ແຂວງວຽງຈັນ ຮັບຮອງເອົານິຕິກຳຄຸ້ມຄອງກິດຈະກຳການທ່ອງທ່ຽວທາງນ້ຳ

ໃນໂອກາດດໍາເນີນ ກອງປະຊຸມສະໄຫມສາມັນເທື່ອທີ 7 ຂອງສະພາປະຊາຊົນແຂວງວຽງຈັນ ຊຸດທີ II ທີ່ເມື່ອບໍ່ດົນມານີ້. ບັນດາຜູ້ແທນກອງປະຊຸມໄດ້ພ້ອມກັນຄົ້ນຄວ້າ, ປະກອບຄຳຄິດຄຳເຫັນ ເພື່ອພິຈາລະນາ ແລະ ຮັບຮອງເອົາ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງກິດຈະການທ່ອງທ່ຽວທາງນ້ຳ ຢູ່ແຂວງວຽງ ຈັນ ທີ່ສະເໜີໂດຍ ທ່ານ ສີສະຫວາດ ແສງພະຈັນ, ຫົວໜ້າພະແນກ ຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງວຽງຈັນ,

ຂໍ້ຕົກລົງສະບັບນີ້ ປະກອບມີ 9 ໝວດ 32 ມາດຕາ ໄດ້ກຳນົດຫຼັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງກິດຈະການທ່ອງທ່ຽວທາງນ້ຳ ຢູ່ແຂວງວຽງຈັນ ເພື່ອເຮັດໃຫ້ວຽກງານດັ່ງກ່າວ ມີປະສິດທິພາບ ແລະ ປະສິດທິຜົນ ແນໃສ່ຊຸກຍູ້, ສົ່ງເສີມ ແລະ ພັດທະນາວຽກງານການທ່ອງທ່ຽວໃຫ້ຂະຫຍາຍຕົວ, ຍືນຍົງ, ກາຍເປັນອຸດສາຫະກຳທ່ອງທ່ຽວທີ່ທັນສະໄໝ.

ກິດຈະການທ່ອງທ່ຽວທາງນໍ້າຢູ່ແຂວງວຽງຈັນ ແມ່ນການເຄື່ອນໄຫວວຽກງານກ່ຽວກັບການບໍລິການທ່ອງທ່ຽວຕາມແມ່ນໍ້າ, ແຄມນໍ້າ, ເກາະ, ອ່າງນໍ້າ, ພື້ນນໍ້າ, ດອນ, ແລະ ຫາດ…ຢູ່ພາຍໃນແຂວງວຽງຈັນ; ການຄຸ້ມຄອງກິດຈະການທ່ອງທ່ຽວທາງນ້ຳ ຢູ່ແຂວງວຽງຈັນແມ່ນການຈັດຕັ້ງປະຕິບັດບັນດາຫຼັກການ,ລະບຽບການ ແລະ ມາດຕະການກ່ຽວກັບການຄຸ້ມຄອງກິດຈະການທ່ອງທ່ຽວຕາມແມ່ນໍ້າຢູ່ພາຍ ໃນແຂວງວຽງຈັນໃຫ້ຖືກຕ້ອງຕາມກົດໝາຍ, ລະບຽບການ, ສອດຄ່ອງກັບສະພາບຄວາມເປັນຈິງ, ໂປ່ງໄສ, ປອດໄພ, ເປັນເອກະພາບມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ.

ຂໍ້ຕົກລົງສະບັບນີ້ ໄດ້ແບ່ງຂັ້ນຄຸ້ມຄອງຢ່າງລະອຽດຈະແຈ້ງ ລະຫວ່າງ ພະແນກຖະແຫຼງຂ່າວ, ວັດທະນະ ທຳ ແລະ ທ່ອງທ່ຽວແຂວງ ກັບ ຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ.

#ຂ່າວອອນລາຍ #ວສລ

ຂໍ້ມູນ: ບຸນມາ ແກ້ວບຸດດາ