ວັນທີ 25 ມັງກອນ 2021 ແຂວງອັດຕະປື ໄດ້ຮັບຟັງການເຜີຍແຜ່ຊື່ສຽງ ແລະ ວິລະກຳ ຂອງພະເຈົ້າໄຊຍະເສດຖາທິຣາດ ມະຫາຣາດ ວິລະກະສັດລາວລ້ານຊ້າງ ເຊິ່ງພິທີໄດ້ຈັດຂຶ້ນທີ່ຫໍປະຊຸມໃຫຍ່ຂອງແຂວງ.ໂດຍໃຫ້ກຽດເຜີຍແຜ່ຂອງທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ,ມີພຣະອາຈານຍອດພັດທະຣະເກສີ ດຳຣົງ ພິມມະຈັກ ຄະນະບໍລິຫານງານ ອົງການພຸດທະສາດສະໜາສຳພັນລາວ ຫົວໜ້າກຳມະທິການຕ່າງປະເທດ,ມີການນຳຂອງແຂວງ, ພ້ອມດ້ວຍພັກນັກງານ-ລັດຖະກອນ,ນັກສຶກສາ ປັນຍາຊົນເຂົ້າຮ່ວມຮັບຟັງ .
ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ ໄດ້ຍົກໃຫ້ເຫັນເຖິງຜົນງານຂອງພະເຈົ້າໄຊຍະເສດຖາທິຣາດ ມະຫາຣາດ ວິລະກະສັດ ອານາຈັກລາວລ້ານຊ້າງ ເຊິ່ງເປັນເຈົ້າກະສັດອົງທີ 2 ທີ່ໄດ້ຮັບການຍົກຍ້ອງສະຖາປານາຂຶ້ນເປັນ ມະຫາຣາດ ຂອງຣາຊະວົງຊຽງທອງລ້ານຊ້າງ ພະອົງເປັນເຈົ້າກະສັດທີ່ມີຄວາມປີຊາສາມາດຢ່າງຮອບດ້ານໃນການປົກຄອງແຜ່ນດິນໃຫ້ມີຄວາມໝັ້ນຄົງ ເຂັ້ມແຂງ ດ້ານການທະຫານມີຄວາມຈະເລີນຮຸ່ງເຮືອງ ດ້ານສິລະປະ-ວັດທະນະທຳ ແລະ ພຸດທະສາດສະໜາ ນອກນີ້ພຣະອົງ ຍັງເປັນນັກຮົບຜູ້ເກັ່ງກ້າສາມາດ ເປັນນັກວາງແຜນການສູ້ຮົບ ທີ່ສະຫຼາດຫຼັກແຫຼມ ພະອົງເປັນນັກປົກຄອງທີ່ສະຫຼຽວສະຫຼາດ ມີວິໄສທັດເບິ່ງກວ້າງມອງໄກ ໂດຍສະເພາະການຍ້າຍຣາຊະທານີ ຈາກຊຽງດົງ ຊຽງທອງ ລົງມາເມືອງວຽງຈັນ ເຊິ່ງເປັນສູນກາງຂອງອານາຈັກລາວລ້ານຊ້າງໃນສະໄໝນັ້ນ .
ໂອກາດດັ່ງກ່າວພຣະອາຈານຍອດພັດທະຣະເກສີ ດຳຣົງ ພິມມະຈັກ ຄະນະບໍລິຫານງານ ອົງການພຸດທະສາດສະຫນາສຳພັນລາວ ຫົວໜ້າກຳມະທິການຕ່າງປະເທດ ໄດ້ມີຄຳເຫັນວ່າ: ພະເຈົ້າໄຊຍະເສດຖາທິຣາດ ມະຫາຣາດ ເປັນຜູ້ເຕົ້າໂຮມຄວາມສາມັກຄີໃນການບຳລຸງຮັກສາພຸດທະສາດສະໜາໃຫ້ມີຄວາມຈະເລີນຮຸ່ງເຮືອງ ເປັນຜູ້ປົກຄອງທີ່ມີສິນທຳ ມີຄຸນນະທຳ ມີຄວາມກະຕັນຍູກະຕະເວທີ ແລະ ຮູ້ໝູນໃຊ້ພະທຳຄຳສອນໃນພຸດທະສາສະໜາ ໃຫ້ເປັນກົດເກນ ກົດລະບຽບ ປະຕິບັດໃນການປົກຄອງສັງຄົມ ພະອົງມີສັດທາໃນພຸດທະສາສະໜາ ນຳພາປວງຊົນລາວ ສ້າງສາບູລະນະປະຕິສັງຂອນໃຫ້ມີຄວາມຮົ່ມເຢັນເປັນສຸກປວງຊົນຢູ່ໃນສີນກິນໃນທຳ .
ທັງນີ້ ກໍ່ເພື່ອໃຫ້ຄົນຮຸ້ນໜຸ່ມໄດ້ສຶກສາຮຽນຮູ້ ແລະ ຈາລຶກຈົດຈຳພາລະກຳປະຫວັດສາດ ຄຸນງາມຄວາມດີ ແລະ ຜົນງານຂອງພຣະເຈົ້າໄຊຍະເຊດຖາທິຣາຊ ທີ່ພະອົງໄດ້ສ້າງໄວ້ຕໍ່ຜືນແຜ່ນອານາຈັກລາວລ້ານຊ້າງ .
ຂ່າວ: ສິດຕິພອນ
Loading...