ແຂວງອຸດົມໄຊ ມີທ່າເເຮງ ໃນການພັດທະນາຫຼາຍດ້ານ ເປັນຕົ້ນແມ່ນ ດ້ານຈຸດພິເສດທີ່ຕັ້ງ ມີເສັ້ນທາງລົດໄຟລາວ-ຈີນ ຜ່ານ 3 ເມືອງ, ມີ 3 ສະຖານີ; ມີເສັ້ນທາງເລກທີ 13 ເໜືອ ແລະ ທາງລົດໄຟ ລາວ-ຈີນ ຕັດກັບ ເສັ້ນທາງ 2E, 2W ເຊື່ອມຕໍ່ແຕ່ ພາກຕາເວັນຕົກສ່ຽງໃຕ້ຂອງ ສສ ຫວຽດນາມ ຜ່ານແຂວງຜົ້ງສາລີ ໄປຫາ ພາກເໜືອຂອງແຂວງໄຊຍະບູລີ ແລະ ພາກຕາເວັນອອກສ່ຽງເໜືອ ຂອງຣາຊະອານາຈັກໄທ; ພ້ອມນີ້ ກໍມີສາຍແມ່ນໍ້າຂອງ ໄຫຼຈາກເມືອງຫ້ວຍຊາຍແຂວງບໍ່ແກ້ວ ຜ່ານເມືອງປາກແບງ ໄປຫາ ແຂວງຫຼວງພະບາງ ເມືອງມໍລະດົກໂລກ. ດ້ານການທ່ອງທ່ຽວ ມີແຫຼ່ງທ່ອງທ່ຽວທາງດ້ານທໍາມະຊາດ ແລະ ວັດທະນະທໍາ ເຊັນ: ນໍ້າກັດຢໍລະປ່າ, ຖໍ້າຈອມອອງ ເມືອງໄຊ ແລະ ວັດພະເຈົ້າສິງຄໍາ ເມືອງຫຼາ ແລະ ສະຖານທີ່ແຫຼ່ງທ່ອງທ່ຽວອື່ນໆ.
ທ່ານບຸນຄົງ ຫລ້າຈຽມພອນ ເຈົ້າແຂວງອຸດົມໄຊ ໄດ້ໃຫ້ສໍາພາດຕໍ່ສື່ມວນຊົນ ໃນວັນທີ 5 ກໍລະກົດນີ້ວ່າ: ໃນໄລຍະ 6 ເດືອນຕົ້ນປີນີ້ ແຂວງອຸດົມໄຊ ໄດ້ເອົາໃຈໃສ່ປັບປຸງຂອດການບໍລິການ ໂຮງແຮມ, ເຮືອນພັກ, ຣີສອດ, ຮ້ານອາຫານ ແລະ ສະຖານທີ່ທ່ອງທ່ຽວ ໃຫ້ມີມາດຕະຖານດີຂຶ້ນ ໃນນີ້, ພົ້ນເດັ່ນ ແມ່ນຣີສອດນໍ້າກັດ ຢໍລະປ່າ ໄດ້ຮັບຮອງເປັນຣີສອດລະດັບ 5 ດາວ ແລະ ເປີດນໍາໃຊ້ ພິພິຕະພັນຊີວະນາໆພັນ ນໍ້າກັດຢໍລະປ່າ ເຊິ່ງເປັນແຫ່ງທໍາອິດຂອງ ສປປ ລາວ ແລະ ເປັນແຫ່ງທີ 3 ຂອງໂລກ; ໂຮງແຮງງາມລາວ ແລະ ຣີສອດເລີແກຼນ ປາກແບງ ໄດ້ຮັບຮອງເປັນສະຖານທີ່ພັກເຊົາມາດຕະຖານ ສີຂຽວອາຊຽນ, ປັດຈຸບັນ ໄດ້ເຊັນສັນຍາໂຄງການກໍ່ສ້າງໂຮງແຮມແລນມາກອຸດົມໄຊ ເຊິ່ງຈະໄດ້ລົງມືກໍ່ສ້າງ ໃນມໍ່ໆນີ້ ພ້ອມນີ້, ພວກເຮົາຍັງໄດ້ຈັດງານບຸນປະເພນີບັນດາເຜົ່າ ຕິດພັນກັບການ ເປີດປີທ້ອງທ່ຽວລາວ 2024 ຢ່າງມີບັນຍາກາດຟົດຟື້ນ.
ທ່ານໃຫ້ຮູ້ຕື່ມວ່າ: ໃນໄລຍະ 6 ເດືອນຕົ້ນປີນີ້ ມີນັກທ່ອງທ່ຽວເຂົ້າມາຜ່ານ ແລະ ພັກແຮມຢູ່ ແຂວງອຸດົມໄຊ ທັງໝົດ 113.025 ເທື່ອຄົນ, ສ້າງລາຍຮັບເຂົ້າແຂວງອຸດົມໄຊ ໄດ້ທັງໝົດ 6.533.353 ໂດລາ. ສໍາລັບແຂວງອຸດົມໄຊ ມີແຫຼ່ງທ່ອງທ່ຽວທີ່ຫນ້າທ່ຽວຊົມຫລາຍແຫ່ງ ບໍ່ວ່າຈະເປັນດ້ານທຳມະຊາດ, ປະຫວາດສາດ ແລະ ວັດທະນະທຳ ໃນນັ້ນແຫລ່ງທ່ອງທ່ຽວທີ່ໄດ້ຮັບການພັດທະນາ ແລະ ເປີດບໍລິການ ເປັນຕົ້ນ: ນໍ້າກັດຢໍລະປ່າ, ຖ້ຳຈອມອອງ, ວັດພະເຈົ້າສິງຄໍາ, ວັດພູທາດໄຊມຸງຄຸນ ຣັດຕະນະມິ່ງເມືອງ, ພູຫຍ້າຄາຫົວພະຍາງູໃຫຍ່, ຕາດນໍ້າແຮງເມືອງຮຸນ, ທຳມະຊາດສາຍນ້ຳຂອງ ເມືອງປາກແບງ, ວິຖີຊີວິດຊົນເຜົ່າອາຄ່າ ບ້ານອາໂນ ເມືອງຫຼາ, ນໍ້າອອກຮູບ້ານນາທົ່ງ ເມືອງນາໝໍ້ ແລະ ອື່ນໆ.
ຂ່າວ: ຄຳພູສະຫວັນ ເພັນສະຫວັດ
