ ຫຼື ໂທຫາເບີ +85620 5406 6777 ຫຼື ສາຍດ່ວນ

ອີງຕາມຕົວເລກການລາຍງານຂອງສູນຂ່າວສານການແພດສຸຂະສຶກສາ, ກະຊວງສາທາລະນະສຸກ ໃນວັນທີ 26 ມີນາ 2020 ຜ່ານມາ, ມາຮອດປະຈຸບັນ, ສະຖານະການຕິດເຊື້ອ ໂຄວິດ-19  ໃນທົ່ວໂລກ ແມ່ນໄດ້ແຜ່ລະບາດແລ້ວໃນຫຼາຍປະເທດ ແລະ ເຂດປົກຄອງ, ໂດຍມີຜູ້ຕິດເຊື້ອສະສົມລວມກວ່າ 472,109 ຄົນ, ປິ່ນປົວຫາຍດີ 114,870 ຄົນ ແລະ ເສຍຊີວິດແລ້ວ 21,308 ຄົນ.

ໂດຍ: ສົມຄິດ ແກ້ວນວນລາ