ດຣ ວົງດາວ ສຸລິນທາ ຮອງຫົວໜ້າພະແນກສາທາລະນະສຸກແຂວງສາລະວັນ ໄດ້ໃຫ້ສໍາພາດກັບສື່ມວນຊົນໃນຄັ້ງວັນທີ 12 ກັນຍາ 2022 ວ່າ: ໂດຍລວມແລ້ວການຈັດຕັ້ງປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ແຂວງສາລະວັນໄລຍະການແຜ່ລະບາດຂອງພະຍາດ ມີຫຼາຍດ້ານໄດ້ຮັບຜົນສໍາເລັດເປັນຢ່າງດີ, ຢ່າງຕັ້ງໜ້າ ແລະ ທຸກຄົນໃນສັງຄົມມີສ່ວນຮ່ວມເປັນເຈົ້າການ, ທັງປະຕິບັດຕາມມາດຕະການ, ຄໍາສັ່ງ, ຄໍາແນະນຳຂອງແພດໝໍ, ຂອງຄະນະສະເພາະກິດ ໂດຍສະເພາະແມ່ນໄດ້ຮັບການສະໜັບສະໜູນດ້ານອຸປະກອນ ແລະ ເຄື່ອງມືທີ່ຈໍາເປັນຈາກອົງການຢູນີເຊັບ (Unicef) ເປັນຕົ້ນໂທລະໂຄ່ງຈໍານວນ 10 ຊຸດ, ຕູ້ລໍາໂພງ 10 ໜ່ວຍ ແລະ ແອວຊີດີ 10 ຊຸດ ເຮັດໃຫ້ການປະຕິບັດໜ້າທີ່ວຽກງານການໂຄສະນາດ້ານສຸຂະສຶກສາປະຊາສໍາພັນໃຫ້ແຕ່ລະກຸ່ມເປົ້າໝາຍເຂົ້າໃຈຢ່າງເລິກເຊິ່ງ, ກວ້າງຂວາງສາມາດປຸກລະດົມສັງຄົມໃຫ້ປະຊາຊົນມີຄວາມໝັ້ນໃຈ, ນອກຈາກນັ້ນຍັງໄດ້ນໍາໃຊ້ຕິດລົດໂຄສະນາເຄື່ອນທີ່ຕາມສາຍທາງ, ໃນແຕ່ລະຊຸມຊົນ, ເຂດຫ່າງໄກສອກຫຼີກ ແລະ ຈຸດຄົງທີ່ຕາມສູນບໍລິການຕ່າງໆເຊັ່ນ: ສູນປິ່ນປົວໂຮງຮຽນຊົນເຜົ່າ, ສູນຈໍາກັດບໍລິເວນ ວິທະຍາໄລຄູສາລະວັນ, ສູນ ມສ ອົງແກ້ວ, ສູນ ມສ ສາລະວັນ, ສູນ ມສ ນາຂ້ອຍສາວ ແລະ ຈຸດຈໍາກັດບໍລິເວນໂຮງຮຽນການເມືອງການປົກຄອງ ເພື່ອໂຄສະນາປະກາດແຈ້ງການ, ລາຍການໂຄສະນາຕ່າງໆ ໃຫ້ຜູ້ທີ່ກັກໂຕມີຄວາມຮັບຮູ້ກ່ຽວກັບມາດຕະການການປ້ອງກັນພະຍາດໂຄວິດ-19 ແລະ ປຸກລະດົມທຸກຄົນໃນທົ່ວສັງຄົມ ເຂົ້າຮ່ວມການສັກວັກຊິນ ເພີ່ມພູມຄຸ້ມກັນຕໍ່ກັບພະຍາດດັ່ງກ່າວ, ເຊິ່ງນັບແຕ່ເດືອນມີນາ 2021 ເປັນຕົ້ນມາຮອດປະຈຸບັນ ທຸກກຸ່ມເປົ້າໝາຍໄດ້ຮັບການສັກຢາວັກຊິນ ເຂັມທີ1 ກວມໄດ້ 80% ຂອງຈໍານວນປະຊາກອນທົ່ວແຂວງ, ເຂັມ2ຍັງຢູ່ 66,6% ແລະ ເຂັມກະຕຸ້ນທີ1 ຍັງຢູ່ 26% ແລະ ເຂັມກະຕຸ້ນ2 ຍັງຢູ່ໃນ 4% ສໍາລັບເດັກ 6-11 ປີ, 12-17 ປີ ແມ່ນຍັງບໍ່ທັນບັນລຸຄາດໝາຍໂດຍວັກຊິນເລີ່ມຕົ້ນແມ່ນນໍາໃຊ້ ຊິນໂນຟາມ, ຊິນໂນແວັກ, ຈອນສັນແອນຈອນສັນ, ແອດຕຣາເຊນິກາ ແລະ ໄຟ໌ເຊີ້ ໄດ້ມີການບໍລິການຢູ່ຕາມສະຖານທີ່ຕ່າງໆເຊັ່ນ: ໂຮງໝໍແຂວງ, ໂຮງໝໍຊຸມຊົນ (ໂຮງໝໍເມືອງ)ໃນແຕ່ລະເມືອງ, ໂຮງໝໍນ້ອຍ ແລະ ໄດ້ເຄື່ອນທີ່ລົງໄປສັກໃນແຕ່ລະບ້ານ ພ້ອມດຽວກັນນັ້ນຍັງໄດ້ເຄື່ອນໄຫວບໍລິການຕາມສະຖານທີ່ຊຸມຊົນເປັນຕົ້ນຕະຫຼາດ, ສະໂມສອນແຂວງ, ຕາມບັນດາໂຮງຮຽນມັດທະຍົມ, ປະຖົມ ເຊິ່ງລ້າສຸດແມ່ນໄດ້ບໍລິການກວດລ້າງສັກຢາຕາມສໍານັກງານ, ຫ້ອງການ, ພະແນກການຕ່າງໆອ້ອມຂ້າງແຂວງ, ເມືອງ ໂດຍເລັງໃສ່ວັກຊິນ ໄຟ໌ເຊີ ເປັນເຂັມກະຕຸ້ນ.
ໂອກາດດຽວກັນນີ້ ດຣ ວົງດາວ ສຸລິນທາ ກໍໄດ້ກ່າວສະແດງຄວາມຂອບໃຈມາຍັງ ອົງການຢູນີເຊັບ ທີ່ໄດ້ໃຫ້ການສະໜັບສະໜູນຊ່ວຍເຫຼືອດ້ານອຸປະກອນໃນການໂຄສະນາດ້ານສຸຂະສຶກສາໃຫ້ມີຄວາມສະດວກສະບາຍໃນການໂຄສະນາປຸກລະດົມຊ່ວຍນໍາບັນດາເມືອງເຫັນວາເກີດປະໂຫຍດຫຼາຍເຊິ່ງໄດ້ເຮັດໃຫ້ປະຊາຊົນຊຸມຊົນມີຄວາມເຂົ້າໃຈ ແລະ ຮູ້ຈັກຄວບຄຸມການແຜ່ລະບາດຂອງພະຍາດໂຄວິດ-19 ແລະ ພະຍາດຕ່າງໆ ແລະ ພ້ອມທີ່ຈະນໍາໃຊ້ເຂົ້າໃນວຽກງານດັ່ງກ່າວໃຫ້ເກີດປະໂຫຍດສູງສຸດ ແລະ ຫວັງຢ່າງຍິ່ງວ່າຄົງຈະໄດ້ຮັບການຊ່ວຍເຫຼືອອີກໃນຄັ້ງຕໍ່ໄປ.
ໂດຍ: ກິນດາວັນ ອ້ວນນາຄູ
