ຕອນເຊົ້າຂອງວັນທີ 30 ມິຖຸນາ 2024 ນີ້ ອົງການປົກຄອງແຂວງວຽງຈັນ ໄດ້ຈັດພິທີປູກຕົ້ມໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ຄົບຮອບ 44 ປີ ( 1 ມິຖຸນາ 1980-1 ມິຖຸນາ 2024) ຕິດພັນກັບການສະເຫຼີມສະຫຼອງ ວັນສິ່ງແວດລ້ອມແຫ່ງຊາດ ຄົບຮອບ 25 ປີ ແລະ ວັນສິ່ງແວດລ້ອມໂລກຄົບຮອບ 52 ປີ, ພິທີດັ່ງກ່າວຈັດຂຶ້ນຢູ່ທີ່ ວັດປ່າຫາດກະແມດ ບ້ານບຸ່ງພ້າວ ເມືອງທຸລະຄົມ ແຂວງວຽງຈັນ, ໂດຍເປັນກຽດເຂົ້າຮ່ວມເປັນປະທານ ຂອງ ທ່ານ ດາວເຮືອງ ນັນທາວົງ ຮອງເຈົ້າແຂວງ ແຂວງວຽງຈັນ.
ໃນພິທີ ທ່ານ ສົມອົກ ໜໍ່ຈະເລີນ ຫົວໜ້າພະແນກກະສິກຳ ແລະ ປ່າໄມ້ ແຂວງວຽງຈັນ ໃຫ້ຮູ້ວ່າ: ຈຸດປະສົງຂອງພິທີຄັ້ງນີ້ ເພື່ອຜັນຂະຫຍາຍ-ຈັດຕັ້ງປະຕິບັດຄໍາເຫັນຊີ້ນໍາ ຂອງການນໍາແຂວງວຽງຈັນ ແລະ ກົດໝາຍວ່າດ້ວຍປ່າໄມ້ ສະບັບເລກທີ 64/ສພຊ, ລົງວັນທີ 13 ມິຖຸນາ 2019, ກົດໝາຍວ່າດ້ວຍສິ່ງແວດລ້ອມ, ຊຶ່ງພັກ ແລະ ລັດຖະບານ ໄດ້ກໍານົດເອົາວັນທີ 01 ມິຖຸນາ ເປັນວັນປູກຕົ້ນໄມ້ແຫ່ງຊາດ ແລະ ກົງກັບວັນເດັກນ້ອຍສາກົນ, ເພື່ອສ້າງສະຕິຮັກ, ຫວງແຫນໃນການປົກປັກຮັກສາພັດທະນາປ່າໄມ້, ທີ່ດິນປ່າໄມ້ ແລະ ສິ່ງແວດລ້ອມທໍາມະຊາດ ໃຫ້ແກ່ປະຊາຊົນບັນດາເຜົ່າ, ໂດຍສະເພາະແມ່ນອານຸຊົນຮຸ່ນຫຼັງ ແນໃສ່ເຮັດໃຫ້ປ່າໄມ້ມີຄວາມອຸດົມສົມບູນ ແລະ ບໍ່ບົກແຫ້ງ, ໂດຍໄດ້ຈັດພິທີປູກຕົ້ນໄມ້ແຫ່ງຊາດ ຂຶ້ນຢູ່ວັດປ່າຫາດກະແມດ ເປັນດິນລວມຂອງບ້ານ, ມີເນື້ອທີ່ທັງໝົດ 8 ເຮັກຕາ, ເປັນປ່າເຫຼົ່າ, ເນື້ອທີ່ສາມາດປູກໄມ້ໄດ້ ແມ່ນ 3,911 ເຮັກຕາ; ໄມ້ທີ່ນໍາມາປູກເປັນໄມ້ອຸດສະຫະກຳເຊັ່ນ: ໄມ້ຂະຍຸງ 650 ເບ້ຍ, ໄມ້ດູ່ລາຍ 350 ເບ້ຍ, ໄມ້ແຄນ 650 ເບ້ຍ ແລະ ໄມ້ດູ່ (ພັນພື້ນເມືອງ) 350 ເບ້ຍ ລວມທັງໝົດ 2.000 ເບ້ຍ.
ພ້ອມນີ້ ຍັງມີບໍລິສັດ, ຜູ້ປະກອບການ ເຊັ່ນ: ບໍລິສັດ ຟ້າໃສ ການຊ່າງ, ກໍ່ສ້າງ-ຂົວທາງ ແລະ ເຄຫາສະຖານ ຈໍາກັດ ຊ່ວຍກົນຈັກພ້ອມໃສ່ນໍ້າມັນລົດເຂົ້າໃນການບຸກເບີກເນື້ອທີ່ປູກໄມ້ ເປັນຈໍານວນເງິນ 7,900,000 ກີບ, ອົງການຈັດຕັ້ງບ້ານບຸ່ງພ້າວ ປະກອບສ່ວນນໍ້າມັນລົດຈົກ ເປັນເງິນ 5,000,000 ກີບ ແລະ ບໍລິສັດ ລາວອົດຊີ-ຢູລົບ ຂາເຂົ້າ-ຂາອອກ ຈຳກັດ ຜູ້ດຽວ ປະກອບສ່ວນການຈັດພິທີປູກຕົ້ນໄມ້ ເປັນເງິນຈໍານວນ 10,000,000 ກີບ.
ທ່ານ ດາວເຮືອງ ນັນທາວົງ ຮອງເຈົ້າແຂວງ ແຂວງວຽງຈັນ ໄດ້ກ່າວເປີດພິທີຢ່າງເປັນທາງການວ່າ: ໃນທຸກໆປີພໍໃກ້ຈະເຖິງວັນປູກຕົ້ນໄມ້ແຫ່ງຊາດ 1 ມິຖຸນາ, ຄະນະພັກ-ອົງການປົກຄອງ ແຂວງວຽງຈັນ ໄດ້ຖືສໍາຄັນຕໍ່ກັບວຽກງານດັ່ງກ່າວ, ໂດຍຫ້າງຫາກະກຽມວາງແຜນການປູກຕົ້ນໄມ້, ຂະຫຍາຍເນື້ອທີ່ປູກຕົ້ນໄມ້ ເພື່ອຟື້ນຟູປ່າໄມ້, ໂດຍມອບໃຫ້ພະແນກກະສິກໍາ ແລະ ປ່າໄມ້ແຂວງ, ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ, ກອງອຸທິຍານແຫ່ງຊາດ ແລະ ພາກສ່ວນກ່ຽວຂ້ອງ ເພື່ອກໍານົດວາງແຜນການຈັດພິທີປູກຕົ້ນໄມ້, ປຸກລະດົມອົງການຈັດຕັ້ງທັງພາກລັດ-ເອກະຊົນ, ພາກສ່ວນຕ່າງໆໃນສັງຄົມ ແລະ ປະຊາຊົນບັນດາເຜົ່າໃນທົ່ວແຂວງ ປູກຕົ້ນໄມ້ໃຫ້ຫຼາຍ ຫຼື ຢ່າງໜ້ອຍສຸດຄົນຜູ້ໜຶ່ງຕ້ອງປູກຕົ້ນໄມ້ຜູ້ລະ 1 ຕົ້ນ ໃນໄລຍະວັນປູກຕົ້ນໄມ້ແຫ່ງຊາດ ເພື່ອທົດແທນຕົ້ນໄມ້ທີ່ຕາຍແລ້ວ, ປູກຕົ້ນໄມ້ວັນນີ້ເພື່ອລູກຫລານໃນວັນໜ້າ ເຮັດໃຫ້ມີຮົ່ມເງົາ, ຂຽວສົດງົດງາມ, ອາກາດເຢັນສະບາຍ ແລະ ເພື່ອຄຸນປະໂຫຍດອື່ນໆ.
ພ້ອມນີ້, ທ່ານໄດ້ຮຽກຮ້ອງ ແລະ ເນັ້ນໜັກໃຫ້ຄະນະພັກ, ຄະນະນໍາທຸກຂັ້ນ ປຸກລະດົມທົ່ວສັງຄົມ ມີສ່ວນຮ່ວມຕໍ່ວຽກງານຄຸ້ມຄອງປ່າໄມ້, ບົວລະບັດຮັກສາຕົ້ນໄມ້ທີ່ປູກແລ້ວ ດ້ວຍການຫົດນໍ້າ, ໃສ່ຝຸ່ນ, ພູນດິນ, ເຮັດຮົ້ວອ້ອມ ແລະ ວິທີການອື່ນໆເພື່ອບໍ່ໃຫ້ຕົ້ນໄມ້ຕາຍ ຫຼື ຖືກທໍາລາຍ, ພ້ອມທັງມີສ່ວນຮ່ວມຢ່າງແຂງແຮງ ໃນການຈັດຕັ້ງປະຕິບັດຄໍາສັ່ງເລກທີ 11/ນຍ ລົງວັນທີ 21 ກໍລະກົດ 2023 ວ່າດ້ວຍການເພີ່ມທະວີຄວາມເຂັ້ມງວດ ໃນການຄຸ້ມຄອງ, ປົກປັກຮັກສາ, ພັດທະນາ ແລະ ນໍາໃຊ້ປ່າໄມ້, ທີ່ດິນປ່າໄມ້, ຕ້ານ ແລະ ສະກັດກັ້ນການບຸກລຸກທໍາລາຍປ່າໄມ້, ທີ່ດິນປ່າໄມ້ ແລະ ໄຟໄໝ້ລາມປ່າ.
ຮອງເຈົ້າແຂວງ ຍັງໄດ້ນໍາເອົາສານຂອງທ່ານນາຍົກລັດຖະມົນຕີແຫ່ງ ສປປ ລາວ ຕໍ່ກັບການຈັດຕັ້ງປະຕິບັດວັນປູກຕົ້ນໄມ້ແຫ່ງຊາດ, ວັນສິ່ງແວດລ້ອມແຫ່ງຊາດ ແລະ ວັນສິ່ງແວດລ້ອມໂລກ ປະຈຳປີ 2024 ມາເຜີຍແຜ່ເຊື່່ອມຊຶມຕໍ່ພິທີໃຫ້ບັນດາຜູ້ເຂົ້າຮ່ວມຮັບຮູ້ເຂົ້າໃຈ ແລະ ເນັ້ນໜັກໃນຫລາຍບັນຫາສໍາຄັນທີ່ເປັນປະໂຫຍດ; ຕໍ່ຈາກນັ້ນພະນັກງານວິຊາການຂອງຂະແໜງປ່າໄມ້ ພະແນກກະສິກໍາ ແລະ ປ່າໄມ້ແຂວງວຽງຈັນ ໄດ້ຂຶ້ນແນະນໍາ, ສາທິດຂັ້ນຕອນວິທີການປູກຕົ້ນໄມ້ທີ່ຖືກຕ້ອງ.
ຂ່າວ-ພາບ: ຫລ້າທໍ່ ປາຈ້າທໍ່;
ຜູ້ກວດຂ່າວ: ບ່າວທົ່ງ-ລ້ອງງື່ມ.
