ແຂວງອຸດົມໄຊ ມີທ່າແຮງທາງດ້ານກະສິກຳເປັນຕົ້ນ ມີພື້ນທີ່ກວ້າງຂວາງ, ອຸດົມສົມບູນ, ດິນກໍເໝາະສົມກັບການປູກພືດຫຼາຍຊະນິດລວມທັງພືດລົ້ມລຸກ, ໄມ້ຢືນຕົ້ນ,ໄມ້ໃຫ້ໝາກຕ່າງໆ ແລະ ເໝາະສົມກັບການລ້ຽງສັດ; ຫລາຍເມືອງກໍມີທ່າແຮງແຕກຕ່າງກັນ ໂດຍສະເພາະເມືອງທີ່ມີທົ່ງພຽງຫຼາຍກໍເໝາະສົມກັບການປູກພືດລົ້ມລຸກເປັນສິນຄ້າ, ບາງເມືອງທີ່ເປັນພູດອຍທີ່ກວມອັດຕາສ່ວນສູງ ແມ່ນປູກພືດທີ່ເປັນເຂດເນີນສູງຕາມທ່າແຮງ ແລະ ບວກກັບທ່າແຮງອີກອັນໜຶ່ງ ແຂວງ ອຸດົມໄຊ ມີຫລາຍຊົນເຜົ່າ ແຕ່ລະຊົນເຜົ່າກໍມີມູນເຊື້ອດຸໝັ່ນ ແລະ ປະສົບການບົດຮຽນໃນການປູກການລ້ຽງ ທີ່ແນ່ນອນພໍສົມຄວນ.
ທ່ານ ພີມມະເສນ ຄຸນສີລິວົງ ຫົວໜ້າພະແນກ ກະສິກຳ ແລະ ປ່າໄມ້ແຂວງ ອຸດົມໄຊ ໄດ້ໃຫ້ສຳພາດຕໍ່ສື່ມວນຊົນ ວ່າ: ໃນທຸກໆປີຢູ່ແຂວງ ອຸດົມໄຊ ຖັດຈາກລະດູຝົນກໍຕໍ່ໃສ່ລະດູແລ້ງ ສຳລັບລະດູແລ້ງ 2023-2024 ກໍໄດ້ສຸມໃສ່ການຜະລິດຫຼາຍຢ່າງ ໂດຍສະເພາະກໍແມ່ນການປູກເຊິ່ງມີເນື້ອທີ່ 11,560 ເຮັກຕາ ທຽບໃສ່ແຜນການປະຕິບັດໄດ້ 92% ຜົນຜະລິດສາມາດເກັບກູ້ໄດ້ 113,300 ໂຕນ ສະເລ່ຍໄດ້ປະມານ 9.5 ໂຕນຕໍ່ເຮັກຕາ ໃນນີ້ຫຼັກໆ ກໍສຸມໃສ່ໃນການຜະລິດເຂົ້ານາແຊງ 280 ເຮັກຕາ ໃນ 6 ເມືອງ ຜົນຜະລິດໄດ້ 1,270 ໂຕນ ສະມັດຕະພາບສະເລ່ຍ 4.9 ໂຕນຕໍ່ເຮັກຕາ ພ້ອມກັນນັ້ນກໍໄດ້ມີການປູກພືດເປັນສິນຄ້າໃນລະດູແລ້ງ ມີເນື້ອທີ່ 7,190 ເຮັກຕາ ທຽບໃສ່ແຜນການປະຕິບັດໄດ້ 82% ໃນ 7 ເມືອງ ຜົນຜະລິດໄດ້ 91,780 ໂຕນ ສະມັດຕະພາບສະເລ່ຍ 12.76ໂຕນຕໍ່ເຮັກຕາ ໃນນີ້ການຜະລິດເປັນສິນຄ້າມີສາລີແຂງ ມີເນື້ອທີ່ 3,300 ກວ່າເຮັກຕາ ພຶດຕະກູນທົ່ວເຊີ່ງມີຫຼາຍຊະນິດ ເປັນຂະບວນທີ່ກວ້າງຂວາງ ມີເນື້ອທີ່ 1,900 ກວ່າເຮັກຕາ ປູກພືດຜັກຊະນິດຕ່າງໆ 1,370 ເຮັກຕາ ຢາສູບປະມານ 500 ກວ່າເຮັກຕາ ແລະມີທຸລະກິດບໍລິສັດຜູ້ປະກອບການມາຊຸກຍູ້ສົ່ງເສີມປະຊາຊົນປູກພືດຊະນິດຕ່າງໆຈຳນວນ 21 ຫົວໜ່ວຍ.
ປະຈຸບັນພວກເຮົາກຳລັງສຸມໃສ່ການຜະລິດລະດູຝົນ ເຊີ່ງມີເນື້ອທີ່ປະມານ 84,150.75 ເຮັກຕາ (ຮຕ) ທຽບໃສ່ແຜນປີ 2023 ແມ່ນເພີ້ມຂຶ້ນ 4%, ຄາດຄະເນຜົນຜະລິດໄດ້ທັງໝົດ 911,192.64 ໂຕນ, ສະມັດຕະພາບ 10.84 ໂຕນ/ຮຕ ໃນນີ້ ການຜະລິດສະບຽງອາຫານ ເລັ່ງໃສ່ການປູກເຂົ້າທັງໝົດ 26,264.91 ເຮັກຕາ, ຄາດຄະເນສະມັດຕະພາບ 3.59 ໂຕນ/ຮຕ, ຄາດຄະເນຜົນຜະລິດໄດ້ທັງໝົດ 94,281.18 ໂຕນ ໃນນັ້ນມີເຂົ້ານາປີ ເນື້ອທີ່ 16,625 ເຮັກຕາ, ຄາດຄະເນສະມັດຕະພາບ 4.51 ໂຕ່ນ/ເຮັກຕາ, ຄາດຄະເນຜົນຜະລິດ75,001 ໂຕນ; ຮອດປະຈຸບັນກະກຽມດິນສຳເລັດ 33%, ຕົກກ້າສຳເລັດ 35% ແລະປັກດຳສຳເລັດຈຳນວນໜຶ່ງ. ເຂົ້າໄຮ່ ເນື້ອທີ່ 9,639 ເຮັກຕາ, ຄາດຄະເນສະມັດຕະພາບ 2 ໂຕ່ນ/ເຮັກຕາ, ຄາດຄະເນຜົນຜະລິດ 1,279 ກວ່າໂຕນ.
ການປູກພືດສະບຽງລວມ ມີເນື້ອທີ່ທັງໝົດ 5,888 ກວ່າເຮັກຕາ, ຄາດຄະເນສະມັດຕະພາບ 10.33 ໂຕນ/ເຮັກຕາ, ຜົນຜະລິດໄດ້ 60,335 ກວ່າໂຕນ, ໃນນີ້ມີສາລີຫວານ 360.92 ເຮັກຕາ, ເຜຶອກມັນ 154.87 ເຮັກຕາ, ພືດຜັກລວມ 3,517.75 ເຮັກຕາ, ໄມ້ໃຫ້ໝາກ 1,854.48 ເຮັກຕາ, ການປູກພືດເປັນສິນຄ້າລວມ ມີເນື້ອທີ່ທັງໝົດ 51,997.82 ເຮັກຕາ, ຄາດຄະເນສະມັດຕະພາບ 14.56 ໂຕນ/ເຮັກຕາ, ຄາດຄະເນຜົນຜະລິດໄດ້ 756,575.67 ໂຕ່ນ, ໃນນີ້ມີສາລີແຂງ 33,048.07 ເຮັກຕາ, ພືດອຸດສາຫະກຳ 21,204.47 ເຮັກຕາ, ຄາດຄະເນສະມັດຕະພາບ 33.60ໂຕ່ນ/ເຮັກຕາ, ຄາດຄະເນຜົນຜະລິດ 595,684.90 ໂຕນ; ໃນນັ້ນມີ ກາເຟ 74.82 ຮຕ, ອ້ອຍ 9,597 ຮຕ, ຝ້າຍ 111.81 ຮຕ, ໝາກງາ 198.25 ຮຕ, ໝາກເດືອຍ 1,629 ກວ່າຮຕ, ມັນຕົ້ນ ໃນ 7 ເມືອງ ເນື້ອທີ່ 6,997 ກວ່າ ຮຕ; ໝາກກ້ວຍ 2,596 ກວ່າ ຮຕ. ພືດຕະກຸນຖົ່ວ: ເນື້ອທີ່ 454.26 ເຮັກຕາ, ຄາດຄະເນສະມັດຕະພາບ 8,48ໂຕ່ນ/ເຮັກຕາ, ຄາດຄະເນຜົນຜະລິດ 3,852.93 ໂຕນ; ພືດຜັກເປັນສິນຄ້າ ເນື້ອທີ່ 763.45 ເຮັກຕາ, ຄາດຄະເນສະມັດຕະພາບ 10.22ໂຕ່ນ/ເຮັກຕາ, ຄາດຄະເນຜົນຜະລິດ 7,616.56 ໂຕນ; ແລະ ການປູກມອນລ້ຽງມ້ອນສືບຕໍ່ລ້ຽງດ້ວງມ້ອນໂດຍນຳໃຊ້ສວນມອນໃນພື້ນທີ 380 ຮຕ ພ້ອມກັນນັ້ນ ກໍ່ສືບຕໍປະກອບເອກະສານຂໍອະນຸຍາດສ້າງຕັ້ງໂຮງງານສາວໄໝມ້ອນ.
ທ່ານ ພີມມະເສນ ຄຸນສີລິວົງ ໄດ້ໃຫ້ຮູ້ຕື່ມວ່າ: ໂດຍປະຕິບັດຕາມທິດນຳຂອງລັດຖະບານ ກໍຄືນິຕິກຳຂອງຂັ້ນເທິງ ໂດຍສະເພາະບັນຫາວິກິດການທາງດ້ານເສດຖະກິດ ແລະຄວາມຫຍຸ້ງຍາກຕ່າງໆໂດຍສະເພາະແມ່ນບັນຫາເງິນກີບອ່ອນຄ່າ, ການຜະລິດພາຍໃນບໍ່ພຽງພໍຈຳນວນໜຶ່ງ ສຳລັບແຂວງ ອຸດົມໄຊ ກໍໄດ້ແຕງຕັ້ງຄະນະຮັບຜິດຊອບແກ້ໄຂບັນຫາເສດຖະກິດເຄັ່ງຮ້ອນ ໂດຍແມ່ນການນຳຂັ້ນແຂວງເປັນປະທານ ໂດຍເລັ່ງໃສ່ໃນການຜະລິດ ສຳລັບການຜະລິດສະບຽງອາຫານ ຫຼືພືດຜັກຕ່າງໆ ແລະ ໝາກໄມ້ ແຂວງ ອຸດົມໄຊ ແມ່ນພຽງພໍໂດຍພື້ນຖານ ເຊິ່ງພວກເຮົາສາມາດຜະລິດໄດ້ປະເພດພືດຜັກເປັນໃບ ແລະໄມ້ໃຫ້ຫມາກຈຳນວນໜຶ່ງ, ແຕ່ຍັງບໍ່ສາມາດມາດຜະລິດພືດຊະນິດເປັນຫົວໂດຍສະເພາະມັນຝຣັ່ງ, ຫົວກະລົດ, ຜັກກາດຫົວ ແຕ່ກຳລັງສຶກສາຄົ້ນຄວ້າ ແລະ ຍາດແຍ່ງນັກທຸລະກິດມາທົດລອງປູກ ຖ້າໄດ້ຮັບຜົນ ພວກເຮົາຈະໄດ້ຢຸດຕິການນຳເຂົ້າ. ສຳລັບພືດຜັກຕ່າງໆແມ່ນພຽງພໍ ແລະ ສາມາດສົ່ງອອກຈຳນວນໜຶ່ງໄປແຂວງໃກ້ຄຽງ.
ໂດຍ: ຄຳພູສະຫວັນ ເພັນສະຫວັດ
ເສດຖະກິດ-ສັງຄົມ
