ວັນທີ 24 ກໍລະກົດ ນີ້ ທີ່ສະໂມສອນໃຫຍ່ຂອງຫ້ອງວ່າການແຂວງຫຼວງພະບາງ ໄດ້ຈັດກອງປະຊຸມປະເມີນຜົນການຈັດຕັ້ງປະຕິບັດ ລັດຖະທຳມະນູນ ແຫ່ງ ສປປ ລາວ ສະບັບ ປີ 2015 ໂດຍເປັນປະທານຂອງ ທ່ານ ກອງແກ້ວ ໄຊສົງຄາມ ກໍາມະການສູນກາງພັກ ຫົວໜ້າສະຖາບັນວິທະຍາສາດເສດຖະກິດ ແລະ ສັງຄົມ ແຫ່ງຊາດ ຮອງຫົວໜ້າອະນຸກໍາມະການເນື້ອໃນຄະນະກໍາມະການລະດັບຊາດ ປັບປຸງລັດຖະທຳມະນູນ, ມີການນຳຂອງແຂວງ, ຫົວໜ້າຮອງຫົວໜ້າພະແນກການຂັ້ນແຂວງ, ເຈົ້າເມືອງ-ເຈົ້ານະຄອນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ທ່ານ ກອງແກ້ວ ໄຊສົງຄາມ ໄດ້ມີຄໍາເຫັນກ່າວເປີດກອງປະຊຸມວ່າ: ລັດຖະທໍາມະນູນສະບັບທໍາອິດຂອງ ສປປ ລາວ ໄດ້ຮັບການຮັບຮອງ ແລະ ປະກາດໃຊ້ຢ່າງເປັນທາງການ ໃນປີ 1991, ຜ່ານການຈັດຕັ້ງປະຕິບັດມາຮອດປັດຈຸບັນເປັນເວລາ 33 ປີ, ໄດ້ມີການປັບປຸງ 2 ຄັ້ງ ຄື: ການປັບປຸງ ປີ 2003 ແລະ ປີ 2015. ການຈັດຕັ້ງປະຕິບັດລັດຖະທໍາມະນູນສະບັບ ປີ 2015 ມາຮອດປັດຈຸບັນເປັນເວລາ 9 ປີ ຊຶ່ງໄດ້ເປັນກົດໝາຍພື້ນຖານສໍາຄັນຂອງປະເທດຊາດ, ເປັນບ່ອນອີງໃຫ້ແກ່ການສ້າງ ແລະ ປັບປຸງບັນດາກົດໝາຍເພື່ອເປັນເຄື່ອງມືຂອງລັດ ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ. ອີງຕາມຄວາມຮຽກຮ້ອງຕ້ອງການໃນການຈັດຕັ້ງປະຕິບັດ ແນວທາງປ່ຽນແປງໃໝ່ຢ່າງຮອບດ້ານ ມີຫຼັກການຂອງພັກໃນໄລຍະແຕ່ນີ້ ຫາປີ 2055, ຄະນະບໍລິຫານງານສູນກາງພັກ ສະໄໝທີ XI ໄດ້ອອກມະຕິວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ ສູ່ລວງເລິກສ້າງການຫັນປ່ຽນທີ່ແຂງແຮງ, ເລິກເຊິ່ງແລະຮອບດ້ານໃນການນຳພາຂອງພັກ, ຕໍ່ມາກົມການເມືອງສູນກາງພັກ ໄດ້ອອກມະຕິວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່. ໂດຍໄດ້ຮຽກຮ້ອງໃຫ້ລັດເຮົາຕ້ອງໄດ້ປັບປຸງລັດຖະທໍາມະນູນ ແຫ່ງ ສປປ ລາວ ສະບັບ ປີ 2015 ໃຫ້ສອດຄ່ອງກັບໜ້າທີ່ການເມືອງຂອງພັກ ແລະ ລັດໃນໄລຍະໃໝ່, ເພື່ອຄົ້ນຄວ້າ, ປັບປຸງລັດຖະທຳມະນູນໃຫ້ທັນເວລາ, ກົມການເມືອງສູນກາງພັກ ໄດ້ອອກມະຕິວ່າດ້ວຍການແຕ່ງຕັ້ງຄະນະກໍາມະການລະດັບຊາດ ປັບປຸງລັດຖະທໍາມະນູນ ທັງໃນຂັ້ນສູນກາງແລະທ້ອງຖິ່ນ; ຈາກນັ້ນ ທ່ານ ວົງສະຫວັນ ເທບພະຈັນ ຮອງເລຂາບໍລິຫານງານພັກແຂວງ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງເຂດ 6 ປະທານສະພາປະຊາຊົນແຂວງຫຼວງພະບາງ ໄດ້ຂຶ້ນລາຍງານສະພາບການປະເມີນຜົນການຈັດຕັ້ງປະຕິບັດ ລັດຖະທໍາມະນູນ ແຫ່ງ ສປປ ລາວ ສະບັບ ປີ 2015 ໃນທົ່ວແຂວງຫຼວງພະບາງ ໂດຍຍົກໃຫ້ເຫັນບັນດາຜົນສຳເລັດ ແລະ ບັນຫາຄົງຄ້າງທີ່ຈະສືບຕໍ່, ໂອກາດດຽວກັນຕາງໜ້າອົງການປົກຄອງແຂວງ, ບັນດາຂະແໜງການກ່ຽວຂ້ອງແລະບັນດາເມືອງ-ນະຄອນຫຼວງພະບາງ ໄດ້ພັດປ່ຽນກັນຂຶ້ນຄົ້ນຄວ້າປະກອບຄໍາເຫັນ ຕໍ່ເນື້ອໃນຂອງລັດຖະທໍາມະນູນໃຫ້ຄົບຖ້ວນສົມບູນ ແລະ ນໍາໃຊ້ໄດ້ຢ່າງສອດຄ່ອງກັບສະພາບການພັດທະນາໃໝ່.
ຂ່າວ: ຫຼວງພະບາງ
