ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ່ 27 ຕຸລາ 2023 ນີ້ ທີ່ເດີ່ນກິລາໃນຮົ່ມແຂວງຫຼວງພະບາງ ໄດ້ຈັດພິທີ ຈູດ-ທໍາລາຍ ຢາເສບຕິດ ໂອກາດວັນຕ້ານຢາເສບຕິດແຫ່ງຊາດ ວັນທີ່ 12 ຕຸລາ ຄົບຮອບ 22 ປີ ມີ ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ພ້ອມດ້ວຍ ຄະນະບັນຊາກອງບັນຊາການປ້ອງກັນຄວາມສະຫງົບແຂວງ, ແຂກຮັບເຊີນ ແລະນັກຮຽນ-ນັກສຶກສາ ເຂົ້າຮ່ວມ. ພິທີ ທ່ານ ບຸນເລື່ອມ ມະນີວົງ ໄດ້ກ່າວປາໄສວ່າ: ປັດຈຸບັນບັນຫາຢາເສບຕິດ ຢູ່ຫຼາຍທ້ອງຖີ່ນມີທ່າອ່ຽງ ນັບມື້ແຜ່ຂະຫຍາຍເປັນວົງກວ້າງ ໂດຍມີທັງການຜະລິດ, ຄ້າ-ຂາຍ ແລະເສບ, ເຊີ່ງບັນດາປະເທດໃນໂລກ ໄດ້ເພີ້ມທະວີມາດຕະການສະກັດກັ້ນ ແລະປາບປາມຢ່າງຕັ້ງໜ້າ, ສະເພາະຢູ່ ສປປ ລາວ ກໍ່ຄືແຂວງຫຼວງພະບາງ ໃນໄລຍະຜ່ານມາອົງການປົກຄອງທຸກຂັ້ນ ໄດ້ຊີ້ນຳເຈົ້າໜ້າທີ່ ແລະທຸກພາກສ່ວນໃນສັງຄົມ ເປັນເຈົ້າການຕ້ານ-ສະກັດກັ້ນ ແລະປາບປາມຂະບວນການຜະລິດ, ຄ້າ-ຂາຍ, ເສບຢາເສບຕິດ, ເຊີ່ງເຈົ້າໜ້າທີ່ໄດ້ດຳເນີນມາດຕະການຢ່າງເຄັ່ງຄັດ, ເຂັ້ມງວດຕໍ່ຜູ້ທີ່ລະເມີດ ຕາມລະບຽບກົດໝາຍ ຢ່າງເຂັ້ມງວດ-ເດັດຂາດ, ໂດຍນຳເອົາຜູ້ກະທຳຜິດມາລົງໂທດຕາມກົດໝາຍ.
ໃນສົກປີ 2022-2023 ນີ້ ເຈົ້າໜ້າທີ່ແຂວງຫຼວງພະບາງ ສາມາດມ້າງລາຍຄະດີຢາເສບຕິດ ໄດ້ທັງໝົດ 148 ລາຍ, ມີຜູ້ຖືກຫາທັງໝົດ 211 ຄົນ, ຍິງ 22 ຄົນ, ໃນນັ້ນ ເປັນຄົນຕ່າງປະເທດ 1 ຄົນ, ໄດ້ສົ່ງສຳນວນໃຫ້ອົງການໄອຍະການແຂວງທັງໜົດ 66 ເລື້ອງ, ສາມາດສັ່ງຟ້ອງຂື້ນສານ ແລະມີຄໍາຕັດສິນຂອງສານ ທີ່ໃຊ້ໄດ້ຢ່າງເດັດຂາດແລ້ວ 77 ເລື່ອງ, ມີນັກໂທດທັງໝົດ 107 ຄົນ, ຍິງ 8 ຄົນ, ໃນນີ້ ມີນັກໂທດທີ່ຖືກສານຕັດສິນຕະຫຼອດຊີວິດ 8 ຄົນ, ປະຫານຊິວິດ 3 ຄົນ, ສໍາລັບຂອງກາງທີ່ຍຶດໄດ້ ແລະຈັດພິທີຈູດທຳລາຍໃນປີນີ້ ມີຝຸນຂາວ 1.300 ກຣາມ, ຢາເສບຕິດປະເພດຢາບ້າ 252.158 ເມັດ, ເທົ່າກັບ 25.215,8 ກຼາມ ແລະສີ່ງຫຸ້ມຫໍ່ຢາເສບຕິດຈໍານວນໜຶ່ງ, ນອກນີ້ ໄດ້ມີຢາເສບຕິດທີ່ທີ່ບໍ່ຮູ້ເຈົ້າຂອງ ລວມມີຢາບ້າ ຈຳນວນ 20.000 ເມັດ ເທົ່າກັບ 2 ກິໂລກຣາມ ແລະເຮໂລອີນ ຈໄນວນ 8,1 ກິໂລກຣາມ ເຊີ່ງບັນຈຸໃນຖົງ ເປ້ ທີ່ເຈົ້າໜ້າທີ່ກວດພົບ ຢູ່ເສັ້ນທາງແຄມຂອງ ມາທຳລາຍຮ່ວມກັນ, ສ່ວນຢາຝິ່ນຈຳນວນ 11,156 ກຼາມ ຈະບໍ່ໄດ້ທຳລາຍ ເນື່ອງຈາກຈະໄດ້ນຳໃຊ້ເຂົ້າວຽກງານ ທາງດ້ານວິທະຍາສາດການແພດຕໍ່ໄປ, ໂອກາດນີ້ ຜູ້ເຂົ້າຮ່ວມໄດ້ຮ່ວມກັນຈູດ ແລະທໍາລາຍຢາເສບຕິດ ຢ່າງເປັນທາງການ.
ພາບ;ຂ່າວ: ແຂວງຫລວງພະບາງ