ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ງານແລກປ່ຽນວັດທະນະທໍາ ລະຫວ່າງປະຊາຊົນຢູ່ຕາມຊາຍແດນ ລາວ-ຈີນ ເປັນເວທີສຳຄັນໃນການແລກປ່ຽນການພົວພັນຮ່ວມມືລະຫວ່າງປະຊາຊົນສົ່ງເສີມມິດຕະພາບແລະ ລົງເລິກການຮ່ວມມືການພັດທະນາຊຸກຍູ້ການແລກປ່ຽນການພົວພັນສ້າງຜົນດີງາມໃນການພັດທະນາຢູ່ເຂດຊາຍແດນພ້ອມທັງສ້າງບັນຍາກາດສັນຕິພາບຄວາມສາມັກຄີມິດຕະພາບການພັດທະນາແລະຄວາມຈະເລີນຮຸ່ງເຮືອງ.
ທ່ານ PENG SHAOYUN ເລຂາທິການສະມາຄົມມິດຕະພາບກັບຕ່າງປະເທດ ແຂວງຢຸນນານ ສປ ຈີນ ກ່າວວ່າ: ລາວແລະຈີນເປັນບ້ານໃກ້ເຮືອນຄຽງທີ່ດີທີ່ມີພູຜາແມ່ນ້ຳຕິດຈອດກັນແລະເປັນຄູ່ຮ່ວມມືທີ່ດີມີສາຍພົວພັນຢ່າງໃກ້ຊິດລະຫວ່າງປະຊາຊົນພາຍໃຕ້ການຊີ້ນຳທາງຍຸດທະສາດຂອງສະຫາຍ ສີຈິນຜິງເລຂາທິການໃຫຍ່ ປະທານປະເທດ ສປຈີນແລະ ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ສປປລາວ ການສ້າງຄູ່ຮ່ວມຊາຕາກໍາລາວ-ຈີນໄດ້ຮັບການພັດທະນາຢ່າງແຂງແຮງໃນຖານະທີ່ເປັນແຂວງດຽວຂອງປະເທດຈີນທີ່ມີຊາຍແດນຕິດກັບປະເທດລາວແຂວງຢຸນນານໄດ້ປະຕິບັດຄວາມເຫັນດີເຫັນພ້ອມທີ່ສຳຄັນຂອງການນຳສູງສຸດຂອງສອງພັກສອງລັດໄດ້ດຳເນີນແລະເລິກເຊິ່ງການຮ່ວມມືໃນຂົງເຂດຕ່າງໆຢ່າງຮອບດ້ານໂດຍອີງໃສ່ຫຼັກການທີ່ຕ່າງຝ່າຍຕ່າງມີຜົນປະໂຫຍດຊຸກຍູ້ສົ່ງເສີມແຜນການການສ້າງຄູ່ຮ່ວມຊາຕາກໍາລາວ-ຈີນຢ່າງຕັ້ງໜ້າການພົບປະແລກປ່ຽນການຢ້ຽມຢາມແບບຍາດພີ່ນ້ອງລະຫວ່າງສອງຝ່າຍນັບມື້ມີຄວາມແໜ້ນແຟ້ນ ການຮ່ວມມືດ້ານເສດຖະກິດ-ການຄ້າ ກ້າວເຂົ້າສູ່ຄວາມລວງເລິກຢ່າງບໍ່ຢຸດຢັ້ງ ການແລກປ່ຽນໃນຂົງເຂດວັດທະນະທຳ-ສັງຄົມ ໄດ້ຮັບການພັດທະນາແບບຍືນຍົງການກໍ່ສ້າງດ່ານທາງບົກເຂດຮ່ວມມືເສດຖະກິດບໍ່ຫານ ສປຈີນ-ບໍ່ເຕ່ນ ສປປ ລາວ ກໍາລັງຮັບການກໍ່ສ້າງຢ່າງເລັ່ງລັດ ຂະໜາດການຂົນສົ່ງຜູ້ໂດຍສານ ແລະສິນຄ້າຂອງເສັ້ນທາງລົດໄຟລາວ-ຈີນກ້າວຂຶ້ນສູ່ລະດັບໃໝ່ການກໍ່ສ້າງແລວເສດຖະກິດລາວ-ຈີນມີຄວາມກ້າວໜ້າຢ່າງບໍ່ຢຸດຢັ້ງ.
ປັດຈຸບັນແຂວງຢຸນນານກັບປະເທດລາວໄດ້ສ້າງເມືອງມິດຕະພາບສາກົນ8ເມືອງ ບ້ານມິດຕະພາບ4ບ້ານ ການຮ່ວມມືຂອງແຂວງຢຸນນານ ກັບປະເທດລາວ ໄດ້ຮັບການພັດທະນາຢ່າງຕັ້ງໜ້າ ໃນຊຸມປີຜ່ານມາແຂວງຢຸນນານໄດ້ປະຕິບັດ28ໂຄງການຂະໜາດນ້ອຍແຕ່ມີຜົນງານທີ່ດີຢູ່ລາວພາຍໃຕ້ຫົວຂໍ້ “ໂຄງການເຊື່ອມໂຍງຈິດໃຈພ້ອມກ້າວໄປກັບຢຸນນານ”ໂຄງການດັ່ງກ່າວໄດ້ກ່ຽວພັນເຖິງຂົງເຂດສັງຄົມແລະຊີວິດການເປັນຢູ່ຂອງປະຊາຊົນຕ່າງໆເຊັ່ນ: ການຍົກລະດັບພື້ນຖານໂຄງລ່າງຊົນນະບົດເຝິກອົບຮົມສີມືແຮງງານຂອງແມ່ຍິງ ການຮ່ວມມືດ້ານກະສິກຳ ການປົກປັກຮັກສາຊີວະນາໆພັນ ການກໍ່ສ້າງອາຄານໂຮງຮຽນ ການກໍ່ສ້າງໂຄງລ່າງສາທາລະນະສຸກຊົນນະບົດແລະອື່ນໆ ເຊິ່ງໄດ້ເສີມຂະຫຍາຍບົດບາດໃໝ່ເຂົ້າໃນສາຍພົວພັນມິດຕະພາບທີ່ເປັນມູນເຊື້ອລະຫວ່າງປະຊາຊົນແຂວງຢຸນນານແລະ ປະເທດລາວແລະ ນຳໝາກຜົນຕົວຈິງທີ່ໜ້າເພິ່ງພໍໃຈ.