ເມື່ອບໍ່ດົນຜ່ານມານີ້ ທີ່ສູນເລືອດອົງການກາແດງແຂວງຫຼວງພະບາງ ໄດ້ພິທີສະ ເຫຼີມສະຫຼອງ ວັນຜູ້ບໍລິຈາກ ເລືອດໂລກ ວັນທີ່ 14 ມິຖຸນາ ມີ ທ່ານ ສຸລິສັກ ພົມມາລີ ຫົວໜ້າພະແນກແຮງງານ ແລະ ສະຫວັດດີການ-ສັງຄົມແຂວງ, ດຣ ວຽງສະຫວັນ ກະເສີມສຸກ ຫົວໜ້າອົງການກາແດງລາວ ປະຈຳແຂວງຫຼວງພະບາງ, ພ້ອມດ້ວຍແຂກຮັບເຊີນຈາກຂະແໜງການກ່ຽວຂ້ອງ ແລະຜູ້ບໍລິຈາກເລືອດ ເຂົ້າຮ່ວມ. ພິທີ ດຣ ວຽງສະຫວັນ ກະເສີມສຸກ ໃຫ້ຮູ້ວ່າ: ວັນທີ 14 ມິຖຸນາຂອງທຸກປີ ແມ່ນວັນຜູ້ບໍລິຈາກເລືອດໂລກ ຊຶ່ງຢູ່ຫຼາຍປະເທດໃນທົ່ວໂລກ ໄດ້ພ້ອມກັນຈັດຕັ້ງການສະຫຼີມສະຫຼອງ ເພື່ອເປັນການສະແດງຄວາມຂອບໃຈຕໍ່ຜູ້ບໍລິຈາກເລືອດ ທີ່ເຂົາເຈົ້າໄດ້ມອບຂອງຂວັນ ທີ່ມີຄ່າທີ່ສຸດຕໍ່ຊີວິດ ດ້ວຍຄວາມສະມັກໃຈ ເພື່ອຊ່ວຍຄົນເຈັບ ໃນແຕ່ລະປີຢູ່ທົ່ວໂລກສາມາດຊ່ວຍຊີວິດຄົນເຈັບໄດ້ນັບລ້ານ ເຊີ່ງໃນແຕ່ລະປີ ອົງການອານາໄມໂລກໂລກ, ສະຫະພັນກາແດງແລະຊິກວົງເດືອນແດງສາກົນ ພ້ອມດ້ວຍຫນ່ວຍງານສາກົນທີ່ກ່ຽວຂ້ອງອື່ນໆ ກໍ່ໄດ້ມີການກໍານົດຄໍາຂວັນເພື່ອສະເຫລີມສະຫລອງທີ່ແຕກຕ່າງກັນ ສະເພາະ ປີ 2022 ນີ້ ຈັດຂື້ນພາຍໃຕ້ຄຳຂັວນ “ບໍລິຈາກເລືອດ ແມ່ນພະລັງແຫ່ງຄວາມສາມັກຄີ ມາຮ່ວມກັນບໍລິຈາກເລືອດເພື່ອຊ່ວຍຊີວິດ” ແລະໃນປີນີ້ ສະພາປະຊາຊົນແຂວງ ໄດ້ມີມະຕິຕົກລົງຮັບຮອງເອົາແຜນການຄາດຫມາຍສູ້ຊົນ ໃນການປຸກລະດົມຮັບບໍລິຈາກເລືອດໃນທົ່ວແຂວງ ເຊີ່ງຕ້ອງໃຫ້ບັນລຸ 4,200 ຖົງ, ແຕ່ໃນຕົວຈິງຄວາມຕ້ອງການນຳໃຊ້ເລືອດ ຕ້ອງໃຫ້ບັນລຸເຖິງ 5,000 ຖົງ ມາຮອດປັດຈຸບັນ ສາມາດຂົນຂວາຍການບໍລິຈາກເລືອດຍັງບໍ່ເຖີງເຄີ່ງໜື່ງຂອງແຜນປີ. ໂອກາດນີ້ ທ່ານ ສຸລິສັກ ພົມມາລີ ໄດ້ຮຽກຮ້ອງໃຫ້ຄະນະນຳອົງການກາແດງ ກໍ່ຄືສູນເລືອດປະຈຳແຂວງ ພ້ອມກັນຈັດລຽງບູລິມະສິດ ໃນການປຸກລະດົມການຈັດຫາເລືອດ ນຳຜູ້ສະໝັກໃຈບໍລິຈາກເລືອດ ຢູ່ສຳນັກງານ-ອົງການ ແລະສະຖາບັນການສຶກສາຢູ່ພາຍໃນແຂວງ ພ້ອມນີ້ ທ່ານໄດ້ຮຽກຮ້ອງໃຫ້ທຸກຄົນໃນທົ່ວສັງຄົມ ພ້ອມກັນສະໝົກໃຈບໍລິຈາກເລືອດ ເພື່ອຊ່ວຍເຫຼືອເພື່ອນມະນຸດດ້ວຍກັນ ໃຫ້ມີຄວາມປອດໄພ ແລະເຮັດໃຫ້ຜູ້ບາດເຈັບທີ່ຕ້ອງການນຳໃຊ້ເລືອດ ສາມາດກັບຄືນມາໃຊ້ຊີວິດຕາມປົກກະຕິ ໃນສັງຄົມໄດ້ເທື່ອລະກ້າວ.
ໃນພິທີຄັ້ງນີ້ ໄດ້ມີການປະກອບຄຳເຫັນຈາກຜູ້ທີ່ເຄີຍບໍລິຈາກເລືອດ ຫຼາຍຄັ້ງ ແລະຜູ້ທີ່ນຳໃຊ້ເລືອດເປັນປະຈຳໃນການປີ່ນປົວສຸຂະພາບ, ພ້ອມທັງຈັດກິດຈະກຳບໍລິຈາກເລືອດ ໂດຍມີຜູ້ສະໝັກໃຈເຂົ້າຮ່ວມບໍລິຈາກເລືອດ ໄດ້ເລືອດທັງໝົດ 138 ຖົງ.
