ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ແຂວງຜົ້ງສາລີ ສຳເລັດກອງປະຊຸມໃຫຍ່ຜູ້ແທນອົງຄະນະພັກແຂວງຄັ້ງທີ XI

ກອງປະຊຸມໃຫຍ່ຜູ້ແທນອົງຄະນະພັກແຂວງຜົ້ງສາລີ ຄັ້ງທີ່ XI ໄດ້ເປີດຂຶ້ນຢ່າງເປັນທາງການ ໃນຕອນເຊົ້າຂອງວັນທີ 5 ຕຸລາ 2020 ນີ້ ແລະ ອັດລົງດ້ວຍຜົນສຳເລັດ ຕອນແລງຂອງວັນທີ 6 ຕຸລາ 2020 ນີ້ ໂດຍການເຂົ້າຮ່ວມເປັນປະທານຂອງສະຫາຍ ພົອ ຈັນສະໜອນ ຈັນຍາລາດ ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ; ມີ ສະຫາຍ ຄຳຜອຍ ວັນນະສານ ຮັກສາການເລຂາພັກແຂວງ, ເຈົ້້າແຂວງຜົ້ງສາລີ; ມີບັນດາສະຫາຍຄະນະບໍລິຫານງານພັກແຂວງ, ຄະນະຈັດຕັ້ງສູນການພັກ, ຄະນະກວດກາສູນກາງພັກ, ຜູ້ແທນສົມບູນ 287 ສະຫາຍ, ຍິງ 39 ສະຫາຍ ທີ່ເປັນຕົວແທນໃຫ້ສະມາຊິກພັກທັງໝົດໃນທົ່ວແຂວງ 12.566 ສະຫາຍ ພ້ອມດ້ວຍແຂກເຊີນເຂົ້້າຮ່ວມ.

ກອງປະຊຸມຄັ້ງນີ້ຜູ້ແທນເຂົ້າຮ່ວມໄດ້ຮັບຟັງລາຍງານການເມືອງ ຂອງຄະນະບໍລິຫານງານພັກແຂວງສະໄໝທີ X ເຊິ່ງໄດ້ຍົກໃຫ້ເຫັນມູນເຊື້ອແຫ່ງການນຳພາຂອງຄະນະພັກແຂວງໃນໄລຍະ 65 ປີ ຜ່ານມາ (1955 – 2020) ແລະ ການສະຫຼູບຕີລາຄາໝາກຜົນແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງ ໃນແຕ່ລະຂົງເຂດວຽກງານ ຊຶ່ງມີຜົນສຳເລັດໃນຫຼາຍດ້ານທີ່ເປັນໜ້າເອກອ້າງ, ທັງເປັນພື້້ນຖານອັນສຳຄັນ ແລະ ທ່ວງທ່າໃໝ່ທີ່ໜັກແໜ້ນໃນການສືບຕໍ່ພັດທະນາ; ພ້ອມທັງຮັບຟັງແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII (2016-2020) ແລະ ທິດທາງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ຊຶ່ງໄດ້ຖືເອົາການພັດທະນາເສດຖະກິດເປັນໃຈກາງ ໂດຍສຸມໃສ່ພັດທະນາຕາມແລວ 11,4,5,6 ແລະ 22 ແລະ ສຸມໃສ່ຈັດສັນອາຊີບ, ແກ້ໄຂຄວາມທຸກຍາກ ຕາມ 6 ທາງອອກຢ່າງຕັ້ງໜ້າ, ເຮັດໃຫ້ເສດຖະກິດ ຂອງແຂວງ ຂະຫຍາຍຕົວຢ່າງຕໍ່ເນື່ອງ ໃນລະດັບສະເລ່ຍ 6,6% ຕໍ່ປີ, ລາຍຮັບສະເລ່ຍຕໍ່ຄົນໃນປີ 2020 ບັນລຸ 988 ໂດລາສະຫະລັດ, ທຽບໃສ່ປີ 2015 ເພີ່ມຂຶ້ນ 190 ໂດລາ;  ການພັດທະນາດ້ານວັດທະນາທຳສັງຄົມໄດ້ສຸມໃສ່ຈັດຕັ້ງປະຕິບັດ 15 ຕົວຊີ້ວັດ ຂອງຂະແໜງສຶກສາ, ຊຶ່ງມາຮອດປີ 2020 ສາມາດບັນລຸໄດ້ 3 ຕົວຊີ້ວັດ ແລະ ອີກ 5 ຕົວຊີ້ວັດໃກ້ຈະບັນລຸ. ຕາໜ່າງການບໍລິການດ້ານສາທາລະນະສຸກ ໄດ້ຮັບການປັບປຸງຍົກລະດັບ, ທັງໄດ້ກໍ່ສ້າງໃໝ່ ຂະຫຍາຍໄປສູ່ຊົນນະບົດເພີ່ມຂຶ້ນ, ໂດຍສຸມໃສ່ຈັດຕັ້ງປະຕິບັດ 10 ຕົວຊີ້ວັດໃນຂະແໜງສາທາລະນະສຸກ, ຊຶ່ງມາຮອດປັດຈຸບັນສາມາດບັນລຸໄດ້ 5 ຕົວຊີ້ວັດ ແລະ ອີກ 1 ຕົວຊີ້ວັດໃກ້ຈະບັນລຸ; ອັນພົ້ນເດັ່ນແມ່ນສາມາດປ້ອງກັນ ແລະ ຄວບຄຸມການລະບາດ ຂອງພະຍາດ Covid-19 ແລະ ພະຍາດໄຂ້ເລືອດອອກ .  ຕາໜ່າງຖະແຫຼງຂ່າວໄດ້ຮັບການປັບປຸງ ແລະ ຂະຫຍາຍໄປສູ່ກຸ່ມບ້ານ, ບ້ານໃຫ່ຍເພີ່ມຂຶ້ນ,​ ຊຶ່ງມາຮອດປັດຈຸບັນມີ 215 ບ້ານ ກວມ 41% ; ສີລະປະ,ວັດທະນະທໍາອັນດີງາມຂອງຊາດ ແລະ ຂອງບັນດາເຜົ່າພາຍໃນແຂວງ ກໍ່ໄດ້ຮັບການຊຸກຍູ້ສົ່ງເສີມ ແລະ ອານຸລັກຮັກສາເປັນຂະບວນດີຂຶ້ນ; ວຽກງານທ່ອງທ່ຽວກໍ່ໄດ້ຮັບການເອົາໃຈໃສ່ຊຸກຍູ້ສົ່ງເສີມຕາມທິດລັດກັບທຸລະກິດ ແລະ ປະຊາຊົນພ້ອມກັນເຮັດ, ພ້ອມກັນນັ້ນກໍ່ໄດ້ກໍານົດທິດທາງການພັດທະນາການທ່ອງທ່ຽວໄປສູ່ 4 ທາງອອກ . ການຄຸ້ມຄອງແຮງງານພາຍໃນ ແລະ ຕ່າງປະເທດໄດ້ຫັນເຂົ້າສູ່ລະບຽບກົດໝາຍ ແລະໄດ້ຮັບການຈັດສັນຕາມໂຄງປະກອບເສດຖະກິດຂອງແຂວງ, ທາງດ້ານສີມືແຮງງານໃນສາຂາອາຊີບຕ່າງໆ ກໍ່ໄດ້ຮັບການຝຶກອົບຮົມ ໂດຍມີສ່ວນຮ່ວມຂອງທຸກພາກສ່ວນເສດຖະກິດ ; ການປະຕິບັດນະໂຍບາຍລວມຂອງພັກ-ຂອງລັດວາງອອກ ແລະ ນະໂຍບາຍສະເພາະຂອງແຂວງ ກໍ່ໄດ້ຮັບການຈັດຕັ້ງປະຕິບັດຖືກຕ້ອງ ຕາມແຕ່ລະເປົ້າໝາຍ ແລະ ທົ່ວເຖິງກວ່າເກົ່າ, ການຂະຫຍາຍອັດຕາການປົກຄຸມປະກັນສັງຄົມກໍ່ໄດ້ຮັບຜົນຫຼາຍຂຶ້ນ; ວຽກງານກາແດງກໍ່ໄດ້ຈັດຕັ້ງປະຕິບັດຕາມນະໂຍບາຍ ແລະ ຕາມຄວາມອາດສາມາດຕົວຈິງ ສາມາດຕອບສະໜອງໄດ້ຕາມຄວາມຕ້ອງການຂອງສັງຄົມຫຼາຍຂຶ້ນ ແລະ ວຽກງານເກັບກູ້ລະເປີດບໍ່ທັນແຕກຢູ່ພາຍໃນແຂວງ ກໍ່ໄດ້ເອົາໃຈໃສ່ປະສານຈັດຕັ້ງປະຕິບັດຕາມແຜນວຽກທີໄດ້ກຳນົດ.

ໃນກອງປະຊຸມຍັງໄດ້ຮັບຟັງການປະກອບຄຳເຫັນຂອງແຕ່ລະຂົງເຂດວຽກງານ ແລະ ຕົວແບບດ້ານຕ່າງໆ, ບົດສຳຫຼວດການນຳພາລວມຂອງຄະນະບໍລິຫານງານພັກແຂວງສະໄໝທີ X ແລະພ້ອມກັນຮັບຮອງເອົາບັນດາເນື້ອໃນຕ່າງໆທີສະເໜີຂຶ້ນໃນກອງປະຊຸມ; ພ້ອມນີ້ກໍ່ໄດ້ປ່ອນບັດຄັດເລືອກເອົາຄະນະບໍລິຫານງານພັກແຂວງສະໄໝທີ XI ຊຶ່ງມີຜູ້ສະໝັກ 38 ສະຫາຍ, ໃນນີ້ເລືອກເອົາ 33 ສະຫາຍ, ຍິງ 4 ສະຫາຍ ແລະ ເປັນເອກກະສັນກັນເລືອກເອົາສະຫາຍ ຄຳຜອຍ ວັນນະສານ ເປັນເລຂາຄະນະບໍລິຫານງານພັກແຂວງ, ສະຫາຍ ບົວທອງ ອຸແສງຄຳ ແລະ ສະຫາຍ ທອງສີ ເສົາສຸລິພົມ ເປັນຮອງເລຂາ, ເລືອກຕັ້ງເອົາສະຫາຍ ບຸນທະວີ ສໍສຸກັນ ເປັນປະທານກວດກາ ແລະ ສະຫາຍ ໂລ ອາຢິງ, ສະຫາຍ ສິງໄຊ ຂັນທະສັກ, ສະຫາຍ ຄຳແດງ ອີນດາວົງ ເປັນຮອງປະທານກວດກາ. ພ້ອມທັງປ່ອນບັດຄັດເລືອກເອົາຜູ້ແທນໄປຮ່ວມກອງປະຊຸມໃຫຍ່ຄັ້ງທີ XI ຂອງພັກຕື່ມອີກ.

ກອງປະຊຸມຄັ້ງນີ້ຜູ້ແທນທີ່ເຂົ້າຮ່ວມຍັງໄດ້ຮັບຟັງການໂອ້ລົມຂອງສະຫາຍ ພົອ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ ຊຶ່ງທ່ານໄດ້ຍ້ອງຍໍຊົມເຊີຍຕໍ່ໝາກຜົນໃນການປົກປັກຮັກສາ ແລະ ສ້າງສາພັດທະນາແຂວງຜົ້ງສາລີໃນຕະຫຼອດໄລຍະຜ່ານມາ; ພ້ອມທັງເໜັ້ນໜັກໃຫ້ຄະນະບໍລິຫານງານພັກແຂວງສືບຕໍ່ຊີ້ນຳ-ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງໃຫ້ເຂົ້າສູ່ລວງເລິກ ແລະ ສອດຄ່ອງກັບສະພາບຄວາມເປັນຈິງ ຂອງບັນດາຂະແໜງການ, ເມືອງ ແລະ ຮາກຖານບ້ານໃຫ້ມີຜົນສຳເລັດຢ່າງເປັນຮູບປະທຳ.

ຂ່າວ: ສົມຄິດ ແກ້ວນວນລາ