ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ແຂວງຫົວພັນຈັດພິທີ ປ່ອຍປາໃສ່ແຫຼ່ງນໍ້າທຳມະຊາດໃນວັນອະນຸລັກສັດນໍ້າ-ສັດປ່າແຫ່ງຊາດ

ພິທີໄດຈັດຂື້ນໃນຕອນເຊົ້າວັນທີ່ 13 ກໍລະກົດ 2017ນີ້ ຢູ່ທີ່ວັງສະຫງວນຂົວນໍ້າຊຳ ບ້ານນາທົ່ງຈອງ ແລະ ບ້ານພັນໄຊ ເມືອງຊໍາເໜືອ ແຂວງຫົວພັນ ໂດຍການເຂົ້າຮ່ວມຂອງທ່ານ ທອງຢ້ຽວ ພັດມະນີຈັນ ຫົວນ້າຄະນະຈັດຕັ້ງແຂວງ ມີບັນດາທ່ານການນຳພັກ-ລັດຂັ້ນແຂວງ, ເມືອງຊຳເໜືອ ຕະຫຼອດຮອດມວນຊົນເມືອງຊຳເໜືອເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ອານຸລັກ ແສງສຸລິຍາ ຮອງເຈົ້າເມືອງໆຊຳເໜືອ ໄດ້ກ່າວຈຸດປະສົງໃນການປ່ອຍປາ ເນື່ອງໃນໂອກາດວັນອະນຸລັກສັດນໍ້າ-ສັດປ່າ ກໍ່ຄືວັນປ່ອຍປາແຫ່ງຊາດ 13 ກໍລະກົດ ເປັນການອະນຸລັກຮັກສາພັນສັດນໍ້າ ເປັນແຫຼ່ງເພາະພັນ ແລະ ຂະຫຍາຍພັນແບບທຳມະຊາດ, ພວກເຮົາທຸກຄົນຕ້ອງເປັນເຈົ້າການອະນຸລັກ, ຫ້າມທຸກຄົນນຳໃຊ້ ເຄື່ອງມືຫາປາແະເພດຕ່າງໆ ໃນຂອບເຂດບໍລິເວນຫວງຫ້າມນີ້ເດັດຂາດ ເພື່ອໃຫ້ຄົນລຸ້ນລູກ-ຫຼານ ແລະ ແຂກຕ່າງດ້າວທ້າວຕ່າງແດນ ໄດ້ທ່ຽວຊົມເຫັນປານາໆຊະນິດ ຢູ່ສະຖານທີ່ແຫ່ງນີ້. ທັງເປັນການປຸກຈິດສຳນຶກໃຫ້ຊາວໜຸ່ມ-ເຍົາວະຊົນ ແລະ ຊັ້ນ ຄົນຕ່າງໄດ້ຮູ້ເຖີງຄວາມໝາຍຄວາມສຳຄັນຂອງການອະນຸລັກສັດນໍ້າ-ສັດປ່າ, ຄວາມສຳຄັນຂອງສັດນໍ້າ-ສັດປ່າຕໍ່ເສດຖະກິດ-ສັງຄົມແຫ່ງຊາດ, ຕໍ່ວຽກງານການທ່ອງທ່ຽວ, ຕໍ່ການດຳລົງຊີວິດຂອງຄົນເຮົາ. ປາທີ່ນຳມາປ່ອຍໃນຄັ້ງນີ້ມີຈຳນວນ 9 ພັນໂຕ ມີ 3 ປະເພດປາຄື: ປາໄນ, ປານີນ ແລະ ປາແຝກ ລວມມູນຄ່າ 3 ລ້ານ 9 ແສນກີບ.

ການຈັດກິດຈະກຳປ່ອຍປາຢູ່ວັງສະຫງວນຂົວນໍ້າຊຳນີ້ໄດ້ຈັດຕັ້ງປະຕິບັດກັນມາໃນທຸກໆປີ ເຊິ່ງເລີ່ມມາແຕ່ປີ 2009 ເຖິງປະຈຸບັນ ເປັນເວລາ 9 ປີແລ້ວ ເພາະສະຖານທີ່ດັ່ງກ່າວ ເປັນເຂດຊຸມຊົນໜາແໜ້ນ ເໝາະແກ່ການຍ່າງທ່ຽວຊົມປາໃນຍາມນໍ້າໃສ.