ວັນທີ 9 ພະຈິກ 2020 ນີ້ແຂວງອັດຕະປື ໄດ້ຈັດຊຸດອົບຮົມລະບົບຄຸ້ມຄອງຂໍ້ມູນລັດຖະກອນແບບເອເລັກໂຕຼນິກ ໃຫ້ພະນັກງານຫຼັກແຫຼ່ງຈາກພະແນກການອ້ອມຂ້າງແຂວງອັດຕະປຶ ຂຶ້ນທີ່ຫ້ອງປະຊຸມຫ້ອງວ່າປົກຄອງແຂວງ, ໃຫ້ກຽດເຂົ້າຮ່ວມເປັນປະທານຂອງ ທ່ານນາງ ມີນາພອນ ໄຊສົມພູ ຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງອັດຕະປື, ມີທ່ານ ສຸລິວັນ ອ່ອນຕາວົງ ຮອງຫົວໜ້າກົມຄຸ້ມຄອງລັດຖະກອນກະຊວງພາຍໃນ, ມີວິທະຍາກອນຈາກສູນກາງ ແລະ ວິທະຍາກອນຈາກພະແນກການອ້ອມຂ້າງແຂວງເຂົ້າຮ່ວມ.
ທ່ານນາງ ມີນາພອນ ໄຊສົມພູ ໄດ້ກ່າວໄຂຊຸດອົບຮົມວ່າ: ຊຸດຝຶກອົບຮົມລະບົບຄຸ້ມຄອງຂໍ້ມູນລັດຖະກອນແບບເອເລັກໂຕຼນິກ ໃຫ້ພະນັກງານຫຼັກແຫຼ່ງຈາກພະແນກການອ້ອມຂ້າງແຂວງອັດຕະປຶ ຄັ້ງນີ້ ກໍ່ເພື່ອເປັນການຍົກລະດັບດ້ານບໍລິຫານບຸກຄະລາກອນ ໂດຍນຳໃຊ້ເຕັກໂນໂລຊີ ເຂົ້າໃນການຄຸ້ມຄອງລັດຖະກອນ ໃຫ້ທັນສະໄໜ, ເຊິ່ງວຽກງານຄຸ້ມຄອງພະນັກງານ-ລັດຖະກອນ ມີຄວາມຈຳເປັນຕ້ອງໄດ້ຫັນເປັນທັນສະໄໜ ສະນັ້ນວຽກງານການນຳໃຊ້ຖານຂໍ້ມູນຄຸ້ມຄອງພະນັກງານ-ລັດຖະກອນ ແບບເອເລັກໂຕຣນິກ ແມ່ນມີຄວາມສຳຄັນທີ່ສຸດໃນຍຸກປະຈຸບັນ, ເຊິ່ງຈະຊ່ວຍໃຫ້ການຕິດຕາມກວດ ແລະ ຄຸ້ມຄອງຂໍ້ມູນດ້ານຕ່າງໆຂອງລັດຖະກອນໄດ້ຢ່າງສະດວກ, ວ່ອງໄວ ແລະ ຮັບປະກັນຄວາມຖືກຕ້ອງ, ເປັນຕົ້ນ: ແມ່ນການກວດຜ່ານບັນຊີຈຳນວນພົນເງິນເດືອນ, ເງິນອຸດໜູນຕ່າງໆ, ການເລື່ອນຊັ້ນ-ຂັ້ນເງິນເດືອນ, ການດັດແກ້ຂໍ້ມູນອື່ນໆ. ຊຸດອົບຮົມຈະດໍາເນີນເປັນເວລາ 5 ວັນ, ເຊິ່ງນັກສຳມະນາກອນຈະໄດ້ຮຽນຮູ້ກ່ຽວກັບລະບົບຄຸ້ມຄອງຂໍ້ມູນລັດຖະກອນແບບເອເລັກໂຕນິກ, ການເຊື່ອມຕໍ່ລະບົບເງິນເດືອນກັບບັນຊີຈໍານວນພົນເປັນບັນຊີອັນດຽວ ແລະ ຂະຫຍາຍການນໍາໃຊ້ລະບົບຂໍ້ມູນລັດຖະກອນຢູ່ທ້ອງຖິ່ນ, ລະບົບຄຸ້ມຄອງລັດຖະກອນແບບເອເລັກໂຕຼນິກ, ຕິດຕັ້ງລະບົບຄຸ້ມຄອງຂໍ້ມູນລັດຖະກອນ, ວິທີການກວດຜ່ານຈໍານວນພົນແບບທັນສະໄໝ, ການບໍລິຫານຕົວເລກລັດຖະກອນໃໝ່, ການເລື່ອນພະນັກງານຝຶກງານເປັນສົມບູນ, ການເລື່ອນຊັ້ນ-ຂັ້ນເປັນປົກກະຕິ, ການຍົກຍ້າຍ, ການໄປຍົກລະດັບ, ຍົກຍ້າຍພາຍໃນ, ການປະຕິບັດວິໄນ ແລະ ການອອກຈາກລັດຖະກອນໃນຮູບການຕ່າງໆ, ວິທີການພິມບັນດາຕາຕະລາງຈໍານວນພົນອອກຈາກລະບົບ ເພື່ອໄປກວດຜ່ານພາກສ່ວນກ່ຽວຂ້ອງ, ການປ້ອນຂໍ້ມູນຈາກແບບຟອມຂໍ້ມູນລັດຖະກອນລົງຖານຂໍ້ມູນລັດຖະກອນ

ຂ່າວ: ວັດທະນາ

Loading...