ພະແນກ ຊັບພະຍາກອນ ທຳມະຊາດ ແລະ ສິ່ງແວດລ້ອມ ແຂວງຫລວງນ້ຳທາ ຮ່ວມກັບຫ້ອງການກະສິກຳ ແລະ ຊົນນະບົດຊຽງຮຸ່ງ ກິ່ງແຂວງສິບສອງພັນນາ ແຂວງຢຸນນານ ສປ ຈີນ ຈັດກິດຈະກຳປ່ອຍປາ ແລະ ສັດນໍ້າ ຄືນສູ່ແຫລ່ງນໍ້າທຳມະຊາດ ໃນວັນທີ 12 ກໍລະກົດ 2024 ທີ່ວັງສະຫງວນ ບ້ານດອນສຳພັນ ເມືອງ ແລະ ແຂວງຫລວງນ້ຳທາ ເນື່ອງໃນໂອກາດ ວັນປ່ອຍປາ ແລະ ສັດນໍ້າ ແຫ່ງຊາດ 13 ກໍລະກົດ ທັງກົງກັບວັນເກີດ ຂອງ ປະທານ ສຸພານຸວົງ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ໂດຍການເຂົ້າຮ່ວມຂອງທ່ານ ວຽງສະຫວັດ ສີພັນດອນ ເຈົ້າແຂວງໆຫລວງນ້ຳທາ, ທ່ານ ເຫີ ຈ້ຽນປ່ຽວ ຮອງຫົວໜ້າສູນສົ່ງເສີມເຕັກນິກການປະມົງ ຫ້ອງການກະສິກຳ ແລະ ຊົນນະບົດຊຽງຮຸ່ງ ກິ່ງແຂວງສິບສອງພັນນາ ແຂວງຢຸນນານ ສປຈີນ ພ້ອມດ້ວຍບັນດາຜູ້ຕາງໜ້າຈາກພະແນກການຂອງແຂວງ, ເມືອງ, ພະນັກງານ-ລັດຖະກອນ ແລະ ອົງການປົກຄອງບ້ານ ພາຍໃນເທສະບານແຂວງເຂົ້າຮ່ວມ.
ປາທີ່ນຳມາປ່ອຍໃນຄັ້ງນີ້ ໂດຍໄດ້ຮັບການສະໜັບສະໜູນຈາກຫ້ອງການກະສິກຳ ແລະ ຊົນນະບົດຊຽງຮຸ່ງ ກິ່ງແຂວງສິບສອງພັນນາ ແຂວງຢຸນນານ ສປຈີນ 1 ແສນກວ່າໂຕ ໃນນີ້, ມີ ປາປາກ, ປາເຄີງ ແລະ ປາໄນ. ກິດຈະກຳຄັ້ງນີ້ ກໍເພື່ອເປັນການສ້າງຂະບວນການໃນວັນວັນປ່ອຍປາ ແລະ ສັດນ້ຳແຫ່ງຊາດ ທັງເປັນການປູກຈິດສຳນຶກໃຫ້ລູກຫລານຜູ້ທີ່ເກີດໃໝ່ໃຫຍ່ລຸນ ໃຫ້ມີສະຕິຮັກ ແລະ ຫວງແຫນປາ ແລະ ສັດນໍ້າ, ທັງເປັນການປຸກລະດົມທົ່ວປວງຊົນມີສ່ວນຮ່ວມ ໃນການຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ປາ-ສັດນໍ້າ, ແນໃສ່ເຮັດໃຫ້ປະຊາກອນສັດນ້ຳນັບມື້ມີຄວາມອຸດົມສົມບູນ ແລະ ກາຍເປັນທ່າແຮງໃນການຄໍ້າປະກັນດ້ານສະບຽງອາຫານ, ໂພຊະນາການ ກໍຄືການປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ. ພ້ອມນີ້ຍັງເປັນການປະກອບສ່ວນເສີມສ້າງຄວາມສໍາພັນອັນດີງາມ ທີ່ເປັນມູນເຊື້ອ ລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ເວົ້າລວມ, ເວົ້າສະ
ເພາະ ແຂວງຫລວງນໍ້າທາ ແລະ ເມືອງຊຽງຮຸ່ງ ກິ່ງແຂວງສິບສອງພັນນາ ໃຫ້ມີຄວາມແໜ້ນແຟ້ນຂຶ້ນກວ່າເກົ່າ.
ຂ່າວ: ມຸນຕີ
