ແຫລ່ງຂ່າວຈາກ ແຂວງຫົວພັນ ໃຫ້ຮູ້ວ່າ: ພະແນກ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຫົວພັນ ຈັດກອງປະຊຸມປຶກສາຫາລືຜ່ານແຜນພັດທະນາພູຜາຖີ່ ຮອບທີ 3 ໃນວັນທີ 26 ເມສາ 2024 ໂກຍການເປັນປະທານຂອງ ທ່ານ ພຸດພັນ ແກ້ວວົງໄຊ ຮອງເຈົ້າແຂວງຫົວພັນ, ມີພາກສ່ວນກ່ຽວຂ້ອງຂັ້ນແຂວງ ແລະ ເມືອງຊໍາເໜືອເຂົ້າຮ່ວມ.
ກອງປະຊຸມຄັ້ງນີ້, ໄດ້ຮັບຟັງການນໍາສະເໜີແຜນພັດທະນາສະຖານທີ່ທ່ອງທ່ຽວ ພູຜາຖີ່ ສຳລັບປີ 2025-2035 ເພື່ອກຳນົດເອົາຂອບເຂດພັດທະນາ ການທ່ອງທ່ຽວ, ແຜນການພັດທະນາພື້ນຖານໂຄ່ງລ່າງ ແລະ ສິ່ງອຳນວຍຄວາມສະດວກຢູ່ສະຖານທີ່ທ່ອງທ່ຽວແຫ່ງນີ້ ໃຫ້ກາຍເປັນສະຖານທີ່ທ່ອງທ່ຽວທາງດ້ານປະຫວັດສາດທີ່ໂດດເດັ່ນ, ເປັນບ່ອນສຶກສາຮຽນຮູ້ວິລະກຳອັນພິລະອາດຫານ, ຕິດພັນກັບທຳມະຊາດທີ່ສວຍງາມ ແລະ ມີຄວາມຍືນຍົງ ເປັນແນວທາງ ແລະ ບ່ອນອີງແກ່ການຈັດຕັ້ງປະຕິບັດວຽກງານການທ່ອງທ່ຽວໃຫ້ມີແຜນງານ, ໂຄງການລະອຽດ ໂດຍໃຫ້ແທດເໝາະກັບສະພາບຄວາມເປັນຈິງຂອງທ້ອງຖິ່ນ ພ້ອມທັງສອດຄ່ອງຕາມແນວທາງນະໂຍບາຍຂອງພັກ-ລັດ ເວົ້າລວມ, ເວົ້າສະເພາະກໍຄືແຜນພັດທະນາເສດຖະກິດ-ສັງຄົມຂອງແຂວງ ແລະ ເມືອງໃນແຕ່ລະໄລຍະ ເພື່ອຊ່ວຍຫລຸດຜ່ອນຄວາມທຸກຍາກຂອງປະຊາຊົນບັນດາເຜົ່າ.
ນອກຈາກນີ້, ບັນດາຜູ້ເຂົ້າຮ່ວມກອງປະຊຸມ ຍັງໄດ້ປຶກສາຫາລື, ປະກອບຄໍາຄິດຄໍາເຫັນໃສ່ຮ່າງແຜນພັດທະນາແຫລ່ງທ່ອງທ່ຽວພູຜາຖີ່ ໃຫ້ມີເນື້ອໃນຄົບຖ້ວນ ແລະ ໄດ້ຮັບການຈັດຕັ້ງປະຕິບັດປັບປຸງ ພ້ອມທັງຮັບຮອງເອົາແຜນພັດທະນາ ເພື່ອສະເໜີຫາລັດຖະບານຕື່ມອີກ.
ຂ່າວ-ພາບ: ນິດຖະໜອມ
