ແຫລ່ງຂ່າວຈາກແຂວງສາລະວັນ ໃຫ້ຮູ້ວ່າ: ຜູ້ຕິດເຊື້ອພະຍາດໂຄວິດ-19 ຢູ່ແຂວງສາລະວັນ ຈໍານວນ 3 ຄົນຄື: ຜູ້ທີ 1 ເປັນເພດຊາຍ ອາຍຸ 27 ປີ ປັດຈຸບັນ ຢູ່ບ້ານຫາດດູ່ ເມືອງຄົງເຊໂດນ, ຜູ້ທີ 2 ເພດຊາຍ ອາຍຸ 35 ປີ, ບ້ານສູງ ເມືອງສາລະວັນ ແລະ ຜູ້ທີ 3 ເພດຍິງ ອາຍຸ 32 ປີ ບ້ານສູງ ເມືອງສາລະວັນ ເຊິ່ງທີ່ເປັນແຮງງານລາວທີ່ເດີນທາງມາຈາກປະເທດເພື່ອນບ້ານ ໄດ້ຮັບການປີ່ນປົວຫາຍດີ ແລະ ຈັດສົ່ງກັບບ້ານແລ້ວ ໃນວັນທີ 28 ກໍລະກົດ ຢູ່ທີ່ສູນຈໍາກັດບໍລິເວນ ໂຮງຮຽນສາມັນກິນນອນຊົນເຜົ່າແຂວງ ໂດຍມີ ທ່ານ ດຣ ວົງດາວ ສຸລິນທາ ຮອງຫົວໜ້າພະແນກສາທາລະນະສຸກແຂວງ, ກອງເລຂາຄະນະສະເພາະກິດໂຄວິດ-19 ພ້ອມດ້ວຍແພດໝໍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທີມງານແພດໝໍ, ພະຍາບານ ເອົາໃຈໃສ່ປີ່ນປົວ ແລະ ຕິດຕາມອາການຢ່າງເປັນປົກກະຕິ ເຮັດໃຫ້ອາການຂອງພວກກ່ຽວດີຂຶ້ນ, ຜ່ານການກວດຫາເຊື້ອພະຍາດໂຄວິດ-19 ຈໍານວນຫລາຍຄັ້ງ ແມ່ນບໍ່ພົບເຊື້ອ ແລະ ບໍ່ມີອາການຕ່າງໆ, ໂຮງໝໍແຂວງສາລະວັນ ຈິ່ງໄດ້ຢັ້ງຢືນ ແລະ ຈັດສົ່ງກັບບ້ານຢ່າງເປັນທາງການ, ທັງໄດ້ແນະນຳເອົາໃຈໃສ່ປະຕິບັດ ຕໍ່ຕົນເອງຕື່ມອີກ ເປັນຕົ້ນ ຈໍາກັດບໍລິເວນຕົນເອງ, ຫ້າມບໍ່ໃຫ້ພົວພັນກັບຄົນໃນຄອບຄົວ ຫລືເດີນທາງໄປ-ມາຫາສູ່ກັນພາຍໃນຊຸມຊົນ-ສັງຄົມຢ່າງເດັດຂາດ ເພື່ອສືບຕໍ່ຕິດຕາມອາການຂອງຕົນເອງ ແລະ ຕ້ອງປະຕິບັດຕາມມາດຕະການປ້ອງກັນພະຍາດໂຄວິດ-19 ຢ່າງເຄັ່ງຄັດ.
ຂ່າວ: ກິນດາວັນ ອ້ວນນາຄູ
Loading...