ພິທີໄຂສົກຮຽນໃໝ່ 2024-2025 ຂອງແຂວງວຽງຈັນ ຈັດຂຶ້ນໃນວັນທີ 2 ກັນຍາ 2024 ທີ່ໂຮງຮຽນ ມສ ທ່າຊັນ ເມືອງແກ້ວອຸດົມ ໂດຍການເປັນປະທານຂອງ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ, ທ່ານ ຈັນສົມ ແກ້ວມະນີວົງ ຮອງຫົວ ໜ້າພະແນກ ສຶກສາທິການ ແລະ ກິລາ ພ້ອມດ້ວຍຄູອາຈານ ແລະ ນັກຮຽນເຂົ້າຮ່ວມຢ່າງພ້ອມພຽງ.
ທ່ານ ຈັນສົມ ແກ້ວມະນີວົງ ກ່າວວ່າ: ໃນສົກຮຽນ 2023- 2024 ທົ່ວແຂວງ ມີຜູ້ບໍລິຫານການສຶກສາ,ຄູສອນທັງພາກລັດ ແລະ ເອກະຊົນທັງໝົດ 5.884 ຄົນ ຍິງ 2.716 ຄົນ ມີໂຮງຮຽນທັງໝົດ 718 ແຫ່ງ, ໂຮງຮຽນລ້ຽງເດັກອະນຸບານ 213 ແຫ່ງ, ປະຖົມ 403 ແຫ່ງ, ມັດທະຍົມ 102 ແຫ່ງ, ມີນັກຮຽນທັງໝົດ 104.808 ຄົນ ຍິງ 51.611 ຄົນ ແລະ ນັກຮຽນສົງ 268 ອົງ. ສ່ວນອັດຕາການເຂົ້າຮຽນຂອງເດັກ 0-2 ປີ ປະຕິບັດໄດ້ 6,7%, 3-4 ປີປະຕິບັດໄດ້ 53,8%, 3-5 ປີປະຕິບັດໄດ້ 64,1%, ເດັກໃນເກນອາຍຸ 5 ປີ ປະຕິບັດໄດ້ 82,7%; ຊັ້ນປະຖົມອັດຕາເຂົ້າຮຽນລວມປະຕິບັດໄດ້ 100,6%, ຊັ້ນມັດທະຍົມຕອນຕົ້ນ ປະຕິບັດໄດ້ 84,1%, ມັດທະຍົມຕອນປາຍປະຕິບັດໄດ້ 52,5%. ສຳລັບສົກຮຽນ 2024-2025 ມີແຜນເຮັດໃຫ້ອັດຕາເຂົ້າຮຽນ ໃນເກນອາຍຸຕ່າງໆ, ອັດຕາເຂົ້າຮຽນໃນຊັ້ນປະ ຖົມ ແລະ ມັດທະຍົມ ເພີ່ມຂຶ້ນ ແລະ ປະຕິບັດຕາມໂຄງການຫລັກ ສູດຢ່າງເຂັ້ມງວດ ເພື່ອເຮັດໃຫ້ຄຸນນະພາບ ຂອງການສຶກສາດີຂຶ້ນກວ່າເກົ່າ.
ໃນໂອກາດນີ້, ທ່ານ ຄຳພັນ ສິດທິດຳພາ ໄດ້ຊີ້ນຳ ແລະ ເນັ້ນໃຫ້ຜູ້ບໍລິຫານການສຶກສາ ຄູອາຈານເອົາໃຈໃສ່ຫລາຍບັນຫາ ເປັນຕົ້ນ ສຶກສາອົບຮົມການເມືອງແນວຄິດ ປູກຈິດສໍານຶກທີ່ດີໃຫ້ຄູອາຈານແລະ ນັກຮຽນຢ່າງປົກກະຕິຕໍ່ເນື່ອງ, ເຮັດຫລາຍຮູບ ແບບ, ສອດຄ່ອງກັບແຕ່ລະກຸ່ມເປົ້າໝາຍ, ເຮັດໃຫ້ຄູອາຈານ, ນັກຮຽນມີຄຸນສົມບັດສິນທໍາປະຕິວັດ, ມີຄວາມຈົງຮັກພັກດີ, ມີນໍ້າໃຈຮັກຊາດ, ຮັກການຮຽນ, ມີຄວາມຮັບຜິດຊອບຕໍ່ໜ້າທີ່ວຽກງານ ທີ່ໄດ້ຮັບມອບໝາຍ.
ພ້ອມທັງຕັ້ງໜ້າຂຶ້ນຫ້ອງສິດສອນ ໃຫ້ດີ, ເຮັດທຸກຢ່າງຖ່າຍ ທອດຄວາມຮູ້ ບົດຮຽນວິຊາການ ໃຫ້ນ້ອງນັກຮຽນເຂົ້າໃຈ, ຈົດຈໍາໄດ້, ເຂົ້າໃຈງ່າຍ, ຈື່ດົນ, ເອົາໃຈໃສ່ຝຶກຝົນຫລໍ່ຫລອມຕົນເອງ ໃຫ້ມີຄວາມຮູ້ຫລາຍດ້ານ ໂດຍສະເພາະ ທິດສະດີການເມືອງ ແນວທາງຂອງພັກ, ກົດໝາຍຂອງລັດ, ມີຄວາມຮູ້ທາງວິທະຍາ ສາດ ວິທະຍາການຢ່າງເລິກເຊິ່ງ, ມີຄວາມສາມາດ ໃນການນໍາເອົາຄວາມຮູ້ດັ່ງກ່າວ ຖ່າຍທອດໃຫ້ນັກຮຽນ ແລະ ນໍາໄປໝູນໃຊ້ໃຫ້ເກີດປະໂຫຍດສູງສຸດ. ພ້ອມນີ້, ໃຫ້ເອົາໃຈໃສ່ນໍາພານັກຮຽນ ເຄື່ອນໄຫວນອກຫລັກສູດໃນຫລາຍຮູບແບບ ແລະ ຫລາຍກິດຈະກໍາ ທາງດ້ານພາລະສຶກສາ, ສິລະປະສຶກສາ ແລະ ແຮງງານສຶກສາ ໃຫ້ມີຜົນສຳເລັດດີຂຶ້ນກວ່າເກົ່າ.
