ການກະກຽມແກ່ການສອບເສັງຈົບຊັ້ນສາຍສາມັນສຶກສາ ປະຈຳສົກປີ 2023-2024 ໃນທົ່ວແຂວງວຽງຈັນ ແມ່ນພ້ອມແລ້ວ ໂດຍພະແນກສຶກສາທິການ ແລະ ກິລາແຂວງ ໄດ້ອອກໜັງສືແຈ້ງການເຖິງຫ້ອງການສຶກສາທິການ ແລະ ກິລາ 11 ເມືອງ ກ່ຽວກັບການກະກຽມ ແລະ ຈັດຕັ້ງປະຕິບັດການສອບເສັງຈົບຊັ້ນສາຍສາມັນສຶກສາ ໃນຊັ້ນ ປ5 ເອກະພາບກັນໃນທົ່ວແຂວງ ແລະ ຊັ້ນ ມ4, ມ7 ເອກະພາບກັນໃນທົ່ວປະເທດ, ເຊິ່ງທົ່ວແຂວງ ມີສູນສອບເສັງທັງໝົດ 109 ສູນ, 885 ຫ້ອງ ໃນນີ້, ຊັ້ນ ປ5 ມີ 65 ສູນ, ມີ 386 ຫ້ອງ; ຊັ້ນ ມ4 ມີ 29 ສູນ, ມີ 282 ຫ້ອງ ແລະ ຊັ້ນ ມ7 ມີ 15 ສູນ, ມີ 217 ຫ້ອງ.
ທ່ານ ອ໋ອດ ແສງພິມ ຫົວໜ້າພະແນກສຶກສາທິການ ແລະ ກິລາ ແຂວງວຽງຈັນ ໄດ້ໃຫ້ສຳພາດເມື່ອບໍ່ດົນມານີ້ວ່າ: ປັດຈຸບັນ ແຂວງວຽງຈັນ ແມ່ນມີຄວາມພ້ອມແລ້ວ ສຳລັບການຈັດຕັ້ງສອບເສັງຈົບຊັ້ນສາຍສາມັນສຶກສາ (ປ5, ມ4, ມ7) ໃນທົ່ວແຂວງ, ເຊິ່ງໃນຊັ້ນ ປ5 ຈະເລີ່ມສອບເສັງໃນວັນທີ 28-29 ພຶດສະພາ 2024 ນີ້, ກຳນົດວິຊາເສັງ 3 ວິຊາຄື: ພາສາລາວ-ວັນນະຄະດີ, ຄະນິດສາດ ແລະ ວິທະຍາສາດ-ສິ່ງແວດລ້ອມ. ຊັ້ນ ມ4 ຈະສອບເສັງວັນທີ 11-13 ມິຖຸນາ 2024, ກຳນົດວິຊາສອບເສັງ 5 ວິຊາຄື: ພາສາລາວ-ວັນນະຄະດີ, ຄະນິດສາດ, ວິທະຍາສາດທຳມະຊາດ, ກຸ່ມວິທະຍາສາດສັງຄົມ ແລະ ພາສາອັງກິດ.
ສ່ວນຊັ້ນ ມ7 ຈະສອບເສັງວັນທີ 19-21 ມິຖຸນາ 2024 ກຳນົດວິຊາສອບເສັງ 5 ວິຊາ ຄື: ຄະນິດສາດ, ກຸ່ມວິທະຍາສາດທຳມະຊາດ, ກຸ່ມວິທະຍາສາດສັງຄົມ, ພາສາລາວ-ວັນນະຄະດີ ແລະ ພາສາອັງກິດ ພ້ອມທັງໄດ້ວາງຄາດໝາຍຜົນການສອບເສັງ ໃນຊັ້ນ ປ5 ໃຫ້ໄດ້ 93,50%, ຊັ້ນ ມ4 ໃຫ້ໄດ້ 95% ແລະ ຊັ້ນ ມ7 ໃຫ້ໄດ້ 96,50%.
