ໃນໂອກາດຂຶ້ນລາຍງານສະພາບການຈັດຕັ້ງປະຕິບັດ ວຽກງານພັດທະນາຊົນນະບົດ ແລະແກ້ໄຂຄວາມທຸກຍາກ ປະຈຳ 06 ເດືອນຕົ້ນປີ 2024 ຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງຫຼວງພະບາງ ຊຸດທີ II ເມື່ອບໍ່ດົນມານີ້໋. ທ່ານ ບຸນມີ ສະຫວັດ ຫົວໜ້າພະແນກກະສິກໍາ ແລະ ປ່າໄມ້ ແຂວງ ໃຫ້ຮູ້ວ່າ: ປັດຈຸບັນທົ່ວແຂວງຫລວງພະບາງ ມີຄອບຄົວທີ່ບັນລຸຄົບ 6 ມາດຕະຖານຂອງຄອບຄົວພົ້ນທຸກ ຈໍານວນ 63.608 ຄອບຄົວ, ກວມ 74,86%, ຖ້າທຽບໃສ່ປີ 2022 ເພີ່ມຂຶ້ນ 2.108 ຄອບຄົວ, ຄອບຄົວທີ່ບໍ່ບັນລຸ 6 ມາດຕະຖານຂອງຄອບຄົວພົ້ນທຸກ ມີຈຳນວນ 21.356 ຄອບຄົວ, ກວມ 25,14%.
ນອກຈາກນີ້, ມີບ້ານທີ່ບັນລຸຄົບຕາມ 8 ມາດຕະຖານບ້ານພົ້ນທຸກ ຈຳນວນ 444 ບ້ານ, ເທົ່າກັບ 58,65%, ທຽບໃສ່ແຜນການປີ 2022 ສາມາດສ້າງບ້ານພົ້ນທຸກໄດ້ 37 ບ້ານ ແລະມີບ້ານທີ່ບໍ່ບັນລຸຕາມມາດຕະຖານບ້ານພົ້ນທຸກຈຳນວນ 313 ບ້ານ, ເທົ່າກັບ 41,35% ຂອງບ້ານທັງຫມົດໃນທົ່ວແຂວງ; ມີເມືອງທີ່ບັນລຸຄົບຕາມ 9 ມາດຕະຖານຂອງເມືອງພົ້ນທຸກ 4 ເມືອງຄື: ນະຄອນຫລວງພະບາງ, ຊຽງເງິນ, ເມືອງນານ ແລະນໍ້າບາກ ກວມ 33,33%, ຂອງຈຳນວນເມືອງທັງໝົດ ແລະມີເມືອງ ທີ່ຍັງບໍ່ທັນບັນລຸຕາມ 9 ມາດຕະຖານຂອງເມືອງພົ້ນທຸກມີຈຳນວນ 8 ເມືອງ, ກວມ 66,67% ຂອງຈໍານວນເມືອງທັງຫມົດ ໃນທົ່ວແຂວງ.
