ໃນໄລຍະ 4 ເດືອນຕົ້ນປີ 2024 ນີ້, ສະພາການຄ້າ ແລະ ອຸດສາຫະກຳ ແຂວງວຽງຈັນ ໄດ້ເອົາໃຈໃສ່ຊຸກຍູ້ສົ່ງເສີມ ຫົວໜ່ວຍທຸລະກິດພາຍໃນແຂວງ ຜະລິດເປັນສິນຄ້າກະສິກຳ ສົ່ງອອກໄປຕ່າງປະເທດ ໄດ້ທັງໝົດ 252.371 ໂຕນ. ໃນນັ້ນ, ສົ່ງອອກໄປ ສປ ຈີນ 248.800 ໂຕນ ມູນຄ່າ 55 ລ້ານໂດລາສະຫະລັດ, ສສ ຫວຽດນາມ 3.571 ໂຕນ, ມູນຄ່າ 790.000 ໂດລາສະຫະລັດ, ຄາດວ່າໃນ 6 ເດືອນທ້າຍປີ 2024 ຈະສູ້ຊົນສົ່ງອອກສິນຄ້າກະສິກຳ ໃຫ້ໄດ້ 6 ແສນໂຕນ.
ທ່ານ ຂັນທອງ ດວງປະເສີດ ປະທານສະພາການຄ້າ ແລະ ອຸດສາຫະກຳ ແຂວງວຽງຈັນ ໄດ້ໃຫ້ສຳພາດໃນວັນທີ 25 ພຶດສະພາ 2024 ວ່າ: ໃນໄລຍະຜ່ານມາ ສະພາການຄ້າ ແລະ ອຸດສາຫະກຳ ແຂວງວຽງຈັນ ໄດ້ເອົາໃຈໃສ່ຊຸກຍູ້-ສົ່ງເສີມ ບັນດາຫົວໜ່ວຍທຸລະກິດຜະລິດເປັນສິນຄ້າ, ພັດທະນາຜະລິດຕະພັນ ທີ່ມີຄຸນະພາບ ເພື່ອສະໜອງຕະຫລາດທັງພາຍໃນ ແລະ ສົ່ງອອກໄປຕ່າງປະເທດ ເຊິ່ງສິນຄ້າສົ່ງອອກຂອງແຂວງ ໂດຍຜ່ານການອອກໃບຢັ້ງຢືນແຫລ່ງກຳເນີດສິນຄ້າປະກອບມີ: ໝາກກ້ວຍ, ໝາກໂມ, ໝາກກ້ຽງ, ໝາກອຶ, ມັນຕົ້ນ, ຢາງພາລາ ເຊິ່ງໃນໄລຍະ 4 ເດືອນຕົ້ນປີນີ້, ໄດ້ສົ່ງອອກໄປ ສປ ຈີນ 248.800 ໂຕນ. ນອກນັ້ນ, ຍັງມີ ເຂົ້າເປືອກ ສົ່ງອອກໄປ ສສ ຫວຽດນາມ ໄດ້ 3.571 ໂຕນ ໂດຍຍຸດທະສາດການພັດທະນາເສດຖະກິດ ຂອງແຂວງວຽງຈັນ ກໍແມ່ນຖືເອົາການຜະລິດກະສິກຳ ເປັນສິນຄ້າ ເປັນເປົ້າໝາຍບຸລິມະສິດ. ປັັດຈຸບັນ, ມີນັກທຸລະກິດເຂົ້າມາລົງທຶນຢູ່ແຂວງວຽງຈັນ 30 ກ່ວາ ຫົວໜ່ວຍ. ໃນນັ້ນ, ບໍລິສັດ ທີ່ສົ່ງສິນຄ້າກະສິກຳ ອອກຕ່າງປະເທດ ມີທັງໝົດ 13 ບໍລິສັດໃຫຍ່.
ທ່ານ ຂັນທອງ ດວງປະເສີດ ຍັງໃຫ້ຮູ້ອີກວ່າ: ຕະຫລອດໄລຍະຜ່ານມາ, ສະພາການຄ້າ ແລະ ອຸດສາຫະກຳ ແຂວງວຽງຈັນ ໄດ້ເອົາໃຈໃສ່ ຈັດຕັ້ງຜັນຂະຫຍາຍ ຍຸດທະສາດ ພັດທະນາທຸລະກິດ ຮອດ 2025 ຂອງ ສະພາການຄ້າ ແລະ ອຸດສາຫະກຳ ແຫ່ງຊາດ ຕາມ 6 ເສົາຄໍ້າ. ປັດຈຸບັນ, ແຂວງວຽງຈັນ ໄດ້ຈັດຕັ້ງຜັນຂະຫຍາຍສ້າງເປັນແຜນການເຄື່ອນໄຫວ ເປັນແຕ່ລະປີ ໂດຍມີການກໍານົດຈຸດສຸມຕົ້ນຕໍ ໃນການປະຕິບັດຄື: ເອົາການພົບປະພາກລັດ-ພາກທຸລະກິດ ເພື່ອສ້າງແວດລ້ອມທຸລະກິດທີ່ດີ ເພື່ອເຂົ້າສູ່ການຈັດຕັ້ງປະຕິບັດວຽກງານຈຸດສຸມອື່ນ ໃຫ້ມີຄວາມຄ່ອງຕົວ ແລະ ອື່ນໆ. ພ້ອມນີ້, ຍັງໄດ້ສຸມໃສ່ 4 ຂະແໜງການຫລັກ ໂດຍເລັ່ງໃສ່ທຸລະກິດ ການທ່ອງທ່ຽວ, ຜະລິດກະສິກຳເປັນສິນຄ້າ ເພື່ອສະໜອງໃຫ້ແກ່ການສຶກສາຄວາມເປັນໄປໄດ້ໃນການສ້າງໂຄງການ ລົງທຶນສົ່ງເສີມໃນຕໍ່ໜ້າ, ພ້ອມທັງ ປຸກລະດົມຂົນຂວາຍຫົວໜ່ວຍທຸລະກິດພາຍໃນແຂວງ, ຕ່າງແຂວງ ຫລື ຕ່າງປະເທດ ທີ່ມາເຄື່ອນໄຫວທຸລະກິດ ຢູ່ພາຍໃນແຂວງ ເຂົ້າເປັນສະມາຊິກ ສະພາການຄ້າ ແລະ ອຸດສາຫະກຳແຂວງ ໃຫ້ເພີ່ມຂຶ້ນ ແລະ ສ້າງຕັ້ງກຸ່ມທຸລະກິດຕາມປະເພດວິສາຫະກິດ ທີ່ຍັງບໍ່ທັນໄດ້ສ້າງຕັ້ງ ແລະ ຕິດຕາມກຸ່ມທີ່ມີການຈັດຕັ້ງຜ່ານມາແລ້ວ ເປັນຕົ້ນ ກຸ່ມທຸລະກິດກະສິກຳ, ກຸ່ມທຸລະກິດອຸດສາຫະກຳປຸງແຕ່ງ, ກຸ່ມຫັດຖະກຳ, ກຸ່ມທຸລະກິດການທ່ອງທ່ຽວ ແລະ ກຸ່ມທຸລະກິດການຄ້າ-ການບໍລິການຕ່າງໆ ເພື່ອມີການຄຸ້ມຄອງ, ຊຸກຍູ້ສົ່ງເສີມໃຫ້ມີການພັດທະນາ ດ້ານເຕັກນິກ ແລະ ການເຂົ້າຫາຕະຫລາດ.
ຂ່າວ-ພາບ: ກິດຕາ
