ແຂວງຫົວພັນສະເຫຼີມສະຫຼອງ ວັນເດັກນ້ອຍສາກົນ

ຕອນເຊົ້າວັນທີ່ 31 ພຶດສະພາ 2024, ແຂວງຫົວພັນໄດ້ສໍາເລັດພິທີ ສະເຫຼີມສະຫຼອງວັນ ເດັກນ້ອຍສາກົນ ຄົບຮອບ 99 ປີ ຢູ່ຫໍວັດທະນະທຳຂອງແຂວງ ໂດຍການເຂົ້າຮ່ວມຂອງ ທ່ານ ຄໍາແພງ ໄຊສົມແພງ ເຈົ້າແຂວງຫົວພັນ.

ໃນພິທີ ໄດ້ຮັບຟັງປະຫວັດຄວາມເປັນມາຂອງວັນສ້າງຕັ້ງວັນເດັກນ້ອຍສາກົນຄົບຮອບ 99 ປີ ( ວັນທີ່ 1 ມິຖຸນາ 1925- ວັນທີ່ 1ມິຖຸນ 2024) ເຊິ່ງກອງປະຊຸມສະມັດຊາໃຫຍ່ຂອງສັນນິບາດນາໆຊາດ, ໃນວັນທີ່ 16 ກັນຍາ 1924 ໄດ້ ຮັບຮອງເອົາ “ຖະແຫຼງການເຊຼີແນວ ກ່ຽວກັບສິດທິຂອງເດັກ” ເປັນຄັ້ງທໍາອິດ ຊື່ງໄດ້ປະກາດວ່າ: ເດັກມີຄວາມຕ້ອງການໃນການປ້ອງກັນ ແລະ ດູ ແລເບິ່ງແຍງເປັນພິເສດ ລວມທັງການຊຸກຍູ້ສົ່ງເສີມ, ພັດທະນາ ແລະ ປົກປ້ອງ ທີ່ເໝາະສົມທາງດ້ານກົດໝາຍແກ່ເດັກກ່ອນເກີດ ແລະ ຫຼັງເກີດ ຍ້ອນວ່າເດັກຍັງບໍ່ທັນມີວຸດທິພາວະທີ່ສົມບູນຄົບ ຖ້ວນທາງດ້ານຮ່າງກາຍ ແລະ ຈິດໃຈ, ກອງປະຊຸມໂລກຄັ້ງທໍາອິດ ເພືຶ່ອຄວາມເປັນຢູ່ທີ່ດີຂອງເດັກ ໄດ້ຖືກ ຈັດຂື້ນຢູ່ທີ່ເຊີແນວ, ປະເທດສະວິສ ໃນວັນທີ 1 ມິຖຸນາ 1925 ແລະ ໄດ້ປະກາດເອົາວັນດັ່ງ ກ່າວເປັນວັນ ເດັກສາກົນ.

ຈຸດປະສົງໃນການ ຈັດພິທີສະເຫຼີມສະຫຼອງ ວັນເດັກນ້ອຍສາກົນຄົບຮອບ 99 ປີ ໃນຄັ້ງນີ້ເພື່ອແນ່ໃສ່ຊຸກຍູ້ສົ່ງເສີມ, ພັດ ທະນາ ແລະ ປົກປ້ອງເດັກໃນທົ່ວໂລກ,ຍ້ອນເຫັນໄດ້ຄວາມສຳາຄັນຂອງເດັນທີ່ເປັນອະນາຄົດຂອງຊາດ, ເປັນໜໍ່ແໜ່ງທຶນຮອນແຫ່ງຊິວິດໃນວັນນີ້ ເພື່ອກາຍເປັນອະນາຄົດອັນແຍ່ມໃສຂອງປະເທດຊາດໃນວັນໜ້າ.

ໃນໂອກາດນີ້ຍັງໄດ້ຮັບຊົມການສະແດງສິລະປະວັນນະຄະດີ ຈາກນ້ອງນ້ອຍນັກຮຽນຈາກບັນດາໂຮງຮຽນອ້ອມຂ້າງດ້ວຍບັນຍາກາດເບີກບານມ່ວນຊື່ນ.