ແຫລ່ງຂ່າວຈາກແຂວງຫົວພັນ ໃຫ້ຮູ້ວ່າ: ຕອນບ່າຍວັນທີ 22 ມິຖຸນາ 2021ນີ້, ແຂວງຫົວພັນ ໄດ້ຈັດພິທີປະກາດກົງຈັກການຈັດຕັ້ງຂອງແຂວງ ໂດຍມີ ທ່ານ ເພີດ ມາປັນຍາ ຮອງເລຂາພັກແຂວງ, ຜູ້ຊີ້ນໍາວຽກງານແນວຄິດທິດສະດີ ແລະ ວຽກ ງານພັກ-ພະນັກງານຂັ້ນແຂວງ, ມີຄະນະບໍລິຫານງານພັກແຂວງ, ສະພາປະຊາຊົນແຂວງ, ຫົວໜ້າ-ຮອງຫົວໜ້າພະແນກການ, ອົງການທຽບເທົ່າ, ກົມກອງອ້ອມຂ້າງແຂວງ, ເມືອງ ແລະ ພະແນກກ່ຽວ ຂ້ອງເຂົ້າຮ່ວມ.
ໃນພິທີ, ທ່ານ ນາງ ລ້ອງຄຳ ພອນມີໄຊ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງໄດ້ຜ່ານ ມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 27/ຄລສພ ແລະ 28/ຄລສພ ວ່າດ້ວຍການອະນຸມັດໃຫ້ພະນັກງານອອກພັກການ-ຮັບອູດໜູນບຳນານ ໂດຍໄດ້ຕົກລົງໃຫ້ ທ່ານ ຈຸເຮີ ອະດີດກໍາມະການພັກແຂວງ, ຫົວ ໜ້າພະແນກແຮງງານ ແລະ ສະຫວັດດີການສັງຄົມແຂວງ ແລະ ທ່ານ ສະຖຽນ ວັນນະສຸກ ອະດີດກໍາມະການພັກແຂວງ, ຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດ ລ້ອມແຂວງຫົວພັນ ອອກພັກການ-ຮັບອຸດໜູນບໍານານ.
ພ້ອມດຽວກັນນັ້ນ, ຜູ້ຕາງໜ້າຄະນະຈັດ ຕັ້ງແຂວງ ໄດ້ຜ່ານຂໍ້ຕົກລົງຂອງທ່ານເຈົ້າ ແຂວງ ສະບັບເລກທີ788/ຈຂ-ຫພ ແລະ 789/ຈຂ-ຫພ ວ່າດ້ວຍການແຕ່ງຕັ້ງ ທ່ານ ພຸດພັນ ແກ້ວວົງໄຊ ແລະ ທ່ານ ພອນສຸກ ອີນທະວົງ ເປັນຮອງເຈົ້າແຂວງຫົວພັນ; ພ້ອມທັງຜ່ານມະຕິຕົກລົງຂອງຄະນະປະ ຈຳພັກແຂວງ ວ່າດ້ວຍການບົງຕົວແຕ່ງຕັ້ງເລຂາຄະນະພັກຮາກຖານ, ເລຂາໜ່ວຍພັກ, ຂໍ້ຕົກລົງຂອງທ່ານເຈົ້າແຂວງວ່າດ້ວຍການແຕ່ງຕັ້ງ, ຍົກຍ້າຍພະນັກ ງານນຳພາ-ຄຸ້ມຄອງໄປປະຈຳການຢູ່ບ່ອນໃໝ່ ໂດຍໄດ້ຍົກຍ້າຍ-ບົງຕົວແຕ່ງຕັ້ງ ທ່ານ ທ່ານ ພັນຕາ ທອນວົງສາ ກໍາມະການພັກແຂວງ, ເລຂາໜ່ວຍພັກພະແນກການຕ່າງປະເທດແຂວງ ໄປປະຈໍາການເປັນເລຂາຄະນະພັກຮາກຖານ, ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ; ແຕ່ງຕັ້ງທ່ານ ບຸນລວຍ ສຸກທິວົງ ຮອງເລຂາໜ່ວຍພັກ ເປັນເລຂາໜ່ວຍພັກ, ເປັນຫົວໜ້າພະແນກການຕ່າງປະ ເທດແຂວງຜູ້ໃໝ່; ແຕ່ງ ຕັ້ງ ທ່ານ ເພັດ ມະນີພອນ ເລຂາໜ່ວຍພັກ ວ່າການຫົວ ໜ້າພະແນກພາຍໃນແຂວງ ເປັນຫົວໜ້າພະແນກພາຍໃນແຂວງຫົວພັນ; ຍົກຍ້າຍ ທ່ານ ສໍສະຫວັນ ບານຄໍາມີ ຮອງຫົວໜ້າພະແນກກະສີກໍາ ແລະ ປ່າໄມ້ແຂວງ ໄປປະຈໍາການຢູ່ພະແນກຊັບພະຍາກອນທໍາມະຊາດ ແລະ ສິ່ງແວດລອ້ມແຂວງຫົວພັນ ແລະ ຍົກຍ້າຍ ທ່ານ ສົມສັກ ຈັນມະລີ ຫົວໜ້າຫ້ອງການບໍລິຫານ ພະແນກກະສິກໍາ ແລະ ປ່າໄມ້ແຂວງ ໄປປະຈໍາການຢູ່ສະພາປະຊາ ຊົນແຂວງຫົວພັນ.
ໂອກາດນີ້, ທ່ານ ເພີດ ມາປັນຍາ ໄດ້ຍ້ອງ ຍໍຊົມເຊີຍຕໍ່ຜົນງານ, ຜົນສໍາເລັດທີ່ຜູ້ໄດ້ຮັບອູດໜູນບໍານານ ທີ່ໄດ້ປະກອບສ່ວນເຫື່ອແຮງ, ສະຕິປັນຍາເຂົ້າໃນການສ້າງສາພັດທະ ນາປະເທດຊາດໃນໄລຍະຜ່ານມາ. ພ້ອມນີ້, ທ່ານຍັງໄດ້ຍົກໃຫ້ເຫັນຄວາມໝາຍສຳຄັນໃນການປັບປຸງຊັບຊ້ອນບ່ອນປະຈຳການ ຂອງພະນັກງານນໍາພາຄຸ້ມຄອງໃນຄັ້ງນີ້ ແມ່ນໄປຕາມກົດ ເກນລະບົບກົງຈັກການຈັດຕັ້ງຂອງພັກ-ລັດ ແລະ ຕາມຄວາມຮຽກຮ້ອງຕ້ອງການຂອງໜ້າວຽກໃນປັດຈຸບັນ.
ພ້ອມທັງ ໄດ້ເນັ້ນໜັກໃຫ້ບັນດາທ່ານທີ່ຖືກຊັບຊ້ອນບ່ອນປະຈຳ ການໃໝ່ຕະລອດຮອດພະນັກງານ-ລັດຖະກອນພະ ແນກການກ່ຽວຂ້ອງ ພ້ອມກັນສຸມໃສ່ຄົ້ນຄວ້າແນວທາງນະໂຍບາຍ, ນິຕິກຳຕ່າງໆທີ່ກ່ຽວຂ້ອງ ໂດຍມີການວາງແຜນການ, ແຜນງານ, ໂຄງການລະອຽດ; ເພີ່ມທະວີຄວາມສາມັກຄີພາຍໃນໃຫ້ໜັກແໜ້ນ ພ້ອມກັນຕັດສິນໃຈປຸ້ມລຸມເຂົ້າໜ້າວຽກຂອງຕົນໃຫ້ມີຜົນສຳເລັດສູງສຸດ; ຢຶດໝັ້ນຫລັກການລວມສູນປະຊາ ທິປະໄຕ, ເຮັດວຽກເປັນໝູ່ຄະນະ, ບຸກຄົນຮັບຜິດຊອບ ແລະ ມີການກວດກາເປັນປົກກະຕິ; ທຸກພາກສ່ວນຕ້ອງໄດ້ພ້ອມກັນຊ່ວຍສະໜັບ ສະໜູນ, ຮ່ວມມືກັບການນຳຂັ້ນຂອງຕົນເຮັດສຳເລັດໜ້າທີ່ສູງສຸດຄືຮັບໃຊ້ປະ ເທດຊາດ, ຮັບໃຊ້ປະຊາຊົນ.
ຂ່າວ-ພາບ: ໄອແກ້ວ
Loading...