ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ແຂວງອຸດົມໄຊ ສະຫຼຸບການຈັດຕັ້ງປະຕິບັດວຽກງານ ສົ່ງເສີມ ແລະ ຄຸ້ມຄອງການລົງທຶນ ປະຈຳ 6 ເດືອນ ຕົ້ນປີ 2020

ກອງປະຊຸມ ສະຫຼຸບການເຄື່ອນໄຫວຈັດຕັ້ງປະຕິບັດວຽກງານສົ່ງເສີມ ແລະ ຄຸ້ມຄອງການລົງທຶນ ຂອງພາກເອກະຊົນ ຢູ່ແຂວງອຸດົມໄຊ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2020 ໄດ້ຈັດຂຶ້ນໃນວັນທີ 27 ພຶດສະພາ 2020 ຢູ່ທີ່ຫ້ອງປະຊຸມ ພະແນກ ແຜນການ ແລະ ການລົງທຶນ ແຂວງອຸດົມໄຊ ໂດຍການເປັນປະທານຂອງທ່ານ ປອ ຄຳພັນ ເຜີຍຍະວົງ ເຈົ້າແຂວງອຸດົມໄຊ ທັງເປັນປະທານ ຄະນະກຳມະການສົ່ງເສີມ ແລະ ຄຸມຄອງການລົງທຶນ ຂັ້ນແຂວງ, ມີທ່ານອ່ອນແກ້ວ ອຸ່ນອາລົມ ຫົວໜ້າພະແນກ ແຜນການແລະການລົງທຶນແຂວງ,ມີບັນດາພະແນກການ,ເຈົ້າເມືອງ ແລະ ຂະແໜງການກ່ຽວຂ້ອງເຂົ້າຮ່ວມ.

ທ່ານ ອ່ອນແກ້ວ ອຸ່ນອາລົມ ຫົວໜ້າພະແນກ ແຜນການແລະການລົງທຶນແຂວງອຸດົມໄຊ ລາຍງານຕໍ່ກອງປະຊຸມວ່າ ຜ່ານການຈັດຕັ້ງປະຕິບັດ ແຜນການດຶງດູດການລົງທຶນ ໃນໄລຍະ 6 ເດືອນຜ່ານມາ ສາມາດດຶງດູດ ການລົງທຶນໄດ້ທັງຫມົດ 7 ໂຄງການ ລວມມູນຄ່າການລົງທຶນທັງຫມົດ 91 ກວ່າຕື້ກີບ. ໃນນັ້ນ ຂະແໜງກະສິກໍາ ແລະ ປ່າໄມ້ ມີ 2 ໂຄງການ, ມູນຄ່າການລົງທຶນ 20 ຕື້ກວ່າກີບ, ອຸດສາຫະກຳ ແລະ ຫັດຖະກຳ 1 ໂຄງການ ມູນຄ່າ 31 ຕື້ກວ່າກີບ,ຂະແໜງພະລັງງານ ແລະ ບໍ່ແຮ່ ມີ 3 ໂຄງການ ມູນຄ່າການລົງທຶນ 19 ຕື້ກວ່າກີບ ແລະ ການບໍລິການ 1 ໂຄງການ ມີມູນຄ່າການລົງທຶນ 19 ຕື້ກ່ວາກີບ. ແລະ ປັດຈຸບັນນີ້ ແມ່ນໄດ້ມີການຄົ້ນຄວ້າ,ດັດແກ້ການເພີ່ມທຶນໃນຈຳນວນ 5 ໂຄງການ. ນອກນັ້ນ ຍັງໄດ້ເຊັນບົດບັນທຶກຄວາມເຂົ້າໃຈ ເພື່ອສຳຫຼວດ ແລະ ສຶກສາຄວາມເປັນໄປໄດ້ ໃນການພັດທະນາໂຄງການລົງທຶນ ຈຳນວນ 3 ໂຄງການ ໂດຍສະເພາະແມ່ນ ໂຄງການພັດທະນາຕົວເມືອງໃຫມ່ ຈຳນວນ 2 ໂຄງການ ແລະ ໂຄງການທຶນດ້ານກະສິກໍາ,ການທ່ອງທ່ຽວ ແລະ ສົ່ງເສີມປູກພືດ – ລ້ຽງສັດ ເປັນສິນຄ້າ 1 ໂຄງການ. ທັງຫມົດ ນີ້ຍັງຢູ່ໃນຂັ້ນຕອນກະກຽມສຳຫຼວດ ແລະ ເກັບກຳຂໍ້ມູນ ເພື່ອສຶກສາຄວາມເປັນໄປໄດ້ໃນການພັດທະນາໂຄງ ການ. ສ່ວນວຽກງານອື່ນໆ ເປັນຕົ້ນແມ່ນ ການປັບປຸງກົນໄກການບໍລິການ ການລົງທຶນປະຕູດຽວ,ການຕິດຕາມ,ກວດກາ ແລະ ຄຸ້ມຄອງການລົງທຶນ ກໍໄດ້ມີການເຄື່ອນໄຫວຢ່າງເປັນປົກກະຕິ ແນໃສ່ເຮັດໃຫ້ໂຄງການລົງທຶນ ຢູ່ພາຍໃນແຂວງອຸດົມໄຊ ມີປະສິດທິພາບ,ໄປຕາມລະບຽບ,ຫຼັກການ ແລະ ໄດ້ຮັບຜົນສຳເລັດຕາມລະດັບຄາດຫມາຍ. ໂອກາດດັ່ງກ່າວ ຜູ້ເຂົ້າຮ່ວມກອງປະຊຸມ ໄດ້ພັດປ່ຽນກັນປະກອບຄຳເຫັນ ໃສ່ບາງບັນຫາທີ່ເຫັນວ່າຍັງເປັນຈຸດອ່ອນ,ຂໍ້ຄົງຄ້າງ ແລະ ຈັດຕັ້ງປະຕິບັດຍັງບໍ່ທັນໄດ້ດີ ເພື່ອພ້ອມກັນຊອກຫາຊ່ອງທາງແກ້ໄຂ ໃນຕໍ່ຫນ້າ. ສ່ວນຕອນບ່າຍຂອງວັນດຽວກັນນັ້ນ ກໍໄດ້ມີການຄົ້ນຄວ້າ,ປຶກສາຫາລື ຄຳຮ້ອງ ຂໍລົງທຶນໃຫມ່ ຈຳນວນ 2 ໂຄງການ ພ້ອມທັງຈັດພິທີເຊັນສັນຍາ ການລົງທຶນ ຂອງພາກເອກະຊົນ ລະຫວ່າງ ພະແນກແຜນການ ກັບ ຜູ້ລົງທຶນ ແລະ ຂະແໜງການກ່ຽວຂ້ອງ ຈຳນວນ 5 ໂຄງການ ຄື ສັນຍາສຳປະທານ ໂຮງງານຄົບຫີນ ໄຊຈະເລີນຊັບ ຈຳກັດ ຢູ່ບ້ານກິ່ວຫຼັກຄຳ ເມືອງງາ ແລະ ບ້ານ ນ້ຳວຶນໃຕ້ ເມືອງນາຫມໍ້,ສັນຍາສຳປະທານ ໂຮງ ງານຄົບຫີນ ນາງໄນ ວັນນະເລີດ ບ້ານດອນສະອາດ ເມືອງປາກແບງ,ສັນຍາຕໍ່ອາຍຸ ການລົງທຶນບໍລິການ ສະຖານີລົດຂົນສົ່ງໂດຍສານ ພັນມີໄຊ ບ້ານນາເລົ່າ ເມືອງໄຊ ແລະ ສັນຍາການລົງທຶນສ້າງຕັ້ງໂຮງງານຜະລິດ ທໍ່ນ້ຳ ຢູ່ບ້ານກໍນ້ອຍ ເມືອງໄຊ ແຂວງອຸດົມໄຊ ຂອງບໍລິສັດ ຊ່ວງໄຊ ຂາເຂົ້າ – ຂາອອກ ຈຳກັດຜູ້ດຽວ.

ຂ່າວ: ຄານມະນີ ຮຽນດໍຈັນ