ໃນວັນທີ 17 ມິຖຸນາ 2024 ນີ້ ກົມພັດທະນາແມ່ຍິງລາວ ສູນກາງສະຫະພັນແມ່ຍິງ ຮ່ວມກັບສະຫະພັນແມ່ຍິງແຂວງ ອັດຕະປື ໄດ້ຈັດຊຸດຝຶກອົບຮົມ ພາຍໃຕ້ຫົວຂໍ້ ຮັກລູກໃຫ້ໃສ່ໃຈ, ຂຶ້ນທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ, ໂດຍການເປັນປະທານຂອງທ່ານ ນາງ ນິນປະເສີດ ໄຊຍະພອນສີ ຫົວໜ້າກົມພັດທະນາແມ່ຍິງລາວ ສູນກາງສະຫະພັນແມ່ຍິງລາວ, ມີທ່ານ ຄາວີ ຫອມສົມບັດ ຊ່ຽວຊານການປ່ຽນແປງພຶດຕິກຳ ແລະ ສັງຄົມ ຂອງອົງການສົງເຄາະແມ່ ແລະ ເດັກ ຂອງສະຫະປະຊາຊາດ ຫຼື ອຸຍນີເຊັບ, ມີທ່ານ ນາງ ຈັນເພັດ ຈັນທະມາດ ປະທານສະຫະພັນແມ່ຍິງ ແຂວງອັດຕະປື ພ້ອມດ້ວຍບັນດາສຳມະນາກອນຈາກ 3 ເມືອງ ແລະ 6 ພະແນກການອ້ອມຂ້າງແຂວງເຂົ້າຮ່ວມ.
ນາງ ນິນປະເສີດ ໄຊຍະພອນສີ ຫົວໜ້າກົມພັດທະນາແມ່ຍິງລາວ ສູນກາງສະຫະພັນແມ່ຍິງລາວ ໄດ້ກ່າວວ່າ: ຊຸດຝຶກອົບຮົມ ພາຍໃຕ້ຫົວຂໍ້ ຮັກລູກໃຫ້ໃສ່ໃຈ ຄັ້ງນີ້ ຈັດຂຶ້ນເພື່ອໃຫ້ຜູ້ເຂົ້າຮ່ວມສາມາດເຂົ້າໃຈ ແລະ ອະທິບາຍໄດ້ກ່ຽວກັບຊຸດເຄື່ອງມື, ລວມທັງປື້ມຄູ່ 5 ເຫຼັ້ມ ໃນການຈັດຕັ້ງຜັນຂະຫຍາຍແຜນງານ ຮັກລູກໃຫ້ໃສ່ໃຈ ເພື່ອໃຫ້ຄູຝຶກຂັ້ນແຂວງ ແລະ ຂັ້ນເມືອງ ສາມາດຝຶກປະຕິບັດຕົວຈິງ ແລະ ເປັນເຈົ້າການໃນການຈັດຝຶກອົບຮົມໃຫ້ແກ່ສະມາຊິກແຜນງານຂັ້ນບ້ານ ເຊິ່ງລວມມີ ເມືອງ ໄຊເສດຖາ, ເມືອງ ຊານໄຊ, ເມືອງ ສະໜາມໄຊ ຈໍານວນ 20 ບ້ານ, ຫ້ອງກຽມ ປະຖົມ 34 ແຫ່ງ ແລະ ກຸ່ມຮຽນຜ່ານການຫຼິ້ນ 7 ແຫ່ງ, ຊຸດອົບຮົມຄັ້ງນີ້ ການຈັດຕັ້ງປະຕິບັດແຜນງານ ຮັກລູກໃຫ້ໃສ່ໃຈ ນີ້ແມ່ນເພື່ອສົ່ງເສີມໃຫ້ພໍ່ແມ່ຜູ້ປົກຄອງ ແລະ ຜູ້ດູແລເດັກຮັບຮູ້ຂໍ້ຄວາມການສື່ສານໃນແຜນງານ ຮັກລູກໃຫ້ໃສ່ໃຈ ແລະ ນໍາໄປຈັດຕັ້ງປະຕິບັດໃນການເບິ່ງແຍງດູແລລູກຂອງຕົນເອງ ໃນສະພາບແວດລ້ອມທີ່ມີການປົກປ້ອງ ແລະ ໂດຍປາສະຈາກການໃຊ້ຄວາມຮຸນແຮງ ເພື່ອໃຫ້ເດັກກ່ອນໄວຮຽນ ອາຍຸຕໍ່າກ່ວາ 6 ປີ ມີຄຸນສົມບັດ, ຄວາມຮູ້ ແລະ ຄວາມສາມາດ ທີ່ເປັນພື້ນຖານກ່ອນເຂົ້າຮຽນຊັ້ນປະຖົມສຶກສາ, ເພື່ອສົ່ງເສີມພັດທະນາການ ແລະ ຄວາມຮູ້ທົ່ວໄປ, ດ້ານອາລົມຈິດ ແລະ ສັງຄົມ, ການຈັດຕັ້ງປະຕິບັດກິດຈະກໍານີ້ຍັງເປັນການຜັນຂະຫຍາຍຄໍາໝັ້ນໝາຍ ຂອງ ສປປ ລາວ ຕໍ່ສາກົນ ເພື່ອເປັນການປະກອບສ່ວນບັນລຸເປົ້າໝາຍກ່ຽວກັບເດັກ ແລະ ແມ່ຍິງ ໂດຍສະເພາະໃນ ສປປ ລາວ ໄດ້ໃຫ້ຄຳໝັ້ນສັນຍາໃນການນໍາພາປະເທດ ໃຫ້ຫຼຸດອອກຈາກຄວາມດ້ອຍພັດທະນາໃນຊຸມປີ 2030.
ຊຸດອົບຮົມຄັ້ງນີ້ ຈະໄດ້ດໍາເນີນເປັນເວລາ 5 ວັນ, ເຊິ່ງບັນດາຜູ້ເຂົ້າຮ່ວມໄດ້ຮຽນຮູ້ພື້ນຖານກ່ຽວກັບຫົວຂໍ້ບົດຮຽນ ການຮັກລູກໃຫ້ໃສ່ໃຈ, ພ້ອມທັງມີການແລກປ່ຽນບົດຮຽນຕ່າງໆ ຈາກວິທະຍາກອນ.
ຂ່າວ: ວັດທະນາ
