ໃນໂອກາດລົງເຄື່ອນໄຫວວຽກງານ ຢູ່ເມືອງສົບເບົາ ແລະ ເມືອງແອດ ແຂວງຫົວພັນ, ໂດຍສະເພາະແມ່ນການເກັບກໍາຜົນສໍາເລັດທີ່ພົ້ນເດັ່ນ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ກໍຄືມະຕິກອງປະຊຸມໃຫຍ່ X ຂອງອົງຄະນະພັກແຂວງ ແລະ ຄັ້ງທີ V ຂອງ 2 ອົງຄະນະພັກເມືອງ ເວົ້າລວມ, ເວົ້າສະເພາະ ແມ່ນການກະກຽມຈັດກອງປະຊຸມໃຫຍ່ 3 ຂັ້ນຂອງພັກ ຢູ່ຂັ້ນທ້ອງຖິ່ນ ເພື່ອຂຽນເປັນບົດປະເພດຕ່າງໆ ໂຄສະນາຜ່ານສື່ມວນຊົນ ເປັນຕົ້ນແມ່ນ ລາຍການວິທະຍຸ “ເຂົ້າໃຈມະຕິ XI ຈັດຕັ້ງປະຕິບັດໃຫ້ເປັນຈິງ” ແລະ ວາລະສານໂຄສະນາ ຂອງຄະນະໂຄສະນາອົບຮົມສູນກາງພັກ ໃຫ້ສັງຄົມຮັບຮູ້ ແລະ ເຂົ້າໃຈ.
ໃນລະຫວ່າງວັນທີ 11 ຫາ 14 ສິງຫາ 2024 ກົມໂຄສະນາ ຄະນະໂຄສະນາອົບຮົມສູນກາງພັກ ນໍາໂດຍ ທ່ານ ອານົງສັກ ອິນທະວົງ ຫົວໜ້າກົມໂຄສະນາ ພ້ອມດ້ວຍທີມງານ ຮ່ວມກັບຄະນະໂຄສະນາອົບຮົມແຂວງຫົວພັນ ກໍໄດ້ເຂົ້າສໍາພາດຄະນະນໍາຂອງແຂວງ ເຊິ່ງທ່ານ ປອ ຄຳແພງ ໄຊສົມແພງ ກໍາມະການສູນກາງພັກ ເລຂາພັກແຂວງ ເຈົ້າແຂວງຫົວພັນ ໃຫ້ຮູ້ກ່ຽວກັບຜົນສໍາເລັດທີ່ພົ້ນເດັ່ນ ໃນການກະກຽມຈັດຕັ້ງກອງປະຊຸມໃຫຍ່ 3 ຂັ້ນຂອງພັກ ຢູ່ແຂວງ ຂອງອົງຄະນະພັກແຂວງຫົວພັນ. ມີບາງຕອນທ່ານໄດ້ກ່າວວ່າ: ພາຍຫລັງໄດ້ມີຄໍາສັ່ງຂອງຄະນະເລຂາທິການສູນກາງພັກເລກທີ 411/ຄລສພ, ລົງວັນທີ 8 ສິງຫາ 2023; ຄໍາແນະນໍາຂອງຄະນະຈັດຕັ້ງສູນກາງພັກ ເລກທີ 211/ຄຈສພ, ລົງວັນທີ 16 ສິງຫາ 2023; ມາຮອດປັດຈຸບັນແຂວງຫົວພັນໄດ້ກະກຽມຄວາມພ້ອມແລ້ວແຜນວຽກຈໍານວນໜຶ່ງໂດຍພື້ນຖານ ຄາດວ່າພາຍໃນເດືອນ 10 ປີ2024 ນີ້ ໃຫ້ສໍາເລັດກອງປະຊຸມອົງຄະນະພັກຮາກຖານອ້ອມຂ້າງແຂວງ, ຈາກນັ້ນໄລຍະເດືອນ 1 ຫາເດືອນ 3 ປີ 2025 ຈະໃຫ້ສໍາເລັດກອງປະຊຸມອົງຄະນະພັກເມືອງ ທັງ 10 ເມືອງທົ່ວແຂວງ, ໃນເດືອນ 4 ປີ 2025 ຈະຈັດກອງປະຊຸມອົງຄະນະພັກກອງບັນຊາການ ປກຊ-ປກສ ແຂວງ ແລະ ຈະຈັດກອງປະຊຸມໃຫຍ່ອົງຄະນະພັກແຂວງ ຂຶ້ນໃນເດືອນ 9 ປີ 2025.
ໃນຊະນະທີ່ ທ່ານ ເພີດ ມາປັນຍາ ຮອງເລຂາພັກແຂວງ ຜູ້ປະຈໍາການ ຊີ້ນໍາວຽກງານແນວຄິດ ວຽກງານພັກ-ພະນັກງານຂັ້ນແຂວງ ໃຫ້ຮູ້ຕື່ມວ່າ: ໄປຄຽງຄູ່ກັບການຈັດຕັ້ງປະຕິບັດແຜນພັດທະນາເສດຖະກິດ-ສົງຄົມ ທ້າຍສະໄໝ ຂອງແຂວງຫົວພັນ ເວົ້າລວມ, ເວົ້າສະເພາະ ການຈັດຕັ້ງປະຕິບັດ 2 ວາລະແຫ່ງຊາດໃນໄລຍະທີ່ຜ່ານມາ ຕິດພັນກັບການກະກຽມຈັດຕັ້ງກອງປະຊຸມໃຫຍ່ 3 ຂັ້ນຂອງພັກ ຢູ່ແຂວງຫົວພັນເຫັນວ່າມີອັນພົ້ນເດັ່ນຫຼາຍຢ່າງ ຍ້ອນຍາມໃດພວກເຮົາກໍເອົາໃຈໃສ່ເພີ່ມທະວີວຽກງານນໍາພາສຶກສາອົບຮົມ ການເມືອງ-ແນວຄິດ, ຍູ້ແຮງຂະບວນການຮອບດ້ານ ຕິດພັນກັບການປະຕິບັດ ຂໍ້ແຂ່ງຂັນຮັກຊາດ ແລະ ພັດທະນາ ໂດຍສະເພາະ ແມ່ນການປັບປຸງກໍ່ສ້າງພັກ-ພະນັກງານ, ປັບປຸງກົງຈັກການຈັດຕັ້ງ ເພື່ອເປັນກໍາລັງແຮງ ໃນການສືບຕໍ່ຈັດຕັ້ງປະຕິບັດມະຕິໃນທ້າຍສະໄໝ ໃຫ້ສາມາດບັນລຸຄາດໝາຍສູ້ຊົນຕ່າງໆ ທີ່ກອງປະຊຸມໃຫຍ່ຂັ້ນຂອງຕົນ ໄດ້ວາງອອກໃຫ້ມີຜົນສໍາເລັດ, ຈຸດສຸມ ແມ່ນເລັ່ງໃສ່ແກ້ໄຂ ບັນຫາຕົວຈິງທີ່ຕັ້ງຂຶ້ນ ເຊິ່ງເປັນບັນຫາເຄັ່ງຮ້ອນ ເປັນຕົ້ນ ບັນຫາເງິນເຟີ້, ອັດຕາແລກປ່ຽນ, ໜີ້ສິນ, ການຜະລິດເປັນສິນຄ້າ, ການພັດທະນາຊົນນະບົດ, ການແກ້ໄຂຄວາມທຸກຍາກຂອງປະຊາຊົນ, ແກ້ໄຂປະກົດການຫຍໍ້ທໍ້ຕ່າງໆ ໃນກົງຈັກການຈັດຕັ້ງພັກ-ລັດ ແລະ ໃນສັງຄົມໃຫ້ມີການ ຫັນປ່ຽນຢ່າງເດັ່ນຊັດຂຶ້ນ; ປຸກລະດົມປະຊາຊົນບັນດາເຜົ່າໃນແຂວງຫົວພັນໃຫ້ເປັນເຈົ້າຕົນເອງ ແລະ ເຂົ້າຮ່ວມຂະບວນການຕ່າງໆ ຢ່າງແຂງແຮງ ແລະ ກວ້າງຂວາງ; ຖືສໍາຄັນ ແລະ ເອົາໃຈໃສ່ກະກຽມດ້ານເນື້ອໃນຂອງ ກອງປະຊຸມໃຫຍ່ ແຕ່ລະອົງຄະນະພັກ ໃຫ້ຮັບປະກັນເນື້ອໃນຢ່າງເລິກເຊິ່ງ, ແທດກັບຕົວຈິງ ແລະ ສາມາດຈັດຕັ້ງ ປະຕິບັດໃຫ້ເປັນຈິງ; ຕ້ອງຄັດເລືອກໃຫ້ໄດ້ ພະນັກງານນໍາພາ-ຄຸ້ມຄອງ ແລະ ສືບທອດປ່ຽນແທນ ທີ່ຮັບປະກັນຄຸນນະພາບ, ມີມາດຕະຖານ, ເງື່ອນໄຂຄົບຖ້ວນໂດຍສະເພາະ ດ້ານຄຸນທາດການເມືອງ ແລະ ຄຸນສົມບັດສິນທໍາປະຕິວັດ, ບໍລິສຸດຜຸດຜ່ອງ ຕໍ່ອຸດົມການຂອງພັກ, ຮັບໃຊ້ປະເທດຊາດ ແລະ ປະຊາຊົນຢ່າງແທ້ຈິງ ເຂົ້າໃນໂຄງປະກອບບຸກຄະລາກອນທີ່ຈະສະໝັກເຂົ້າເປັນ ຄະນະພັກຊຸດໃໝ່ ໃຫ້ມີຄວາມຕໍ່ເນື່ອງ ແລະ ເປັນລະບົບ ທັງ 3 ຮຸ່ນພະນັກງານ, ມີສັດສ່ວນເພດ, ເຜົ່າທີ່ເໝາະສົມສອດຄ່ອງຕາມເງື່ອນໄຂ, ຈຸດພິເສດຂອງທ້ອງຖິ່ນ, ຂົງເຂດກໍຄືຂະແໜງການນັ້ນໆ.
ຈາກນັ້ນ ກໍໄດ້ລົງເຄື່ອນໄຫວສໍາພາດ ທ່ານ ໄຊຍະແສງ ຊົງຢົງຢາ ກຳມະການພັກແຂວງ ເລຂາພັກເມືອງ ເຈົ້າເມືອງສົບເບົາ ແລະ ທ່ານ ວັນເພັດ ສີບຸນແສງ ເລຂາພັກເມືອງ ເຈົ້າເມືອງແອດ ພ້ອມລົງສໍາພາດຕົວແບບກຸ່ມຫັດຖະກໍາແຕ້ມທຽນ 3 ເອື້ອຍນ້ອງ ຢູ່ບ້ານວຽງຮັງ ເມືອງສົບເບົາ ແລະ ຄອບຄົວຕົວແບບຫັດຖະກໍາເສື່ອນອນ ໝອນ ຜ້ານັ່ງ ຢູ່ບ້ານຫ້ວຍກູ້ ເມືອງແອດ. ສໍາລັບ ລາຍລະອຽດຜົນສໍາເລັດພົ້ນເດັ່ນດ້ານຕ່າງໆ ລວມທັງບົດຕົວແບບພົ້ນເດັ່ນຢູ່ເມືອງສົບເບົາ ແລະ ເມືອງແອດນັ້ນ ສາມາດຕິດຕາມຮັບຟັງໃນລາຍການວິທະຍຸ “ເຂົ້າໃຈມະຕິ XI ຈັດຕັ້ງປະຕິບັດໃຫ້ເປັນຈິງ” ເຊິ່ງອອກອາກາດທາງວິທະຍຸກະຈາຍສຽງແຫ່ງຊາດ ແລະ ວິທະຍຸກະຈາຍສຽງກອງທັບ ແລະ ອ່ານໄດ້ຢູ່ຄໍລໍາວຽກດີ-ຄົນເດັ່ນ ຂອງວາລະສານໂຄສະນາ.
(ພາບ-ຂ່າວ: ມີໄຊ)
