ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ແຂວງຫລວງນໍ້າທາ ຍັງສືບຕໍ່ປະຕິບັດຄໍາສັ່ງ ຂອງລັດຖະບານໃນການຄວບຄຸມໂຄວິດ19 ຢ່າງເຂັ້ມງວດ

ພາຍຫຼັງທີ່ມີມາດຕະການຜ່ອນຜັນໃນການຄວບຄຸມໂຄວິດ-19 ໃນຂອບເຂດທົ່ວປະເທດແລ້ວ , ແຂວງຫຼວງນໍ້າທາ ຍັງສືບຕໍ່ປະຕິບັດຕາມແຈ້ງການຂອງລັດຖະບານ ຢ່າງເຂັ້ມງວດ ໂດຍສືບຕໍ່ປິດຮ້ານບັນເທີງ ຮ້ານຄາລາໂອເກະ ແລະການຊຸມນຸມຕ່າງໆ ເພື່ອບໍ່ໃຫ້ພະຍາດນີ້ລະບາດຢູ່ທ້ອງຖິ່ນຂອງຕົນ.

ທ່ານ ບຸນຍີ່ ແກ້ວຄູນເມືອງ ຮອງເຈົ້າແຂວງ, ຫົວໜ້າຄະນະສະເພາະກິດຄວບຄຸມໂຄວິດ19 ແຂວງຫຼວງນໍ້າທາໃຫ້ຮູ້ວ່າ: ພາຍຫຼັງທີ່ມີການຜ່ອນຜັນມາດຕະການຂອງລັດຖະບານ ແຂວງຫຼວງນໍ້າທາ ຍັງສືບຕໍ່ປິດດ່ານລະຫວ່າງປະເທດ, ດ່ານປະເພນີ ແລະດ່ານທ້ອງຖິ່ນ ແລະອະນຸຍາດໃຫ້ແຕ່ການເຂົ້າ-ອອກຂອງລົດຂົນສົ່ງສິນຄ້າເທົ່ານັ້ນ, ແຕ່ໄດ້ອະນຸຍາດໃຫ້ເປີດຕະຫຼາດກາງຄືນ ໂດຍມີການຄຸ້ມຄອງຈາກຂະແໜງການທີ່ກ່ຽວຂ້ອງຢ່າງເຂັ້ມງວດ ອະນຸຍາດໃຫ້ບັນດາໂຄງການທີ່ໄດ້ປິດກິດຈະການ ແລະບັນດາໂຮງຮຽນເປີດຮຽນການຮຽນການສອນເປັນປົກກະຕິ , ສ່ວນແຮງງານເຂົ້າມາເຮັດວຽກຢູ່ພາຍໃນແຂວງ ແມ່ນໄດ້ປະຕິບັດຕາມລະບຽບການ ແລະຂັ້ນຕອນຂອງຄະນະສະເພາະກິດສູນກາງກໍ່ຄືກະຊວງການຕ່າງ ປະເທດໄດ້ແນະນໍາຢ່າງເຂັ້ມງວດ.

ທ່ານບຸນຍີ່ ແກ້ວຄູນເມືອງ ໃຫ້ຮູ້ຕື່ມອີກວ່າ: ເບື້ອງຕົ້ນຄະນະສະເພາະກິດຂອງແຂວງໄດ້ກໍານົດເອົາຫລາຍສະຖານທີ່ເປັນບ່ອນກັກກັນ ແຮງງານລາວທີ່ກັບມາແຕ່ຕ່າງປະເທດ ແລະແຮງງານຕ່າງປະເທດທີ່ມາເຮັດວຽກຢູ່ລາວ ເປັນບ່ອນກັກກັນ14 ວັນ, ກ່ອນຈະອະນຸຍາດໃຫ້ເຄື່ອນໄຫວວຽກງານປົກກະຕິ ແລະຢູ່ພາຍໃຕ້ການກວດກາ ແລະຄວບຄຸມຂອງຄະນະສະເພາະກິດ.

ປະຈຸບັນ ພາຍໃນແຂວງຍັງມີສູນກັກກັນ 1ແຫ່ງ ເພື່ອກັກກັນແຮງງານຄົນລາວທີ່ເດີນທາງກັບມາແຕ່ຕ່າງປະເທດ ແລະກໍານົດເອົາໂຮງແຮມ ໜຶ່ງແຫ່ງເພື່ອກັກກັນແຮງງານຕ່າງປະເທດ ທີ່ເດີນທາງເຂົ້າມາລາວ ໂດຍມີຄະນະຮັບຜິດຊອບຕິດຕາມ ກວດກາແຕ່ລະວັນ ແລະສະພາບການດໍາລົງຊີວິດປະຈໍາວັນຂອງປະຊາຊົນບັນດາເຜົ່າ ພາຍໃນແຂວງເລີ່ມເປັນປົກກະຕິເທື່ອລະກ້າວ.