ວັນທີ 23 ພະຈິກ 2022 ທີ່ຫໍປະຊຸມໃຫຍ່ຂອງແຂວງອັດຕະປື ທ່ານ ອຸດົມສິນ ສີຊານົນ ຫົວໜ້າພະແນກສຶກສາທິການ ແລະ ກິລາແຂວງອັດຕະປື, ຮອງປະທານສະມາຄົມກິລາກາຍຍະກຳແຂວງ,ໄດ້ລາຍງານ ການກະກຽມຄວາມພ້ອມຂອງທັບນັກກິລາ ຂອງແຂວງອັດຕະປື ທີ່ຈະເຂົ້າຮ່ວມງານແຂ່ງຂັນກິລາແຫ່ງຊາດ ທີ່ແຂວງຊຽງຂວາງເປັນເຈົ້າພາບໃນລະຫວ່າງວັນທີ 13 ຫາ 22 ທັນວາ ທີ່ຈະມາເຖິງນີ້ວ່າ: ມາຮອດປັດຈຸບັນ ແຂວງອັດຕະປື ມີຄວາມພ້ອມແລ້ວທຸກດ້ານ, ພາຍຫຼັງທີ່ໄດ້ມີການດຳເນີນການຄັດເລືອກເອົານັກກິລາທີ່ດີເດັ່ນ, ມີພອນສະຫວັນ ໄດ້ຕາມເປົ້າໝາຍໃນ 5 ຕົວເມືອງ ,ພ້ອມທັງດໍາເນີນການເຝີກຊ້ອມ ຢ່າງຖືກຕ້ອງຕາມຫລັກການວິທະຍາສາດການກິລາກາຍຍະກຳທຸກປະການ,ໂດຍທາງສະມາຄົມກິລາຍກາຍຍະກໍາຂອງແຂວງຈະສົ່ງນັກກິລາເຂົ້້າຮ່ວມແຂ່ງຂັນທັງໝົດ 11 ປະເພດກິລາຄື: ບານເຕະ ຊາຍ ມິ 1 ລາຍການ, ກອ໋ບ ຊາຍ 2 ລາຍການ, ບານສົ່ງ ຊາຍ-ຍິງ 2 ລາຍການ, ກະຕໍ້ ຊາຍ 3 ລາຍການ, ໝາກແລ້ ຊາຍ-ຍິງ 4 ລາຍການ,ໝາກເສິກ ຊາຍ-ຍິງ9 ລາຍການ, ໜ້າເກັກຊາຍ-ຍິງ 6 ລາຍການ,ແລ່ນ-ລານຊາຍ 3 ລາຍການ ,ດອກປີກໄກ່ ຊາຍ-ຍິງ 5 ລາຍການ, ມວຍສາກົນຊາຍ ແລະ ມວຍຢູໂດ ຊາຍ-ຍິງ 2 ລາຍການ ແລະ ກິລາ ເປຕັງ ຊາຍ-ຍິງ,11 ລາຍການ ໂດຍຕັ້ງຄວາມຫວັງເອົາໄວ້ຕ້ອງຜ່ານເຂົ້າໄປຢືນຢູ່ໃນຮອບຄັດເລືອກໃຫ້ໄດ້ .
ໂອກາດດັ່ງກ່າວທ່ານ ເລັດ ໄຊຍະພອນ ເຈົ້າແຂວງ ອັດຕະປື ໄດ້ໃຫ້ກຽດໂອ້ລົມບັນດາຄະນະນໍາ ຄູຝຶກ ແລະ ນັກກິລາທີ່ຈະເຂົ້າຮ່ວມງານແຂ່ງຂັນ ໂດຍເນັ້ນໜັກວ່າ: ບັນດາຄະນະນໍາ ຄູຝຶກ ແລະ ນັກກິລາທຸກທ່ານ ຕ້ອງມີຄວາມສາມັກຄີ, ມີຄວາມເສຍສະຫຼະ, ມີຄວາມອົດທົນ ແລະມີຄວາມຮັບຜິດຊອບຕໍ່ໜ້າທີ່ຂອງຕົນເປັນຢ່າງສູງ, ທຸ້ມເທທັງພະລະກໍາລັງ, ເຕັກນິກສະເພາະຕົວ, ລົງແຂ່ງຂັນເຕັມທີ່, ສູ້ດ້ວຍນໍ້າໃຈນັກກິລາ, ຄູເຝິກ ແລະ ນັກກິລາທຸກຄົນ ໃຫ້ມີຄວາມຕັ້ງໃຈ ແລະ ຕັດສີນໃຈສູງ, ເຂົ້າໃຈເປົ້າໝາຍລວມອັນດຽວກັນ, ເປັນເຈົ້າການນຳກັນທຸກດ້ານ, ມີຄວາມອົດທົນ, ເດັດດ່ຽວ ສູ້ສຸດຄວາມສາມາດ ບົນພື້ນຖານ ກົດກະຕິກາການແຂ່ງຂັນ ພ້ອມກັນກ້າວໄປສູ່ໄຊຊະນະຢ່າງມີສັກສີ ພ້ອມນັ້ນທ່ານເຈົ້າແຂວງອັດຕະປື ຍັງໄດ້ຮຽກຮ້ອງ ໃຫ້ນັກກິລາແຕ່ລະຄົນຕ້ອງໝັ່ນເຝິກຊ້ອມໃຫ້ສະໝ່ຳສະເໝີ, ຮັກສາສຸຂະພາບ ບໍ່ປະໝາດຄູ່ຕໍ່ສູ້, ປັບສະພາບຮ່າງກາຍ-ຈິດໃຈ ໃຫ້ເຂົ້າກັບສະພາບພູມອາກາດຂອງເຂດນັ້ນໆ, ມີຄວາມສາມັກຄີກັບໝູ່ເພື່ອນນັກກິລາ ຮູ້ເສຍສະຫຼະ, ຮູ້ໃຫ້ອາໄພເຊິ່ງກັນລະກັນ, ເຊື່ອໝັ້ນຕໍ່ຄູເຝິກ ແລະຜູ້ຄຸມທີມ,ສິ່ງທີ່ສຳຄັນຄືການເຄົາລົບການຕັດສິນຂອງກຳມະການ ແລະປະຕິບັດກົດກະຕິກາຂອງຄະນະສະມາຄົມກິລາກາຍຍະກໍາແຂວງວາງອອກຢ່າງເຂັ້ມງວດ ເພື່ອສ້າງໃຫ້ໄດ້ປະສົບການ ແລະສູ້ຊົນຍາດເອົາໄຊຊະນະອັນຍິ່ງໃຫຍ່ ມາສູ່ປະຊາຊົນບັນດາເຜົ່າຊາວ ແຂວງອັດຕະປື .
ຂ່າວ: ວັດທະນາ ຫລວງອາໄພ
