ຕະຫຼອດໄລຍະຜ່ານມາຄະນະພັກ-ອໍານາດການປົກຄອງແຂວງອັດຕະປື ໄດ້ເອົາໃຈໃສ່ໃນການແກ້ໄຂຄວາມທຸກຍາກຂອງປະຊາຊົນ ໂດຍການສຸມທຶນຮອນເຂົ້າໃນການປັບປຸງ ແລະ ກໍ່ສ້າງບັນດາໂຄງລ່າງຮັບໃຊ້ການຜະລິດ, ປັບປຸງຊີວິດການເປັນຢູ່ຂອງປະຊາຊົນ ຢູ່ເຂດຊົນນະບົດ, ເຂດຫ່າງໄກສອກຫຼີກ ຕາມເງື່ອນໄຂຄວາມສາມາດຕົວຈິງຂອງງົບປະມານ, ພ້ອມດຽວກັນນັ້ນ ກໍ່ໄດ້ສຸມໃສ່ສ້າງບ້ານໃຫຍ່ ໃຫ້ກາຍເປັນຕົວເມືອງໃນຊົນນະບົດ ເຊິ່ງໄດ້ກໍານົດເອົາ 10 ບ້ານ ນອນໃນ 5 ເມືອງ ປະກອບມີ: ບ້ານສະແຄະ, ບ້ານຫາດຊັນ, ບ້ານໃຫຍ່ອຸດົມ ເມືອງໄຊເສດຖາ, ບາ້ນໃຫຍ່ໝື່ນຫົວເມືອງ, ບ້ານໃຫຍ່ເຊກະໝານ ເມືອງສາມັກຄີໄຊ, ບ້ານແທ, ບ້ານສົ້ມປ່ອຍ ເມືອງສະໜາມໄຊ, ບ້ານຄໍາວົງສາ, ບ້ານວົງສໍາພັນ ເມືອງພູວົງ, ບ້ານນໍ້າງອນ ເມືອງຊານໄຊ, ຜ່ານການປະເມີນຕາມດໍາລັດ 348/ລບ ບ້ານທີ່ບັນລຸຕາມ 16 ມາດຕະຖານ ມີ 2 ບ້ານ ຄື: ບ້ານສະແຄະ ເມືອງໄຊເສດຖາ ແລະ ບ້ານວົງສໍາພັນ ເມືອງພູວົງ.
ການປະເມີນຄວາມທຸກຍາກ ແລະ ການພັດທະນາ ຕາມດໍາລັດ 348/ລບ ມີຄວາມຄືບໜ້າ ຄື: ການປະເມີນຂັ້ນຄອບຄົວ, ທົ່ວແຂວງ ຄອບຄົວທຸກຍາກທັງໝົດ ມີ 11,745 ຄອບຄົວ, ກວມເອົາ 38.24%, ຂອງຄອບຄົວທັງໝົດທົ່ວແຂວງ, ຄອບຄົວພົ້ນທຸກ ມີທັງໝົດ 18,962 ຄອບຄົວ, ກວມເອົາ 61.75%, ຂອງຄອບຄົວທັງໝົດທົ່ວແຂວງ, ໃນນັ້ນ: ມີຄອບຄົວພັດທະນາ 7,530 ຄອບຄົວ, ກວມເອົາ 24.52% ຂອງຄອບຄົວທັງໝົດທົ່ວແຂວງ, ການປະເມີນຂັ້ນບ້ານ ທົ່ວແຂວງມີບ້ານທຸກຍາກທັງໝົດ 77 ບ້ານ ກວມເອົາ 54.60%, ຂອງຈໍານວນບ້ານທັງໝົດທົ່ວແຂວງ, ບ້ານພົ້ນທຸກ ມີ 64 ບ້ານ ເທົ່າກັບ 45.39% ຂອງຈໍານວນບ້ານທັງໝົດ ແລະ ບ້ານພັດທະນາ ມີ 2 ບ້ານ ເທົ່າກັບ 1.42% ຂອງຈໍານວນບ້ານທົ່ວແຂວງ, ການປະເມີນບ້ານໃຫຍ່ ກາຍເປັນຕົວເມືອງນ້ອຍໃນຊົນນະບົດ ບັນລຸໄດ້ 2 ບ້ານຄື: ບ້ານສະແຄະ ແລະ ບ້ານວົງສໍາພັນ, ການປະເມີນຂັ້ນເມືອງ ທົ່ວແຂວງມີ 5 ເມືອງ, ໃນນີ້ ເມືອງທຸກຍາກ ມີ 3 ເມືອງ ຄື: ເມືອງສະໝາມໄຊ, ຊານໄຊ ແລະ ເມືອງພູວົງ, ເມືອງພົ້ນທຸກແລ້ວ ມີ 2 ເມືອງ ຄື: ເມືອງໄຊເສດຖາ ແລະ ເມືອງສາມັກຄີໄຊ, ສ່ວນເມືອງເຂັ້ມແຂງຮອບດ້ານ ແມ່ນຍັງບໍ່່ທັນມີເມືອງໃດບັນລຸ.
ເຖິງຢ່າງໃດກໍ່ຕາມ ເພື່ອສືບຕໍ່ແກ້ໄຂຄວາມທຸກຍາກຂອງປະຊາຊົນ ພາຍໃນແຂວງອັດຕະປື ໃຫ້ຫຼຸດໜ້ອຍຖອຍລົງ ໃນຕໍ່ໜ້າຄະນະພັກ-ອໍານາດການປົກຄອງແຂວງ ແມ່ນຈະສືບຕໍ່ພັດທະນາຊົນນະບົດແລະ ແກ້ໄຂຄວາມທຸກຍາກ ຕິດພັນກັບວຽກງານ ກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ ແລະ ວຽກງານ 3 ສ້າງ ໃຫເ້ຂົ້າສູ້ລວງເລິກ ໂດຍເລັງໃສ່ພັດທະນາເຂດຈຸດສຸມຂອງ
ລັດຖະບານ ແລະ ທ້ອງຖີ່ນດ້ວຍການສະໜອງພື້ນຖານໂຄງລ່າງ, ວິຊາການເຕັກນີກທີ່່ຈໍາເປັນ ເພື່ອຊຸກຍູ້ການຜະລິດ ຕິດພັນກັບການປຸງແຕ່ງ ແລະ ການຕະຫຼາດ, ສືບຕໍ່ຊຸກຍູ້ພາກເອກະຊົນ ແລະ ທຸກພາກສ່ວນຂອງສັງຄົມ ປະກອບສ່ວນເຂົ້າໃນການພັດທະນາຊົນນະບົດ ແລະ ແກ້ໄຂຄວາມທຸກຍາກຢ່າງກວ້າງຂວາງ, ເລິກເຊິ່ງ ແລະ ແຂງແຮງກວ່າເກົ່າ, ທັງນີ້ ເພື່ອເພື່ອເຮັດໃຫ້ຊີວິດການເປັນຢູ່ທາງດ້ານວັດຖຸ ແລະ ຈິດໃຈ ຂອງປະຊາຊົນ ໄດ້ຮັບການຍົກລະດັບໃຫ້ດີຂື້ນເທື່ອລະກ້າວ.
ຂໍ້ມູນດັ່ງກ່າວໄດ້ຮັບການລາຍງານຈາກ ທ່ານ ສູນນະຄອນ ແກ້ວວຽກຄໍາ ຫົວໜ້າພະແນກແຜນການ ແລະ ການລົງທຶນ ແຂວງອັດຕະປື ຕໍ່ກອງປະຊຸມອົງການປົກຄອງແຂວງ ເມື່ອວັນທີ 2 ກໍລະກົດ 2024 ທີ່ຫ້ອງວ່າການປົກຄອງແຂວງ.
ຂ່າວ: ວັດທະນາ ຂ.ອັດຕະປື
