ໃນຕອນເຊົ້າຂອງວັນທີ 9 ສິງຫາ 2023 ນີ້ ຢູ່ສະໂມສອນຂອງແຂວງ (ຫຼັງເກົ່າ) ພະແນກຍຸຕິທໍາແຂວງຫົວພັນ ໄດ້ຈັດພິທີເປີດການຮຽນການສອນກົດໝາຍຊັ້ນຕົ້ນ ໄລຍະ 3 ເດືອນ ຊຸດທີ່ 1 ປະຈໍາສົກປີ 2023 ໃຫ້ແກ່ພະນັກງານການນໍາຫຼັກແຫຼ່ງຂັ້ນແຂວງ ແລະ ຂັ້ນເມືອງຂຶ້ນ ໂດຍການເປັນປະທານຮ່ວມຂອງທ່ານ ໄພວີ ສີບົວລິພາ ກໍາມະການສູນກາງພັກ ລັດຖະມົນຕີກະຊວງຍຸຕິທໍາ, ທ່ານ ພຸດພັນ ແກ້ວວົງໄຊ ຄະນະປະຈໍາພັກແຂວງ ຮອງເຈົ້າແຂວງຫົວພັນ, ມີບັນດາຫົວໜ້າ-ຮອງຫົວໜ້າຫ້ອງການອ້ອມຂ້າງແຂວງ, ຕະຫຼອດຮອດພະນັກງານ-ລັດຖະກອນພາຍໃນເມືອງເຂົ້າຮ່ວມ.
ໃນພິທີ ທ່ານ ນາງ ພູເຮືອງ ພົມມະວັນ ຮອງຫົວໜ້າພະແນກຍຸຕິທໍາແຂວງຫົວພັນ ໄດ້ຂຶ້ນຜ່ານຂໍ້ຕົກລົງຂອງເຈົ້າແຂວງ ວ່າດ້ວຍການອະນຸມັດໃຫ້ເປີດການຮຽນກົດໝາຍຊັ້ນຕົ້ນ 3 ເດືອນຊຸດທີ I ປະຈໍາປີ 2023 ໃຫ້ແກ່ພະນັກງານການນໍາຫຼັກແຫຼ່ງຂັ້ນແຂວງ ແລະ ຂັ້ນເມືອງພາຍໃນແຂວງຫົວພັນ ຊຶ່ງຈຸດປະສົງຂອງການເປີດການຮຽນ-ການສອນກົດໝາຍຊັ້ນຕົ້ນ ກໍເພື່ອເປັນການຜັນຂະຫຍາຍເນື້ອໃນຈິດໃຈ ຄໍາແນະນໍາຂອງລັດຖະມົນຕີກະຊວງຍຸຕິທໍາ ວ່າດ້ວຍການຈັດຕັ້ງປະຕິບັດວຽກງານຍຸຕິທໍາຮາກຖານ ແລະ ຍົກລະດັບຄວາມຮູ້ທາງດ້ານກົດໝາຍ ໃຫ້ແກ່ພະນັກງານ, ແນໃສ່ສ້າງພະນັກງານໃຫ້ມີຄວາມຮູ້, ຄວາມສາມາດໃນການແກ້ໄຂບັນຫາຕ່າງໆຢູ່ຂັ້ນຂອງຕົນໃຫ້ຖືກຕ້ອງ ແລະ ຮັບປະກັນໃນການປົກປ້ອງສິດ ແລະ ຜົນປະໂຫຍດອັນຊອບທໍາຂອງພົນລະເມືອງ, ທັງນີ້ກໍເພື່ອໃຫ້ພະນັກງານການນໍາຫຼັກແຫຼ່ງຂັ້ນແຂວງ ແລະ ເມືອງຢູ່ແຂວງຫົວພັນ ໃຫ້ສາມາດຄຸ້ມຄອງລັດຄຸ້ມຄອງສັງຄົມ ທີ່ມີການຫັນເຂົ້າສູ່ກົດໝາຍ ແລະ ລະບຽບການເທື່ອລະກ້າວ, ເຮັດໃຫ້ສັງຄົມມີຄວາມສະຫງົບ, ຄວາມສະເໝີີພາບ ແລະ ມີຄວາມຍຸຕິທໍາຍິ່ງໆຂຶ້ນ, ເຮັດໃຫ້ການບໍລິຫານລັດທຸກຂັ້ນ, ທຸກຂອດ ລ້ວນແລ້ວແຕ່ປະຕິບັດຕາມແນວທາງ, ຕາມກົນໄກ ແລະ ຕາມຫຼັກວິຊາການ ພາຍໃຕ້ຂໍ້ກໍານົດຂອງກົດໝາຍທີ່ວາງອອກໃນແຕ່ລະໄລຍະ.
ສໍາລັບເນື້ອໃນການສິດສອນໃນຄັ້ງນີ້ ແມ່ນໄດ້ຮວບຮວມເອົາບັນດາກົດໝາຍໃນສີ່ຂົງເຂດ ໂດຍແບ່ງອອກເປັນ 38 ວິຊາ, 31,5 ໜ່ວຍກິດ, ໄລຍະເວລາການສິດສອນທັງໝົດ 441 ຊົ່ວໂມງ, ໃຊ້ເວລາຮຽນ 3 ເດືອນ.
ໃນຕອນທ້າຍຂອງພິທີ ທ່ານ ໄພວີ ສີບົວລິພາ ກໍາມະການສູນກາງພັກ ລັດຖະມົນຕີກະຊວງຍຸຕິທໍາ, ທ່ານ ພຸດພັນ ແກ້ວວົງໄຊ ຄະນະປະຈໍາພັກແຂວງ ຮອງເຈົ້າແຂວງຫົວພັນ ກໍໄດ້ໃຫ້ກຽດໂອ້ລົມຕໍ່ພິທີ ໂດຍທ່ານໄດ້ເນັ້ນໜັກໃຫ້ຜູ້ເຂົ້າຮ່ວມການຮຽນກົດໝາຍຊັ້ນຕົ້ນໃນຄັ້ງນີ້ ຈົ່ງພ້ອມກັນຄົ້ນຄວ້າ, ແລກປ່ຽນຄໍາຄິດຄໍາເຫັນ ແລະ ຍາດແຍ່ງເອົາຄວາມຮູ້ນໍາຄູ-ອາຈານ ເພື່ອນໍາເອົາໄປຈັດຕັ້ງປະຕິບັດເຂົ້າໃນໜ້າທີ່ວຽກງານໃຫ້ເກີດຜົນປະໂຫຍດສູງສຸດ.
ພາບ-ຂ່າວ: ໄຊຍະສິດ ບັນຍາວົງ.
